RUIHNGEI TULLU 25
25
Rengpa Kolla Pol Na Roudoh Na
1Festus na Rom hana matung waitak rungnie nathum ma Kaisariya hai thou Jerushalem ma thingso. 2Amunt hana chungtekti thiempu lea Jihudi Ulien changei na Pol ta maral am meh ta mani na Festus kolla kalla rillea. 3Mani na Festus kolla Pol hi Jerushalem ma hlonga wak rang nga hlem meh, rouram chu mani na lam pi oh Pol ta that rang nga hakka am meh. 4Festus na sange, “Pol hi Kaisariya Raen-inn shunga shi phur ah kei katak makkom hana harra lea ange. 5Chuna nangei ulien changei ha kei hitta Kaisariya ah thing ha ei oh chuna ejonga spa hana ejong aral tullu lea chu maral pe wa oh.”
6Festus na rungnie narit ano lea nasom phao hana mani hitta am pa weta Kaisariya ah thing ha so. Hana mathangpa rungnie ah amona phomlu wa ong weta Pol ta routreem rang ruishanga rui ah shukpi so. 7Pol na tung juija Jerushalem hai thou phao mani na ahul tunga ngirra angir am lou rou eja kalla mani na ril. 8Chutiweta Pol na ril: “Keina Jihudi ngei roukung ta ephao aral ka ae na am no ae, hana mokna inn ta kom hana Rom ma ane angam ngei ta kom.”
9Chutiweta Festus na Jihudi ngei lungshit pha rang sha rukka Pol kolla rou sai. “Nang na Jerushalem ma thing weta mani na nang ta pek maral lim hina taranga hana ka mai kunga ngir nea ang cha meh?”
10Pol na ril, “Kei katak makhi Rengpa mai kunga routreem rang ngirra am minge, kei na ejongpa aral tullu lu so ae ta amunt hana rui ah thing anga che, nang natak mak na hrabak ta nadang sa so ae. 11Ejonga kei na roukung hata aral tullu lu lea chu kei hi athi dandi pha halkom ngei inge, hana taranga keina keita sanpi rang rillang nonge. Chutiweta ejonga mani na keita pek maral hi adiek anolea chu, atu akha na kei hita mani kolla pe pi no oh ta rengpa kolla roudoh ah aminge.”
12Festus na hloukal ngei hitta waishi takka ril, “Nangna Rengpa kolla roudoh shou chu nangna Rengpa kolla thing you oh.”
Agripa Lea Bernice Maikunga Pol
13Apha atante nutienga reng Agripa lea Bernice na Kaisariya ah Festus ta ariemtuk pek ranga thing. 14Mani na rungnie eja am ha waitakka Festus na Pol hina rouram ma reng maikunga sui so. “Felix na raen-inn shunga houphur spa akha am meh; 15chuna keina Jerushalem ma kathing juija Jihudi ngei chungtekti thiempu ngei lea ulien changei na maral hi leima rilla amota dandi pek rang kakolla rillea. 16Chutiweta mani ta keina rilla hou inge, kani Rom chu maral am mee hi mamaral am meh ta ril ngei maikunga matak na marou ril malim ma chu maral non ngei kolla pe ti chu ae ah hang no ae. 17Chuna mani na hina phao juija kom mathangpa ah keina phomlu chunga onga spa hatta ruishanga rui lut ranga rou pe inge. 18Hana maral pe ah am ngei ngir thou jui ja chu, mani na amo ta maral hrano pe nea no weh, kahal ka am ha. 19Mani lim na amo lita roukhet hlak ah mani dramo hana rouram ma, akha spa akha aming na Jisu athisa chuti weta Pol na chu ring so ae ta ril. 20Keikom alo ta hi rouram lim hi tuk nea weta roungir ang meh ta am ma kei na Pol kolla sa inge, ejonga amona Jerushalem thing weta maral pekha dangpi numinge ta rillinge. 21Chutiweta Pol na roudoh chu; karou ram hi chu Rengpa na shu pi shu oh chuna kei ta hakka hatta shi pi oh. Chunapa chu keina amo hi Rengpa kolla kahla malim chu hakka am rang rou pe inge.”
22Agripa na Festus kolla ril, “Kei katak makna makol hai thou wa thei num minge.”
Festus na sang, “Atukka nangna marou ha ngei jou oh.”
23Hana nani hu warra chu Agripa lea Bernice na ehekta ahoi ahra ajon ashak hit akha chu lupi hana loktekti shiphai ngei hitta tulbom na in na lutta. Festus na Pol kom rui ah lut rang rou pe so. 24Festus na ril, “Rengpa Agripa akha chu amunt hina kani hitta am ha nangei lim ta, anno na spa hi Jihudi ngei ta anda ah amunt hina akha chu Jerushalemma rolla mee ngei na kakolla maral pek ya shi hi mani rilna chu amo hi ashotta ringpi shi ngei no ae. 25Chutiweta keina chu amo hi athit phao wa dandi pek rang aral tullu chu makolla ephao tuk nonge. Hana amo na Rengpa kolla mathing rang rou nie sou chu, kei na amota Rengpa kolla hla ranga kalung ngir sange. 26Chuti halkom kei na chu maral mak hrabak ta Rengpa kolla jiekka hla rang kom ephao tuknonge chuna tarang sharukka kei na nangei maikunga akha chu rengpa Agripa halla rui ah shukkinge. Hana nangei na rou sai nujui rou ahre tukna leng keikom jiekka hla rang rou pha ange ta hallinge. 27Chuna kahalla chu maral ekom am no mee ta raen-inn shunga shi chu maram am no ae.
Currently Selected:
RUIHNGEI TULLU 25: CHOTBSI
Highlight
Copy
Compare
Share
Want to have your highlights saved across all your devices? Sign up or sign in
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
