RUIHNGEI TULLU 17
17
Thesolonikiya Ah
1Pol lea Silas na Amphipolis akha chu Apollonia tieng nga Synagog am na Thesolonikiya ah phao so ae. 2Pol na matinga ma ae hekta Synagog ka thing so. Hana Sabbath woithum tolla mee ngei hitta amo na leima hal hlakkae. 3Jieksha rou ha amo na mani ta ril, sanpipa na aol ana dong weta athi hai thou wa ring nga thou ange, “Na Jisu hina rou ae nangei kolla karilla ka-am,” amo ae sanpipa ha. 4Mani kar shung nga ahre na chu lungkim ah Pol lea Silas nu jui tolla so ae; chuna chu hekta namei ngei akha chu Grik wairul ri na nakom Chungthieng ta mok so weh.
5Chutiweta Jihudi ngei na chu anarra abom akha semma lam hou hai thou wa mani na hupi shung nga lutta Jason inn na Pol lea Silas jong nga tuk lea chu manui ta meelim am na rui ah shukkang hal. 6Chutiweta mani na jong nga tukno pa chu Jason akha chu ngoiring ngei ta hupi hana ane angam ngei mai ah rui ah shukka rillea, “Na spa ngei hi ae amunt chang honna ollang pi hi! atun chu mani hi ani hupi ah tung so ae. 7Hana Jason na ma inn shung nga mani ta shi ah, mani na ani arengpa hina roukung lim kui pi so ae mani ril na chu, “Rengpa akha am meh amo ha chu Jisu ae.” 8Rou hi mani na thei juija hupi shung nga offisars akha chu meena aol ana peso ae. 9Hana ane angam ngei na Jason akha chu adang ngei ta sum pe weta mani ta hla rang ae ah thingpiso.
Berea Ah
10Hana yanting anu jui len ta ngoiring ngei na Pol lea Silas ta Berea, ah hla so. Mani na hana tung ing len Synagog ka thing so. 11Hana am malmashi ngei hi Thesolonikiya am mee ngei ta lella lung thieng nge, mani na wontam tuiral hekta rouril ha ngei num meh, akha chu rungnie chang honna Pol na ril rou hi adiek tak mo ta jieksha rou hi minna halla an nea. 12Leima tam mee ngei na ngoiring ae, akha chu Grik namei apa ehekta ajak ati shak mee ngei na kom ngoiring ae. 13Chutiweta Thesolonikiya am mee ngei na Pol na Berea ah Chungthieng rou rilla am meh ta rou thei ah. Mani na hana thou wa ah abom akha leima sem numma sem so ae. 14Hana sharukka ngoiring ngei na Pol ta hla so weh; chuti weta Silas lea Timothi chu Berea ah am phur so. 15Pol hitta thing ha pa na Athen phao tha thing shu wa amo na Berea ah lea sier so ae. Hana Pol na makolla rilla hla ae, ngei lea jui Silas lea Timothi ha rang nga ka am na tung pi num minge.
Athens Ah
16Pol na Athens ah Silas lea Timothi ta hakka am lei ah, hupi hi kutta sem hrairui ta mokka am meh ta dang pa chu leima alung hoi ni jo weh. 17Chuna Synagogka amo na Jihudi lea jat adang Chungthieng ta mokka am ngeita min na hal hlakkae. Hana meelim thing na lam chung nga rungnie chang honna hal hlak kae. 18Epicuria lea Stoic thou wa ocha ngei na kom makolla rou-wor hlakkae. Ahre na chu sai, “Na eko dangno mee hina ejong pa rou ril num ma mo nu?”
Ahre na chu sang nge, “Amo na ram adang ngei hlawang hina rou ah trong nge,” rouram chu Pol na Jisu ringthou na rou ril sharukka. 19Chuna pa chu mani na Pol ta hupi hana rouril ngei mai ah rui ah phao so. Hana Areopagus na ril, “Kani na dangnum mung nge ejongpa mo atharra nachu natakpi ah na am hi. 20Nakolla kani thei pha ahre hi athar so ae, chuna hana rouram ma alo ti mo ti ha dang num munge.” 21(Athens hupi ramma am meelim akha chu ram dang nga phao ngeina mani apha lim, ma am na ah am ha weta routhar lim ha ngei ah am num meh.)
22Pol na hupi rouril ngei mai ah ngir thou weta ril, “Kei na Athen na am nangei lim hi eheilim ma dramo chel chak kae, keina ri pha inge. 23Rouram chu nangei hupi ram shung hina anna karol juija nangei mok na amunt chang honna hita jiekka shi ri pha ing nge maicham hana, ‘Amel dang no Chungthieng ta’ hata nangei na mokka am. Nangei na atu mo dang no holkom naha ae, atun nangei kolla karilla ka am. 24Shimlei awan akha chu eheilim pa sem pa chu Chungthieng amo ae, amo na malmashi ngei na kutta sem inn shung hana am no ae. 25Chuna mataranga ani na mabak ma enn rang tullu lu ang darkar am no ae, rouram chu ani ringchang kom hana sorhol kom akha chu eheilim pa hi mapek chakkae. 26Spa akha hei thou wa shimlei ramma meering chang lim pa majarra aring pha pi so ae. Amo makna shimlei ah ringrang apha acha ah sem pi ae hana mani na hoi amunt na ring ang mo ti kom sem shu so ae. 27Amona hi tullu lu sharukka mee ngei na amo ta jong ang nga ae, hana miingeina amota jong jui ah tuk shu oh. Amo na ani lim am na hai thou aram la ah am no hal; 28ani ring nga am na lea, ling nga am amunt hi makol hai thou chakkae, ‘Atu jong nangei shung nga na ril chu hekta,’ ‘ani hi masanao ngei chakkae.’ 29Chuna ani na Chungthieng sanao chak sou chu ani hi sona rupa akha chu alung takka malmashi thei shing na shak chang ang no ah ae. 30Amating dang no lei chu Chungthieng na an pi so ae, chuti weta atun chu amo na amunt chang honna mee ngei na lung hlong rang nga trongsan pe pi so ae. 31Rouram chu amo na shimlei hi mahal mee ha jarra nahanie chu routreem ae ang nge thieng nga, amo na meelim ta dang rang nga athi hai thou wa ringthou pi so ae!”
32Athi hai thou wa ring thou ae ta Pol maril juija ahre na chu nui sho na chang pi ae, chuti weta ahre na chu hana roupham ma woiha lea ah kanita ril pi oh theinum munge. 33Hana makka Pol na rouril ngei ta hou phurra thing so. 34Malmashi ahre na chu Pol nujuija ngoiring so. Mani shung hana Dionysius Areopagus abom shung nga akha hana namei shung nga na Damaris, akha chu atam adang ngei kom tol so ae.
Currently Selected:
RUIHNGEI TULLU 17: CHOTBSI
Highlight
Copy
Compare
Share
Want to have your highlights saved across all your devices? Sign up or sign in
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
