ROMIYA 2
2
Chungthieng Routreem
1Katonpi ngei oh mee adang chunga routreem chau meh? Chuna sarukka atu hal atu hal kom nangei ta ngakpi rang am no ae. Maram chu nangei na nangei routreem mee ngei ae hekta ae chou ae, nang kom nathei ah aol pha ah am che ae. 2Chuna hijongpa tullu hata ae ah am sha ngei chunga Chungthieng na routreem ae juija adiek takka ae ti hi ani na dange. 3Hana sarukka hijongpa tullu hata ae ah am weta mee adangei ta routreem ae ah am hana nangei Chungthieng routreem rungnie ah nangei na ae hlan ang ae ta halla am chou? 4Ano lea ejongpa nangna Chungthieng chu lungshi thei ae akha chu dongthei ae Chungthieng mahrat hana lung hlong ranga lamkai pi ae ti hi dangno chou ae? 5Chutiweta nalung hir hana nathei chakka Chungthieng na alungsha ah diekka routreem mang nangei ta lella aol ha soma ma ah am che ae. 6Ropuram chu Chungthieng na mee limta ma tullu lu na nujuija lommant peh ange. 7Malmashi ahre na chu ahra tullu hata ae ah thi lou ringchang jonga mahung majai ta ajak atri ae, Chungthieng na mani ta samla ringchang pe pi ange. 8Mee adang ahre na mathei chak taranga halla adiek tullu ta ngeinum no wa hrano tullu nujuija am manita chu Chunthieng na malungshat ha machunga bun nange. 9Hana juija hrano tullu lu ngeina aol ana pha ange masha ah Jihudi hana jat adang ngei ae. 10Chuti weta Chungthieng na ahra tullu lu lim ta chu ajak atri mahung majai akha chu adai ha masha ah Jihudi hana jat adang ngeita pe ange. 11Rouram chu Chungthieng na meelim ngeita eichang ei oui nei no wa akha chakka routreem ae ange.
12Jat adang ngei na chu Moses hina rouphun am no ae chuna manina rouphun hai thou wa pak tullu lu ah mange. Hana Jihudi ngeina chu rouphun am meh chuna mani pakkha rouphun na routreem ange. 13Chuna rouphun hana thei hana Chungthieng hitta mee ngei ha diek pi ah no ae chuti weta tullu chunga ae ngei ha ae. 14Jat adang ngeina rouphun ha am no ae chuti weta ehalkom mani kom mani phun am meh. Moses rouphun ha am no hal kom. 15Mani semshak hana ri pi ae manilung sunga jiekka am sa rouphun ha hana mani lunghal hana kom na hi chu adiek takkae ta ri pi ae, hana mani lunghal na ejong juija manita neinunt pe ae ejong juija manita ngakpi ae. 16Chuna ahra trongsan hana anu juija keina nangei kolla rourillinge, Chungthieng na Jisu Khrista jarra meelim athup lung halim ha routreemni rungnie hek ti ange.
Jihudingei Lea Rouphun
17Nangei chu alo ti meh? nangei thei chakka nangei n a Jihudi unge ta hal chou ae; nangeina rouphun hana beija Chungthieng maram ma lokchok ti chou ae. 18Chungthieng na nangeita ae pi num madit ha nangeina dange, adiek hi halne rang rouphun hai thou wa chu pha chou ae. 19Adiktakka nangei na mitcho ngeita lamkai anga ae hana nangei hi athiem ta awar chang anga ae. 20Akha chu lungmo ngeita chupi takpi anga ae dangno theino ngeita kom. Nangei kolla adiek hana lungsing lungwar lim ha akha chu rouphun na nangei chunga shihakta am meh. 21Mee adang ngeita machupi ha nangna natakta chu alowa natakta chu pi no che? Hana malmashi pot ru no oh ta nachupi ha nang chu ru wa am che? 22Nangna meenamei lalno oh narilha nangchu lalla am ma che? Kutta sem hlawang ta atierra am nangna athieng inn sunga pot ru wa am ma che? 23Nangna Chungthieng minga rouphun ha kani kolla am meh ta lokchok na am ha nang na rouphun jui num no wa Chungthieng minga ajak tuk pi che? 24Jiekka shi sa rou na rillea, “Jihudi na ngei sarukka jatadang ngei na Chungthieng ta hrano rou trong shukkae.”
25Ejonga nangna rouphun hana rilla shi jui ta lea asar natan ha hra ae hana ejonga nangna rouphun hana ril jui no lea asarnatan ha tan no hek ti ae. 26Ejonga asratan no jat adang ngeina rouphun hana rilla si ha jui lea chu Chungthieng na mani ha asartanngei hekta hallang no meh? 27Chuna Jihudi nangeita jat adang ngei na neinunt pe ange rouram chu nangei na rouphun hata jui no ae. Ajuirang jiekka am halkom akha chu asartan halkom. Chutiweta mani chu pum ma asartan no hal kom mani na rouphun hata hrabak ta jui ae. 28Athieng Jihudi atu meh thienga ah sartan ha? awao wa asartan hana Jihudi apa ha ano ae. 29Hata hella athieng Jihudi ha chu asunga Jihudi changei ha ae, ha chu mani lunga asar tan shu so ae Chungthieng muihla hana tullu lu akha chu jieksha rouphun haithou ae. Hajong mee ngeiha mee kol haithou no lutta Chungthieng haithou adom pha ange.
Currently Selected:
ROMIYA 2: CHOTBSI
Highlight
Copy
Compare
Share
Want to have your highlights saved across all your devices? Sign up or sign in
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
