ZECHARIAH 3
3
Suipipu Upa Joshua'ya Mu'kyer
1Heirouri ani keinungei Umpuei Thangringei maibongra mayungbi klei Joshua'ya muyerkur; kheen heirouri Joshua'ya showal khingbangnanungei toubi Satan'ne Joshua'yei thya lhangra heimayungkur. 2#Jud 9. Heirou Umpune Satan'ya shunkur, “O Satan, Umpune neiyari yanimakne shunkhambi toumangurla; heirou Jerusalem'ya khalthutpikur Umpuhakpane neiya yanimakne shunkhambi toumangurla. Napawa heiwari meiwairei bulthutkur thirmsuinaksi nimaka?” 3Kheen heirouri Joshua'ne phichun mardun rapya upbine, Thangringei maibongra mayungbine heiklei. 4Heirou Thangring heiwane aipongrei heimayung Thangring deinungei heishunkur, “Airouwei phichun mardunrap heiri heilhukurlak!” Heirou hanuikhi ani Joshua'nung shunthu, “Thilak, neiyei borh rapya neirouwei Keine louthutdurpila, heitoubi Keine neinungei rannei phirulya martlengurpila.” 5Heirou Keine shun, “Yane aiyei lura lingkhang khngou khat yeetbaangpilaksu.” Heisi toubine yane aiyei lura lingkhang khngou khat yeetbaangpikur, heitoubi aya phirulkhi ranya martlengbi hupbaangpikur. Kheen heirouri Umpuei Thangringne aiyei pongra mayungbi heiklei.
6Heirou Umpuei Thangringne Joshua'nung thoulhakbine atoubi shun; 7“Thangwan-Shimleiyei Pu Umpune atoubi shunlei, ‘Kounakpi nangne Keiyei chaylamya baimakne chachanganungri, heirou nangne Keiyei watlhouya karyimmakne touchanganungri; heiyanungri Keine neiyari Keiyei Pucheemrakhi Pu khoini leinanungei, heirou neiyari Keiyei maibongrei mayungbi klei Thangring rapbei hangrakhi changnanungei bomkhi neinungei Keine pirou.’ 8#Isa 4.2; Jer 23.5; 33.15; Zec 6.12. Asinungri louninglhaklak, O Suipipu upawa Joshua, heirou neiyei maibongra ombine klei neipalui suipi purap; kouweiyo toulanungri, yarap heiri lhangaiya muloukna hutlhaei thimi rapme; kouweiyo toulanungri, thilak, Keiyei Shikrui BAN khat Keine yenmalhetpirou. 9Ngamri, thilak, Joshua'yei maibongra Keine thlungkhat bunbaangurla! Thlungmtum khatrou mitlung enitam klei. Thilak, thlungmtum heiyei doura Keine khaklhakbi atoubi mayekhouyerrou toubine Thangwan-Shimleiyei Pu Umpune shunlei, touri ‘Nungkhatnuiri Keine ram heiyei borh namma louthutdurou.’ 10#Mic 4.4. Heiyei tlaini'rouri nane ai'aiyei cheemlhunyei thimi rapya ungbine, yaiyei darkha yam daakra, heirou khyudhei trung holira ombi mathrilyerrou,” toubi Thangwan-Shimleiyei Pu Umpune shunlei.
Currently Selected:
ZECHARIAH 3: MARIBSI
Highlight
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
