Kata Galasi 4

1Wahawu wan ifañumuu min ilob wo wommuu unwe: an áatimuu atowo atuubawool ban li aloŋ añiil, anawu ummu ábutoolut li wahoowah li amiikeel, maayeet min kite eenimuu okila áami li akil wahawu feh. 2Bale laate átuul bukanabuku kammuu kookenool li kaakumuu wahawu woola, boot yok nan taŋayi yan atuubawool asenumuu yommuu li éliiŋ. 3Ololaal foof, mo manolamu. Nan ulakowaalumuu bañiil, emiikeel lulakowaale yata wahawu wata adunaayi. 4Bale nan taŋayi yan Ateemit asenumuu éliiŋumuu, li áboñul Añoolool. Anaale abukool, ban li alako li kuŋen kata Eluwaayi yata Móyiis. 5Labiibil loon muñowu min ahal boot li bukanabuku kammuu li kuŋenaku kata eluwaayi, li foof boot kakaanolaal min ulakowaal bañiil bata Ateemit.

6Mal̥egen bañiil bata Ateemit joom, mó mújimuu li áboñul Buyinumabu bata Añoolool bubil bulako li uyinumawu woololaal, Buyinumabu balobemuu butiya boon: «Abba#4:6 Abba: yo yommuu Faafa li elobayi yan koonemuu Alameyeŋ! Faafa!» 7Min lako kama muñeˈe ulet amiikeel, bale añiil loom. Ban emmuu awu añool Ateemit loom, Ateemit fan aseni foof bútowaabu ban akat tomuu boot li kuñoolool.

Fool buyina li bujokool mata kata Galasi kúji

8Naanaŋ, nan bukuluul jihaasutumuu Ateemit, jilakowenlako kumiikeel kata kuteemit kalet mal̥egen. 9Bale muñeˈe nan jihaasumuu Ateemit — booteen min een muñeˈe nan Ateemit ahaasuulumuu — buu jiyilo jimit jilaañ li múkaaniinamu ummu mabajutumuu jáliiŋ yanooyan? Waa, jifañe min jilaañen jilako emiikeel yata wahawu unwumaa? 10Li jinaak jiluuken ŋáa’ kunak kukee, kul̥eeñ kukee, taŋ yakee li ujaañ ukee! 11Líkolikoli mooluul, mata min bil lako bulokabu ban ikaanumuu boot li bukuluul kama kakaal̥o!

12Kutiyom liyaakuul, jikaan loon ínje, mata ínje humumom lilanlaañ inokoo loon bukuluul. Bajut no wah wan jitilene lí ínje. 13Jiwayil̥owe joon kásomut kújiwommuu li ibaj bútin min iwaalewuul Hulimahu Hásuumaahu kátinaalaku. 14Maayeet min eniilayi yúmbaam yásomutumuu ésuumutumuu bajuk, jibesutom ban jihoyutom foof. Bale jiyabonyab loon kama ínje amalaka ata Ateemit leem, loon eenimuu ínje humumom emmuu Yéesu Kilisita. 15Kama ésuumahukowayi yooluul yata no inyay? Li mal̥egenamu, ínje liyilo ilob kaanaku jiyiliyeenumuu, fan jíkool̥ul kúkilaku kooluul jisenom. 16Waa, kama muñeˈe jiyansaan jijokom alatoolawuul, mata lilobewuulob mal̥egen?

17Bukanabuku umbuku kumelowuumelo, ban li koono li kahanken mantee li kúñakuluul jilaañ booliil. Bale uyinoolawu wooliil ujakut. Wahawu wan kufañumuu bale, wo wommuu min kutiilooluul lí ínje mantee li jiluukeniil. 18Kahanken lajaajak ŋáa’, nokoomuu loon wahawu wájiwuulumuu li jihanken ujaajak. Joote jinaak jihanken nanoonan, bale jakum lako ínje babile booluul bale. 19Kuñoolom kan iboolaat, lilaañene ibaj sílaam sáamak loon sata anaale anokene li éluŋun, mata bukuluul jíji, ban boot yok nan jommuu li jinokoo jak li Kilisita. 20Lifañeene ŋáa’ min ilako li bukuluul muñeˈe min oomaamee, mantee li ilob li bukuluul li hulim hábuto, mata buyina báamak bookom mata bukuluul jíji.

Agaal buko li Saala li kuŋali kaan bukittenoolum

21Jilobom, bukuluul jafañumuu min jiloŋ loon eluwaayi yata Móyiis elobumuu. Kama jijamut buu eluwaayi elobe? 22Li mal̥egenamu, eluwaayi elollob li Bakiicelabu kaanaku Abulaham kuñiil káyine kúl̥uba labaje. Akee li Agaal ammuu amiikeel labajool, aahu li abajool li Saala aletumuu amiikeel. 23Añiilawu an Abulaham abukumuu li Agaal ammuu amiikeel, labukibuk loon an abukeyimuu, bale añiil aahu an abajumuu li Saala aletumuu amiikeel, labajoobaj mata Ateemit humumool afin min alobe kasenool o’ Abulaham. 24Kulimaku unku kuyilo kujoki loon bukittenoolum, mata kanaalaabuku kúl̥ubaaku kulakolako kúfaalum hakee li kúl̥ubaaku li Huyuuyahu han koonemuu Sinaay hújokumi, ban li hubukoo bañiil bata humiikeeleto. Húfaalumahu unhu ho hommuu Agaal. 25Agaal akila ayilimuu akittenoolumi li Huyuuyahu hata Sinaay hammuu li etaamayi yata Aalabi. Akila ayilimuu foof akittenoolumi li Yeelusalem yata muñeˈe, mata akila ummu li humiikeeleto li kuñoolool ló. 26Bale Yeelusalem yammuu haatiya, yo elet amiikeel. Yo yommuu jaawoolaal Saala. 27Mata kikkiic kaanaku:

«Esúumansuum elako li awu ajamutumuu huhaane,

awu jayilaatumuu ubaj añiil,

Uya eji’ ban li ukaaw butiya li ésuumansuum ló,

awu ahaasumuu sílaam sata kabukoo.

Mata bañiilabu bata anaalaawu an kukat bomuu fan buhaŋ mameeŋ

bata anaalaawu abajumuu ánayine#Esay 54:1.»

28Kutuyom, muñeˈe bukuluul bañiil joom ban Ateemit alobe kasen, loon Isaak. 29Bale loon añiilawu abukimuu loon an abukeyimuu, anaake álaamenumuu naanaŋ añiilawu abukimuu li búkaanum bata Buyinumabu bata Ateemit, wahawu unwu foof ubajumuu síyaat. 30Bale buu Bakiicelabu bulobe? Bonsoon: «Ukesoo amiikeelawu anaalaawu boot li añoolool ló; mata añiilawu ata amiikeelawu anaalaawu let kugaboo bútowowabu li añiilawu ata anaalaawu aletumuu amiikeel#Húkitumahu 21:10.» 31Kutuyom, wahawu unwu újimuu alolaal uletaal bañiil bata amiikeelawu anaalaawu, bale bañiil bata anaalaawu aletumuu amiikeel loomaal.

Currently Selected:

Kata Galasi 4: cskDBL

Highlight

Copy