ROMIYA 1
1
1Chungthieng na ahra trongsan rou rillang ahalsa rouril Pol Khrista suuk kol hai thou wa.
2Ahra trongsan hi Chungthieng na apha eja amatienga rouphu ngei kolla saro eisa so ae, jiekka shi sha athieng rou chuhekta. 3Naha chu asanoupa ani arengpu Jisu Khrista maram ma ae. Amo chu David ngei kot sung hai thou wa don ae. 4Makolla athieng Chungthieng hekti jarra machunga Chungthieng asanaopa ae ta alok jaitha pe pi ah athi hai thou wa ring thou ae. 5Majar hana akha chu Khrista masarukka Chungthieng na tancha ahra akha keita rourilla akha chu jaty lim ma malmashi ngeita lamkai ah aril jui pi ah ngoiring ranga pe pi ae. 6Nahi Rom ma am nangei kom tol ae. Chungthieng na nangei ta Khrista Jisu hitta am ha rang kokkae.
7Chuna Rom ma am nangei Chungthieng na lungshit akha chu mamee mak chang ranga kok nangeita kei na nahi jiekka hla inge;
Ani Pa Chungthieng akha chu arengpu Jisu Khrista na adai hana lungshi thei akha chu adai ha pe shu oh, nangei chunga.
Riemma Niek
8Simlei lim na nangei ngoiring hi theipha sarukka masha ah kei Chungthieng ta, Khrista Jisu jarra dominge. 9Karilla am hi adiek takkae ti hi Chungthieng na kataranga ngir pi ah am meh, kathin kalung lim tolla asanaopa maramma ahratrongsan sui ah domma ka-am Chungthieng amo ae keina nangeita angeithei ah am meh ti hi Chungthieng na danga am meh. 10Apha chang honna keina kaniekka ka am chu, Chungthieng ahra mahal hana ngailea chu hangei ta an phao num minge. 11Rouram chu kei nangeita ehekta ri nunminge ha chu muihla lam tienga jaihra pha ah ratta am ranga saruk ja ha numimge. 12Hina karilna chu keina kom nangei na kom apha akha chakka kangoi ring na nangei hana nangei ngoiring na kataranga.
13Ka-u-kanao ngei oh nangeina angeitheipi oh, hachu apha eja tam keina nangei kolla phao rang ae halling kom ejongpa akha na hanna phao nea nonge. Kaphao num chu nangei karra akha chu adang jat ngei sunga shilung hlong pi nu minge. 14Rouram chu keina Grik akha chu jat adangei hana athei ngeikom theino ngei kom mani ae na mant donna aminge. 15Chuna sarakka Rom sunga ringa am nangei kolla ahra rou rillang hakjou no wa aminge.
Ahra Rouhana Jaitha
16Ahra rou sarukka keina ephao ajak nonge. Ngoiring lim ta sanpi ti hi Chungthieng jaitha ae masha ah Jihudi hana jat adang ngai. 17Maram chu Ahra rouna mee ngei chung matak mak hitta adiek mee ta muh ae: hi chu, athou hai thou wa atreem phao wa ngoiring. Athieng trongsan na ril hekta, “Chungthieng hitta adiek mee hana ngoiring jarra ring ange.”
Malmashi Ngei Lungmut
18Chungthieng hina lungshat hi thangwan hai thou ri ah pak tullu lu lim akha chu hrano malmashi ngei manina adiek hata dangpi no hanna am ngei chunga ae. 19Manita Chungthiengna aol pe ae, maram chu Chungthieng maram ma dang ranghi Chungthieng na manita laikai ti pi ae. 20Chungthieng na alei ram hi sak hai thou wa riphalou marat mathei akha chu atreem nei no majaitha hana athieng maringchang ton rine no ha makutsem ngei jar hana atun chu malmashi ngeina thienga rine so ae. Chuna maniha atun chu ngakpi rang am ni jo ae. 21Mani na Chungthieng ta dange chuti weta manina Chungthieng tah chu ajak atri num na ae. Akha chu riemnum no ae. Hana hutta mani ha chu lunghal theino ngei chakkae hana arukshal mani lung ha athiem na shihak ti ae. 22Mani na chu mani hi leima athei asing ae ta rilleh chuti weta mani ha chu lungmo ngei chakkae. 23Mani na amang am no Chungthieng ta mokkang hutta mani na amang ang sa malmashi mel mal akha ta ano lea awa akha chu ramsha akha chu avon na thingei ta mokkae.
24Chuna sharukka Chungthieng na mani lunga dit amut achor ae ranga akha chu mani akha lea akha ajak tuk ranga pe pi so ae. 25Mani na Chungthieng adiek hata murthei hitta silhlak so ae. Manina Chungthieng na sak ngeita tun hlou ae ah mokkae asa mitpu ta mokkanga akha chu atreem nei no wa dom mang hutta, Amen.
26Chuna sha rukka Chungthieng na mani chunga ajakpi pumna dit pi so ae, Hana nameinu ngei na kom mahousa ah namei apa hana ae phung shuk no wa adang tienga wulso ae. 27Hihekta apa ngei na kom namei nu ngei ta mani am hlak namei apa ta houphur weta sarmei kang hekta adi na mani apa na apa ta jahla thinga tukhlakka hina mani ae na amant na Chungthieng na mani hrano ae na jarra aol dandi pha ae pi.
28Rouram chu mani malmashi ngeina mani lung sunga Chungthieng hina adiek lungsing lungwar ha shi num no ae. amona manita hrano amunt ha peshu sa so ae. Chuna manina ae ngeino tullu ha manina hata ae so ae. 29Mani chunga hrano eheilim na shihak tri so ae, hrano karam meethat ashul ahal rouru ril akha chu mee rou ril 30Akha chu mani akha lea akha hrano tronghlak, manina Chungthieng mai ah atier tullu lu, ajak dangno akamram lokka mani na hrano lam tienga thing rang chak halla manu mapa rou kom jui no ae. 31Manina ephou lunghal theino mani saro eisa ngirra amno akha chu manina malmashi adangei ta ephao lungshi ringrei thei no ae. 32Mani na dange Chungthieng rouphun na hijongpa ah ringei hi athi pha phung shukkae ha chak no wa hi tullu lu ah rol malmashi ngei hitta kom hata ngei hlakkae.
Currently Selected:
ROMIYA 1: CHOTBSI
Highlight
Copy
Compare
Share
Want to have your highlights saved across all your devices? Sign up or sign in
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
