RUIHNGEI TULLU 24
24
Jihudi Ngeina Pol Kolla Maral Pek
1Rungnie ranga waitakka chungtekti thiempu Ananias na Kaisaria ah roukung ocha aming na Tertullus akha chu ulien chang ahre hitta thing so ae mani na Felix mai ah Pol hina maral lim ha ril shukso. 2Chuna Pol ta inn shunga kokka, Tertullus na maral pekkang lim hitta ril thou so:
“Nahoi najaihra ha! Nalungsing nalamkai na kani ta apha sotta adai pha unge. Akha chu kani ramma darkar ui lim nangna tharra sem pi che ae. 3Apha chang honna akha chu eheilim ma kani na leima riemtuk unge, akha chu kani na nangta leima lunglutta dom unge. 4Napha hi keina ashotta kom la num nonge chu halkom tien nang na lungshi ringrei ngei oh kani roulam te hi chu lungshi pi ah thei pi oh ta rilla am minge. 5Spa hi ehekta hrano tullu lu mee akha chu hrano shukpi mee ae ta dang songe. Amo na Jihudi ngei am na shimlei chung limma jetta rolla Nazarene mee ngei hina lamkai mee ae. 6Hana amo hi ani mokna inn kom mut pi sharukka kani na amo ta mant na unge. 7Chutiweta lamkaipu Lysias na kani am na phao weta athat amant karra amo na kani kut chung thou rui ah thing nga ae. 8Ejong nang na spa hitta rou sai ta lea chu nangna amo hita kani pek maral hi hrabak ta dang ang che ae.” 9Jihudi lim na rachun ha weta maral pek lim hi adiek takkae.
Felix Maikunga Pol Na Tomh
10Governor na Pol trong shuk rang rourilla, Pol na ril.
“Kei na dang inge nang hi akum eja shotta na yati shunga routreem ah am meh ti hi, chuna keikom leima ariem minge namai kunga kangir pha hi. 11Nang natak makna dang ang che ae kei na Jerushalem ma rungnie asum ani hella lut ta mok thinge ti ha. 12Mokna inn na Jihudi atu akha na kei hitta trongjet hlak am no ae, akha chu Synagog shunga hana adang hupi ram munt na kom pe nea ang no ae. 13Chuna mani na keita ephao wa kamaral am meh tina rou ha, mani mang mo ae. 14Kei katak na nakolla diekka pe ah aminge kei chu ani nu ngei pa ngei Chungthieng ta mokka am minge mani ril hi adiek ano ae hana keina Moses roukung jieksha lim kom hana rouphu ngei abai ehei lim pa ngoiring inge. 15Kei kom mani na Chungthieng kolla am lungrang hekta am minge ha chu, ahra mee kom hrano mee kom meelim hi athi hai thou wa ringthou ange. 16Chuna sharukka keina katak hi Chungthieng akha chu mee ngei mai ah apha chang honna kalung hi thieng wekti num minge.
17“Akum eja Jerushalem hai thou wa shukka thing nga, hana ka-u-kanao ngei kolla sum ahre te lah ing weta kat thuk tikta keina hana thing inge. 18Hata mokna inn shunga thiengpi na tun hlou shu lim ta ka-am lei ah mani na kei ta tuk hlakkae. Hana apha ah wairul riha bom tul kom am no ae hana ephao kom hrano shuk no ae. 19Chutiweta Jihudi ahre Asia ram hai thou phao ngei na chu mani matakna namai kunga phao num meh akha chu mani na kei ta ejong maral pek num ha ril num meh. 20Ano lea hina am spa ngei na rouril abom ngei mai ah kangir lei ah kamaral tuk lea chu ril shu oh. 21Mani maikung nga kangir lei ah mani ta karil rou hite chak chu am meh, ha chu awoni nangei na athi ngei hi ringa thou ange ti hi ngoiring ngo ta chu rillinge.”
22Chunapa chu Felix na roulim hi hrabakta mathei madang shu lou takka amo na ril, “Lysias ah lamkaipu jung juija kei na narou hi treem pi tikkae ta trongsan pe so. 23Amo na Pol ta hakka offisar ta hrabak ta hak rang nga rou pe so. Hana amo ta aol ana pek no rang akha chu atonpi ngei na madarkar am lea chu pek rang nga ril so.
Felix Lea Drusilla Mai Kunga Pol
24Rungnie ahre waitakka Felix na anamei Jihudi Drusilla hitta phao wa. Amo na Khrista Jisu hina ngoiring na rou ngei num ma Pol ta rouril rang nga kok pi thinge. 25Hana Pol na amo hitta ahratna rou hana matak na matakta mant na shi nea na akha chu phao ang routreem rungnie hana taranga maril juija Felix ati hai shulla ril, nang atun chu thing jou oh, keina kapha pha juija nangta woiha kokkange. 26Hi hrit munt ha ah mahal chu Pol na makolla sum pe ang range ta kaom hallea. Chuna sharukka amo na Pol ta apha chang honna koka wari sui num meh.
27Kum ani waitakka chu Parcius Festus na Felix hut shilla Governor chang so ae. Hana Felix na Jihudi ngei dom pha rang nga, Pol ta Raen-inn shunga hata houphur so.
Currently Selected:
RUIHNGEI TULLU 24: CHOTBSI
Highlight
Copy
Compare
Share
Want to have your highlights saved across all your devices? Sign up or sign in
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
