ZECHARIAH 1
1
Umpune Israelya Ukning Hungnanungei Ungpikur
1Darius'yei Krungchaan kum-khni hungtlungle, tlunchot tlung tanglarou, Iddo'yei cha napawa Berechiah'yei chanapawa, Thimkhui Zechariah'nung Umpuei tloulhangni yongbi asitoubi shunkur: 2“Umpune nai nutar-patar rapbei doura beimak malungkhakhou. 3Ngam heineri nangne yanungei shunlaka, ‘Thangwan-Shimleiyei Pu Umpune atoubi shunlei touri nani Keinungei kallenglhaklak, heiyanungri Keinekhi nanungei kallenglhakpirou,’ toubi Thangwan-Shimleiyei Pu Umpune paothutlei. 4Nari naiyei nutar-patar rapnaksine toumak, bongei waiyoubi Thimkhui rapne yanungei atoubi shunthutpikhou, ‘Thangwan-Shimleiyei Pu Umpune atoubi shunlei, touri nani asinungri naiyei chimmakna lam'rouwei mai khreithutbine, naiyei lhangaimak lhourouwei nani kallekthutlak.’ Heiya yaneri Keiyei shunya ninglhakhoumaklei,” toubi Umpune shunlei. 5“Asinungri naiyei nutar-patar raple Thimkhui rapri kourangachiawo? Heirou yarap heiri hi naimakne ringleihuiko? 6Heiya Keiyei shikrui Thimkhui rapya shunthutyerkur Keiyei tloulhangrap, heirou Chaylam rapya naiyei nutar-patar rapne chanthungmaknei ngamrou yaidoura klah-knang dawurkhou. Heirouri yani ukning hungbine kyun, ‘Thangwan-Shimleiyei Pu Umpune kaiyei touwurkhou lhourap hilthungni kaya klahra dayerrouwa toubine toupikur lhouroume.’ ”
Thimkhuini Sapuklha Rapya Kar'anbi Kmu
7Darius'yei Krungchaan kum'khniyei, tangla tlun chiple khat, touri Shebat tanglayei, tlaini somnile phalinirou Iddo'yei chanapawa Berechiahyei chanapawa, Thimkhuiwa Zechariah'nung Umpuei tloulhang yongbine atoubi shunkur: 8Masanung keine thiyei kheenrouri, thimi khatne sapuk mrao khat tungbine, phaitlaiyei heengyao hangra mayungbine klei heiwaya mulhakkur; heitoubi aiyei hillani sapuk mrao khatkhi, mrao-bungrang khatkhi, heirou khngoukhi mayungbine heiklei. 9Heirouri keine heikngai, “O keiyei Upawa, heirapri kounungeiyo? Heirou keikou tlou kallangkril Thangring heiwane keinungei loushun, ‘Sapukrap heiri kounungeiyo touri Keine neinungei mutpirou.’ 10Heirouri heengyao hangra mayungbi klei thimi heiwane loumallangbine atoubi kyun, ‘Sapukrap heiri tlaipangpal karyouni karwaichabine yilthinanungei toubi yaya yenmalhetkura.’ 11Heirouri yani heengyao hangrei mayungbi klei Umpuei Thangring heiwanung mallangbi loushun, ‘Kane tlaipang karyouni kyongle-kale karwaichabine yilthiwurla, heirouri thilak, tlaipangpal namma kyingni, ri daini mathrilbi leiwurchiya.’ ” 12Heirouri Umpuei Thangringne loumallangbi kyun, “O Thangwan-Shimleiyei Pu Umpu, Nangne Jerusalemei doura, heirou Judah'yei khukarthil rapbei doura yenralkur kum somret malungkhawurna douroukhi kounak tlani yaidoura kringpimakne leiheirouwo?” 13Heirou Umpune keikou tlou kallangrilkur Thangring heiwanungei lhangaiyei tlouni heirou malung damyernei tlou rapne loushunpikur. 14Heisitoubine keikou tlou kallangrilkur Thangringne keinungei loushunpi: “Nangne ungraochane shunthutpilak, Thangwan-Shimleiyei Pu Umpune atoubi shunlei, Keine Jerusalem'ya, heirou Zion'ya tanghakpani malungshipi. 15Heiya limdei rapne kying-nungkngaiyei klei heiwaya Keiri beimakne malungkhapilei; ngamri Keine beicha malungkhabi leiyeinung yani Keiyei thimi rapya heisi marhotpi. 16Heingammei Umpune atoubi shunlei, ‘Keine Jerusalem'ya kringpile kalhonne yenkallenglei, heiyei rilla Keiyei Cheemri hanui kallengni sabaangthurou, heitoubi Jerusalemei doura ram holmarkhena ruini thikyengbine taangmarkherouwa.’ ”
17Hanuikhi ungraochani paothutpithulak, “Thangwan-Shimleiyei Pu Umpune atoubi shunlei, Keiyei khukarthil rapri tangbaang-choubaangeirou; heitoubi Umpune Zion'ya malung damyerpithurou; heirou Jerusalem'ya hanui kallengni khalthutpithurou.”
Halchee Kar'ankmu
18Heirouri keimitni mangalthutbi thiyei kheenrouri, thilak, halchee phalitam kar'anbine mukur. 19Heirouri keikou tlou kallangkril Thangringnung keine heikngai, “Heirapri kou tounanungeiyo?”
Heirouri ane keinungei loushunpi, “Heirapri Judah'ya, Israelya heirou Jerusalem'ya khotbaiwurbi hulchekkur halchee rapme.”
20Heirouri Umpune keinungei hutshakhei tlangsha napung phalikhi mutpithu. 21Heirouri Keine loukngai, “Yarap heiri koutourou wathukko?”
Heirou ane loushunpi, “Halchee rapne Judah'ya khotchekyei kaalnung thimi hukhatnekhi yailu mangalthut manikhoumak, heiya yayari tlangsha rapne maniwurbi, heitoubi lim deirap touri Gentile rapne Judah'yei ramra chee mangalchabi khotchekwurkhou heiwaya namsundanungei wathukurame.”
Currently Selected:
ZECHARIAH 1: MARIBSI
Highlight
Copy
Compare
Share
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
