RUIHNGEI TULLU 28
28
Malta Ah
1Kangphal hanna kani tung shutakka chu na ha tuijai mullon Malta ae ta dang shange. 2Hana am mee ngei ha leima tam kani taranga ahra mee ae, ru kom shurra thou wa leima dai ah wakpa chu manina sharmei holla kani ta ariemtuk pi ae. 3Pol na thinghu akha huppa Sharnei chunga hol then na arul akha kom tolla Pol na kalla akut takka mant na shi so ae. 4Hana am mee ngei na Pol kut chunga banga am arul ha rijuija akha lea akha ril hlakkae. Amo hi meethat mee ange ephao leng mang rang am no ae. 5Chutihalkom Pol na chu arul ha ephao khudong thi am no lutta sarmei shonga denga hla so ae. 6Mani na hal hlak am chu amo hi hling hanga edang dang hou no wa tu wa thi ange chuti weta apha sotta anna am nutienga ephao asui angam am no lutta am pa chu mani lunghal ha hlonga ril, “Amo hi hlawang range!”
7Amunt hana thou aram alah no lutta rammunt hana chungtekti offisar Publius maram, amo na kani ta ringrei ngeipi ah rungnie na thum hi makolla inn tungpi ae. 8Publius mapa chu asiek thou wa akha chu ekthi eknar che ah ana ah kot chunga jalla am meh. Hana Pol na majal na shunga lutta makut shi weta nie pa chu dam so ae. 9Shukka am hina sharukka theijui mullon na am ana lim na phao wa adam tul shuk kae. 10Mani na kani ta tui lampi athinga darkar am lim pa ha ariem ma pe pi ae.
Malta Haithou Rom
11Hla thum takka kani na Alexandriya hai thou wa kung holla thing thou songe, amee dang na chu, “Aphier hlawang ta kokke.” chuna phalbi tem pa chu hana am songe. 12Hana Syrakuse ah tunga rungnie nathum hana am phur unge. 13Amunt hai tho wa kani na Rhegium hupi tung songe, hana mathangpa rungnie ah chu natak hai thou wa thirang rang thou sier ra kani na rungnie nani Puteoly ah am munge. 14Hana kani na khrista ta ngoiring mee tuk hlakka mani na kani ta hapta akha am ha ei oh ta rilla hana kanina Rom tinga wa songe. 15Rom ma am ngoiring ngei na theipha ah Appius hulokka kaithilla hai thou wa tuk hlakka mani ta Pol na ri juija amo na Chungthieng ta ariemma dom ma ehekta thanum thathou pi ae.
Rom Ma
16Rom ma kani tung juija chu Pol hi mathei chakka am rang ngei pi ah ra shiphai ngei na amo ta hakka am.
17Rungnie nathum takka Pol ta hana Jihudi ulien chang ngei na amota kokkae mani na rachun juija amo na mani ta ril, “katonpi Israel ngei oh, ani nuleapa ngei talit tamang ta ephao hrano ka tullu lu na am nonge, keita Jerushalem raen-inn na shi weta Rom ma pe ah sha ae. 18Mani rou sai nutienga Rom ngeina keita hla num so ae, rouram chu manina keina thi ah ngei tullu ephao ae no ae ta dang sha rukka ae. 19Chutiweta Jihudi ngei na ngeinum no wa kei hi rengpa kolla thing rang kalla rilla, ka mee mak ngei kolla kamaral am no hal kom. 20Hana sharukka keina nangta ri hlak ranga nie ah nang hitta atun hi trong hlakka am minge. Hina chaknowa routakka atun thirling huppa ka-am hi Israel ngei na makolla am lungrang hina ae.
21Mani na amo ta ril, “Kani kolla Jihudiah hai thou wa narou hana sharukka hrano mani jiekka hla na kom am no ae. Hana hai thou wa narou ron na phao mee kam am no ae. 22Chuti halkom kani na nakol hai thou wa hana sharukka roulam ha thei num munge rouram chu amunt changhon mee ngei na atun nangei abom ta anda na am meh.”
23Chuna pa chu mani na Pol hitta rungnie akha lep hlakka mani na Pol am na munt na ehekta atam mee ngei na bomtul ae nituk haithou jantieng phao mani ta Pol na Chungtheing rengram ma rourilla rouphu ngei lea Moses na pek roukung hana maram ma tronga Jisu minga amo na manita lung hlong rang ae. 24Ahre chu lung hlong tol so ae chuti weta ahre na chu ngoiring nea no ae. 25Chuna pa chu mani mashel ngei hlak no wa hran hlak so ae, Pol na rou hi ril shu takka. “Eja ah hoi ah mo nu nangei ulien chang rouphu Isaiah kolla muihla athieng na machunga rou ril pi.
26‘Thing weta mee ngei kolla rillo
nangei na thei ja, thei ja, ephao dang no ae;
nangei na anna, anna ri pha no ae,
27rouram chu na mee ngei lung shenga
atal pi sho ae hana mani kur theng so weh,
mit kom sheng so weh.
Chun no lea chu mani mitna ri ange, mani kur kom thei ange,
mani lungrang nakom dang nea ange
hana mani na kolla lut ang, Chungtheing na ril,
akha chu keina ta dom pi ange.’ ”
28Pol na hita tim: “Nangei na dang ang chu Chungthieng hina aring ketlo hina rou hikom adang jat kolla lha piso ae. Manina thei ang nge!” 29Pol na hi rilsu takka, Jihudi ngeina mani mashel asih malom rou vuk lhakka thingso.
30Shum pea ah ma am na ah Pol na kum ani am ae. Hana makolla phao limpa ha Pol na riemtukke. 31Amo na Chungthieng rengram rou akha chu reng Jisu hina roulam ah ati alao am no lutta reng rou sui ae.
Currently Selected:
RUIHNGEI TULLU 28: CHOTBSI
Highlight
Copy
Compare
Share
Want to have your highlights saved across all your devices? Sign up or sign in
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
