ZECHARIAH 2
2
Ram Holmarkhena Rui
1Keine hanui kallengni mangalthutbi, keiyei mitni thrilthiyei kheenrouri, thilak, bi heitamrou napawa napung khatne aiyei hutra ram holmarkhena rui khat shinbine mayungbi klei heiwaya keine mukur. 2Heirouri keine heikngai, “Nangri kouranungeiyo?” Heirou ane keinungei loumallangbi kyun, “Jerusalem'ya holmarkhebi, heiyei homne kounak marya, heirou heiyei Dungne kounakbil shaangleiyo toubi thinanungei wamayungkura.” 3Heirouri thilak, keikou tlou kallangkril Thangring heiwane wathukkura, heitoubi Thangring khatkhi wathukbine aya murilkur. 4Heirou lamkri Thangringne khatpanungei loushun, “Khrangni wabi kartlang douwa heiwanung atoubi shunpilaklo, ‘Jerusalem'ri thimi rapne yuldakur chungachakurnei ngamrou, heirou ui-waa rapkhi chungachakurnei ngamrou, raalpal yaomakei yultlai paalkurnaksi hoirouwame.’ 5Kouweiyo toulanungri, Umpune atoubi shunpilei, ‘Jerusalem karhilni Keine meithlanyei raalpal khoini koolphobpirou, heitoubi heiyei rillari Keine thang'al khoini albine leipirou.’ ”
Raal Manloukur Thimi Rapya Yaiyei Ramranung Ungmallengpi
6“Ho! Ho! Khalu-lhangei ram heirouwei wathukbine truklakalo,” toubi Umpune shunlei; kouweiyo toulanungri, “Nayari Keine tlaipang mshung'phali wa'tlungni karyouni chaichekkur'khoulame,” toubi Umpune shunlei. 7O Babylon'ra raal manphopbi klei Zion'rei thimirap, naitamne truk'kartleibine kallengalo! 8Kouweiyo toulanungri, Thangwan-Shimleiyei Pu Umpune atoubi shunlei, “Ane Keiya thang alyerkur hillouri naya maangyerkur lim rapbei doura karhane Ane Keiya yenmalhetpikur; ngamri naya marhotkur thimirap heiri manklu mitlung manuibi marhotkur thimi rapme. 9Kouweiyo toulanungri, thilak, Keihut hakpani yaidoura raal daeirouhui; heitoubi, yani shok rapbei hutra himangrouwa; heirouri Thangwan-Shimleiyei Pu Umpune keiya yenmalhetpime toubi nani murouwa. 10Hakraowei laaya shalaklo, O Zion'yei chanaorap; kouweiyo toulanungri, thilak, Keine yongbine heitoubi naihangra thrungroume,” toubi Umpune shunlei. 11Heiyei tlainirouri limrap nammane Umpunung wachangchirou; heitoubi Keiyei thimirap hoirouwa; heitoubi Keine naihangra thrungrou; heirouri Thangwan-Shimleiyei Pu Umpune Keiya nanungei yenmalhetpime touri nani murouwa. 12Heirou Umpune Judah'ya Aiyei khyingei ram shiruk hoiyerrou; heitoubi Jerusalem'ya yerrouwei lhangai Aiyei khukarthil khoini hanui khalthutthurou.
13 #
Hab 2.20; Zep 1.7. O tlaipang thimirap, na nammane kouhoukhi shaomakne ri leilaka; kouweiyo toulanungri, Umpune Aiyei khying bom'rouwei kanthouwura.
Currently Selected:
ZECHARIAH 2: MARIBSI
Highlight
Copy
Compare
Share
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
