RUIHNGEI TULLU 26
26
Agripa Maikunga Pol Na Tomh Na
1Pol kolla Agripa na ril, “Ejongpa rou ril num cha mo naril num ha rilla ngei ange.” Pol na aban tieng thou weta hita rou ril thou so.
2“Rengpa Agripa! Jihudi ngei na keita pek maral lim hina sharukka awoni namai kunga karil shuk rang apha kapha hina leima ariem minge. 3Nangna Jihudi ngei talit tamang lim kom hrabak ta dang che ae. Chutihalkom keina nakolla mokka am minge karou ril te hi dongthei ah ngei pi oh.
4“Ka-unga te hai thou wa kei na alo ta ringa hang mo ti ha Jihudi ngei na hrabakta donge. Manina karam shunga ahalpa karingchan lim hi dange, hana Jerushalem ma kom dange. 5Mani na apha chang honna dangne ae, ejonga mani na dangnum ma chang an mum lea chu athou hai thou wa kei chu leima kal dramo. Pharisis ngei abom ma tolla hang inge. 6Chuna atun hina keita chang an rang nangei mai ah ngirra ka-am chu, nungei pangei Chungtheing kolla saro ei ah kapha lungrang hina sharukka ae. 7Na hi makkae ani jaty asom ani na kom pha ange ta am asha ha ae. Manina Chungtheing kolla soun jan nei no wa mokka am hi. Hina lungrang ka-am hina sharukka chak sha ae awoni Jihudi ngei na maral pe ah ahoi ahra namai kunga ngirra ka-am hi. 8Chungtheing ana athi hai thou ring pi lea chu na ha ta alo wa nangei na ngoiring num no wa chou?
9Keina kathei chak hallinge, Nazareth hina Jisu maram ah keina maituk hlak kang inge ae. 10Na hi mak Jerushalem ma kei na ae ing nge. Chungtekti thiempu kakolla roupek nujui ah akha chu Chungthieng mee eya raen inn ah shi ing. 11Synagog ka keina manita apha changhon na aol-ana akha chu mani ngoiring ta nulea rang ae ing nge. Manita kalungsha hei shul ah keina adang hupi ah kom aol-ana pea thing ing ae.
Pol Na Malung Hlong Na Rouril
(Rui. 9:1-19; 22:6-16)
12‘Na maram sharuk hina keina Damaska ah thing ing ae, chungtekti thiempu na keita rou pek sharukka. 13Hana nisoun jai makka kalampi ah keina ehekta awar siemni ta hella war akha na wantieng hai thou tem ma junga keita ahul tunga jem ma ri inge, hana kei hitta thing ha mee kom ammeh rengpa oh. 14Kani lim pa alei chunga tu hap songe. Hana keina Ebriya tronga sanrol akha thei inge, ‘Saul, Saul! Ejeranga nang na kei ta aol ana pe ah che? aling ta nakae ah nakou chu na ange dang no che?’ 15‘Reng ngo atu ah cha meh nang hi?’ Hata kashai pa chu, arengpu na sange, ‘Kei Jisu inge aol ana napek ha. 16Hana nakae ah thou wa ngirro, namai kunga kashuk chu nangta kakor hap rang nga singe, awoni kei ta nari hi mee adang kolla naril rang nga ae, hana anutieng taranga kom keina rillange. 17Keina nangta Israel ngei kolla akha chu jat adangei kolla kahla juija nangta san nange. 18Nang na mani mit warpi ang nga ae, athiem hai thou awar akha chu saitan kutchung hai thou wa Chungtheing am na chuna mani na keita ngoiring hana jarra mani pak shilpha ange, hana mani kom Chungtheing ahal sha sanao ngei am na ah am tollange.’
Pol Tullu Lu Na Rou Ril
19“Chuna Rengpa Agripa, wanram ma kari pha ha keina juino ae nonge. 20Masha ah Damaska lea Jerushalem hana Juhudia akha chu jat adangei am na keina rourilla mani pak tullu lim hou wa shilung hlonga Chungthieng am na phao wa mani hi shilung hlong sa ae ta meena dang shu oh. 21Hina rouram ma mokna inn shunga ka-am lei ah Jihudi ngei na kei ta mant na that tang ae ah ae. 22Chutiweta Chungthieng na keita sanpi jarra awoni makhi asin akha chu nang hekti alok eja maikunga ngir pha ah karou hi ril pha nea inge. Na karillim pa hi rouphu ngei lea Moses na shukkange ril hitta akha rukkae. 23Na ha chu Messiya hi aol ama danga athi hai thou wa masha ringthou mee chang ange. Jihudi ngei lea jat adangei kolla samla ringchang hina awar rou ril rang sha ae.”
24Pol na hijongpa rou ah maril juija Festus na makolla au-wa hla ae, “Pol nang hi wet sho che ae! Leima tam nadang nathei hana nangta awet wul pi so ae!”
25Pol na sange, “Kei wet nange rengpa oh, Adiek hana rou ha dang ing weta rilla singe. 26Rengpa Agripa! Kei na ati am no lutta nakolla karil shuk nea hi, nangna hilim hi dang hap sha so ae, keina ngoiring inge nang na meelim changhon na dangpi ange, ha chu hina rou wa ephao athup am no ae. 27Rengpa Agripa, nang na rouphu ngei rou ha ngoiring che meh? Keina dang inge nang na ngoiringe!” 28Agripa na Pol ta ril, “Na apha atante shunga nang na keita khristian chang pi ang ae ah che?”
29Pol na sange, “Apha ashot asai nei no ae” “Chungthieng kolla ka prathana chu nang akha chu awoni karouril thei meelim na thirling rui na jem ma shi chak tol no wa kei hekti mee hangpi num minge. 30Hana Rengpa, Governor, Bernice akha chu adang meelim ngir thou hapso. 31Meelim thing shu takka mee akha na akha ta ril hlakso, “Na spa hi athi ngai dandi akha chu raen-inn kom shi rang ephao maral am no ae.” 32Rengpa Agripa na Festus kolla ril, “Na spa hi rengpa kolla mathing rang rou nie no lea chu hla ah kom ngei so ae.”
Currently Selected:
RUIHNGEI TULLU 26: CHOTBSI
Highlight
Copy
Compare
Share
Want to have your highlights saved across all your devices? Sign up or sign in
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
