RUIHNGEI TULLU 16
16
Timothi Na Pol Lea Silas Hitha Thingso
1Pol na Derbe akha chu Lystra ram ma thing nge, hana khristian changa am aming chu Timothi manu ha kom Jihudi khristian ae, hana mapa chu Grik kae. 2Lystra lea Ikonium ma am ngoiring ngei na Timothi ta ariem ma trong thou pi ae. 3Pol na Timothi hitta thing ha num meh, Rouram chu hana am meelim na mapa hi Grik mee ae ti dang jarra amo ta asar tan pi ae. 4Manina hulok eja lal la thing nga ngoiring ngei kolla Jerushalem ma ahalsha rui lea ulienchangei na jui ang rou lim ha rilla hou ae. 5Chuna pa chu abom lim na naha, naha ngoiring ratta hang nga rungnie changhan na masing hella hange.
Troas Ah Pol Ri Mang
6Asia ram tieng nga Phrygia akha chu Galatiya ah thinga mani na ephao ahra trongsan ril phur no ae, Rouram chu muihla athieng na mani chung nga rourillang pe no ae. 7Mani na Mysia ram munt tung jui ja Bithyniya ram shung nga lut numt meh, chuti weta Jisu muihla athieng na mani ta lut pi ni jo ae. 8Chuna chu mani changtieng nga am Mysia ram tieng nga Troas ramma thing so ae. 9Nani jantieng nga Pol na mamang nga Mesedoniya mee ngei na ngir thou weta makolla ril, “Masedoniya ram tieng nga phao weta kanita sanpi ri oh!” 10Pol na mamang hi ri shu len Mesedoniya ram ma thing rang nga sem sha so ae Rouram chu Chungthieng na hana am malmashi ngei ta ahra trongsan ril ranga kok sho ae.
Philipi Ah Lydia Lung Hlong
11Kani na kung chunga Troas ram haou wa Samothrace ajai ah sam ma thing nga na mathang rungnie ah chu Neapolis tung so. 12Hana kani na Rom ngei am na akha chu Masedonia hupi shung nga ahra amunt Philipi ah thing song nge hana kani na rungnie atam am phur unge. 13Sabbath rungnie ah kani na hupi hai thou wa shukka turella thing ung nge, mani talit tamang nu juija hana mani hi nie ang nga ae, chuna hana rachun na am namei ngei hitta ong ha ah wari sui thou song nge. 14Kani rouril na ngei kar shunga Thyatira ram ma hupi ah pun ahra jurra am Lydia, amo chu Chungthieng ta mok mee ae. Malung shunga arengpu Pol rouril ha lak ranga thong hong pi so ae. 15Amo akha chu mani inn shung lim na baptias ae pi shu takka amo na kanita kokkae, “Ejong nga nangei na kei hi adiek arengpu ta ngoiring mee ae ta hal shu lea chu kani inn na inn tung na changpi oh,” ta amo na kanita rui so ae.
Philipi Raen Inn Shunga
16Naha ni akha ah nie na amunt akha ah kani thing pa chu hrano muihla na tullu lu ah am kour namei akha tukhlak kung nge. Amo chu anutieng nga shukkang rourilla mamit pu tarang nga sum lo ah am mee ae. 17Amo na Pol akha chu kani nutieng nga jui ja au shukkae, “Na spa ngei hi wang tekti Chungthieng hina rui ngei ae! Mani na nangei kolla alo ta sanpi pha ang meh tina rourillea!” 18Amo na rungnie leima tam hitta rilla rol sho ae atreem na ah chu Pol hi lung hoi no ah anu hai lea ah hrano muihla ta rilso, “Khrista Jisu minga keina trongsan pe ah am ming nge makol hai thou shukka thing jou oh!” hana makka hrano muihla shukka hou ah thing so.
19Na hi amitpu na atun chu sum tallang am ni jo weta madangpha juija chu Pol lea Silas ta hu wa rouril nea eja maikung nga mant na rui ah phao so. 20Mani na Rom offisar ngei maikunga rui ah phao ah ril, “Na spa ngei hi Jihudi mee ngei ae, mani na ani hupi shunga ollang pi ae. 21Mani na talit tamang chupi takpi ae, ani roukung hina ngei no rou; ani hi Rom ramma mee ae chuna ani na mani talit tamang hi tullu chang nga hina ae ngei ang no ae.” 22Chuna pa chu wairul riha na rachun ha weta Pol lea Silas ta anda ah aneh-yul thou so. Hana Rom offisar na Pol lea Silas apun ni thaer weta pheet rang rou ril so. 23Mani na leima phit shu nutienga Raen-inn shung nga shi so. Hana Raen-inn hakpa ta hrabak ta anna am rang trongsan pe piso. 24Hija kal trongsan mapha jarra Raen-inn hakpa na manita ashung tekti raen inn shunga shi ah, akae ah thinkkadak takka ren na shi so.
25Yanyai ah Pol lea Silas na Chungthieng laa sha nie lei ah adang raen-inn shung nga am ngei na ngei ah am meh manui ta. 26Edang dang no wa lingnu nukka raen inn ha ling so ae, inn har lim pa kom woiha chakka hong hap so ae, akha chu raen inn shung nga am meelim kutta am thirrui kom tul hap so ae. 27Raen inn hakpa na enhrang malak juija chu raen innhar lim hong nga am ri pha so, hana amo na halso ae raen-inn shunga am lim pa tanna thing hap so ae, chuna mathei chakka thi pa na hra tekso ae ta, cham takka shun nang ae so. 28Hana lei ah Pol na leima shanrol wang nga ril, “Nathei chakka thit rang tullu lu no oh! Kani lim hina am munge!”
29Raen-inn hak pa na sharmei nie weta Pol lea Silas kae kunga am na ah atri alou hitta munt ha tu so ae. 30Amo na manita rui ah shuk ka, “Keina samla ringchang pha rang ejongpa tullu lu ang meh?”
31Manui na sang, “Arengpu Jisu ta ngoiring ngo hana nang, na inn sung ngei kom sanpi pha ange. 32Hana pa chu manui na aring rou makolla rilla hana inn shung nga am meelim ta kom rillea. 33Nani jantieng mak hana raen-inn hakpana manui ta rui ah thing nga mani pum ma phitta rei ah ae na amunt lim silpi bol pi ae; amo akha chu mani inn shung limpana woiha chakka baptias ae so. 34Hana amo na Pol lea Silas ta ma inn shung nga rui ah kalla bakpi enpi ae. Chuna pa chu amo akha chu mani inn shung lim ariem na shi hakti ae. Rouram chu mani na Chungthieng ta ngoiring jarra. 35Hana inthou wa chu Rom ane angam ngei na Polise offisar hla weta trongsan pe pi ae, “Hana spa ngei ah thing jou shu oh.”
36Chuna pa chu raen inn hakpa na Pol kolla ril, “Offisar ngei na Silas lea nanui nimak hla rang nga rou pe ah hla so ae, chuna nanui thing ngai sio weh, ariem ma thing jou oh.”
37Chutiweta Pol na Polise offisar kolla ril, “Kanui hi hrano tullu lu na aral jong nga tuk no ae, chu phao shung nga kanui ta wairul ri ha mai kunga phitta rei ah ae ah, Rom ramma mee akha chang nga raen-inn shunga shi so ae. Atun chu mani na kanuita aru han ta hla rang ae ah mo ae, na hi di nong nge! Chuna Rom offisar manimak hina phao weta kanui shukka thing tukkae.”
38Hana Polise offisar na manui ril na makhai Rom offisar ngei kolla takka, Pol lea Silas hi Rom sanao ae ta dang pa chu mani ha leima atri so ae. 39Chuna pa chu mani na manui ta kani maral ngei pi oh rilla raen-inn hai thou wa shukka thing rang nga akha chu hupi ha hou wa thing jou oh ta ril. 40Hana Pol lea Silas na raen-inn hai thou shukka thinga Lydia inn na thing nga amunt hana ngoiring ngei eja ta thanam thathou pi ah manui na amunt ha hou phur ah thing so.
Currently Selected:
RUIHNGEI TULLU 16: CHOTBSI
Highlight
Copy
Compare
Share
Want to have your highlights saved across all your devices? Sign up or sign in
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
