Kata Galasi 5

Yéesu Kilisita áfulenolaalumuu li humiikeeleto

1 Kilisita lafakenolaafaken mantee li úfulaal li mal̥egen li humiikeeleto. Kama jítuk tó lit, ban jakum jilaañen jiŋa’ humiikeeleto jikaanoolo.

2Jijanten! Injé Fool boot min ilobuul kaanaku nokoomuu loon jikaakat min kuteyenuul búkut, kama Kilisita abajut li bukuluul jáliŋ. 3Fan ilaañen ilob foof ánayine anoowan akate min kuteyenool búkut, eenool laate akaan wahawu feh wan eluwaayi elobumuu. 4Bukuluul jaŋesemuu min jihanken min jikaan loon eluwaayi elobumuu, mantee Ateemit li ajokuul bukan kacole, jikatookatoo li Kilisita. Jilet ló muñeˈe li kájiyaku kata Ateemit. 5Bale alolaal, kákangumaku koololaal ko kommuu min Ateemit akaanolaal ulakowaal bukan kacole hákilool humum hata káyinenaku koololaal. Wahawu unwu lukobaalemuu li wo, li búkaanum bata Buyinumabu Banabaabu. 6Li mal̥egenamu, an áamimuu li Yéesu Kilisita, atey búkutoo, ateyut búkutoo, bajut jáliŋ yanooyan. Wahawu wabajumuu jáliŋ, wo wommuu káyinen li Yéesu Kilisita, ban li úhiisen ko li húbooli bukan.

7Jijowenjow jak! Kama ayimaa áfiife bútinabu min alenjenuul jífu’ li mal̥egenamu? 8Katikenaku unku kubilumut li Ateemit ahooñuulumuu. 9Loon lobemuu: «Jatiita élebiil jíkaakenemuu efo’.» 10Injé libabbaj kákangum li bukuluul li Amaaŋenawu kaanaku let jibaj kayinoo kakee kábute li kúmbaam. Bale anawu águul̥emuu li bukuluul, aano min aano, Ateemit fan atekool.

11Kutuyom, nokoomuu loon ínje liloŋe li iwaale mata katey búkut, wáa lí úji li kumit koono li kálaamenom? Nokoomuu loon mo, kama muñeˈe busiisijanabu babilummuu li eketayi yata Kilisita li ekuluwaayi, búfule. 12Bukanabuku kammuu li kalillimenaku kooluul, lifañeene kama min kujow kukaan min kukeekiil foof!

13Kutuyom, bukuluul Ateemit lahooñuuhooñ boot mata min jífu’ li humiikeeleto. Bale jakum káfulaku kooluul li emiikeeleto, kújiwuul li jinab li kásiibowaku kajakutumuu kata siniilasu sooluul. Bale húbooli hujow húji anoowan li bukuluul li anaak alok boot li afaalool li kawalenoolo ló. 14Li mal̥egenamu, Eluwaayi foof yo feh, li hulim hano bale eŋali kaan. Ho hommuu unhe: «Ufañ afaali an loon awu humumi ufañoolomuu.» 15Bale nokoomuu loon jilumoolelumoo ban li jinaak jimeloo, jíkaanum: fan ban di jiniilenoo.

Jikat Buyinumabu Banabaabu min bucolen buloŋabu booluul

16Boot min eenuul, jikat Buyinumabu Banabaabu min bucolen buloŋabu booluul. Jikaan momuu, let jimit jinab li kásiibowaku kata eniilayi yooluul. 17Li mal̥egenamu, wahawu wan eniilayi ésiibowemuu, úbute li wata Buyinumabu. Buyinumabu wahawu wan búsiibowemuu úbute li wata eniilayi. Buyinumabu búbutoobutoo ŋáa’ li eniilayi. Wahawu unwu újimuu, jiyilaat jinaak jikaan loon súumuulumuu. 18Bale nokoomuu loon Buyinumabu Banabaabu bucolencolen buloŋabu booluul, jilet kama li kuŋen kata eluwaayi.

19Luhaasaale jak wahawu wan eniilayi ekaanemuu. Wo wommuu: húfulo li alet alet, ékandomaayiiñ, bucagayet, 20kamanen wah walet Ateemit, kakaan jángafayinde, búlatoo, úmuy, batahaay, etindihuuñ, búhaŋoo, búceeŋoo, bugiiloo, 21kásiibo wah, kákaliyenoo, kawuuhen, li wahawu feh wanokoomuu li wo. Boot min ilobuul ikat to, loon ilobeenuulumuu, bukanabuku kakaanemuu wahawu unwu, let kutowo Jáyiiyaju jata Ateemit.

22Bale wahawu wan Buyinumabu busenemuu wo wommuu: húbooli, ésuumansuum, kásuumaay, kabeben, másuum, ésuum buyinum, káwoolu, 23kájoobi buyinum, li hujokoo. Wahawu unwu feh, eluwaayi éhilut wó. 24Bukanabuku kata Yéesu Kilisita, kubambaaŋ li ekuluwaayi bóonowabu bajakutumuu bata eniilayi, boot li kásiibowaku kata yo ló. 25Nokoomuu loon li Buyinumabu lúloŋumaale, lootaale ukataal Buyinumabu foof min bucolen makaanelamu moololaal feh. 26Jakum utebenaal ubandolaal, ban jakum unaak úgecoolaal. Jakum foof an li alolaal abaj wah, afaalool li atii.

Currently Selected:

Kata Galasi 5: cskDBL

Highlight

Copy