RUIHNGEI TULLU 18
18
Korenthiya Ah
1Hina waitakka Pol na Athen hou phurra Korenthiya ah thing so. 2Amunt hana Jihudi aming na Aquila Pontus ram ma mee amo ha chu anamei Priscilla hitta Italy hai thou wa phao ae rouram chu Claudius na Jihudi meelim na Rom ram hi hou wa thing jou shu oh trongsan pek jarra, Pol na ma nui ta tukhlak ranga thang ae. 3Hana mani hitta amo na tullu lu ha am meh, rouram chu maring rang tarang nga amona kom mani hekta tabur sha ah sum lo ae. 4Amo na Sabbath rungnie chang honna Jihudi lea Grik ngeita bahap ta pirang nga minna hal hlakkae.
5Hana Silas lea Timothi na Mesedoniya hai thou ma am na tung juija chu Pol na apha lim pa hi rourilla Jisu hi sanpipa ae ta Jihudi ngei kolla ril. 6Chutiweta Jihudi ngei na Pol ta ngei num no wa hrano tieng nga halla am sharukka malung tong nga apun ani tha phur weta mani kolla ril, “Nangei thi na nangei chung makka am shu oh. Ka ae phung shak chu shu sang nge, chuna atun hai thou wa kei jat adang ngei kolla thing sange.” 7Chuna pa chu amo na thingweta Titius Justus jat adang inn na am thing so. Ma inn chu Synagog am na ah ae hana amo chu Chungthieng ta mok mee ae. 8Krispus Synagog hina lamkaipu akha ae. Amo akha chu ma inn shung limpa na ngoiring nge hana Korenthiya ah am adang mee ngei nakom marouril ha thei weta ngoiring nga baptias ae.
9Naha janting nga chu Pol na mamang nga arengpu na ril, “Atri no oh hata rilla am mo, atreem am no lutta.” 10Rouram chu keina nakolla am ha ing nge. Atu akha na nakolla ephao ae nae ang no ae, na hupi shung hina am ngei hi ka mee chak sha ae. 11Chuna pa chu Pol na kum ha lea tangkhai am ma mee ngei ta Chungthieng rou trong chupi tak pi ae.
12Akaiya ram shung nga Galio ta Rom Governor hap shu takka Jihudi ngei na rachun weta Pol ta mant na ruishang nga rui ah shukso. 13Mani na ril, “Na spa hina mee ngeita Chungthieng mok rang nga kalla hot na ae ani roukung hitta ngei hlak no rau ha ril ae.
14Hana Pol na ril shuk tikta ae lei ah Galio na Jihudi ngei ta ril, “Ejong nga amo na aral tullu lu ah akha chu meethat meemant lea chu kei na amo hina maral pe num ming nge. 15Chutiweta na hi nangei na trong jet hlakna akha chu nangei roukung hina rou ram lea chu nangei theichak ka sem jou oh kei na hana taranga routreem ae ang nonge!” 16Hana amo na ruishang hai thou wa mani ta julla hla so ae. 17Hana pa chu mani na synagog shung nga lamkai Sosthenes ta mant na ruishang mai kung phit so. Chuhalkom Gallio na chu ephao tier shik no ae.
Antiok Ka Lea Na
18Pol na Korenthiya ngoiring ngei hitta rukni ashot am ha ae, hana takka mani ta houphur so, hana Priscilla akha chu Aquila ritta Syria tinga thingso. Kung chunga mathing mahei ta amo na masharo ei nu jui ja malukang sam ripta tanna hou ae Kenchrea ah. 19Mani na Ephesiya amunt tung juija Pol na Priscilla lea Aquila ta houphur weh ta amo na synagog ka thing weta Jihudi ngei hitta ngeituhlak kae. 20Hana am malmashi ngei na amota ashotta am rang nga hlem meh, chutihal kom amo na ngei no ae. 21Chuna sharukka mathing maheita mani kolla amo na ril, “Ejong Chungthieng ahal am lea chu kei lea sier ang nge ta rilla hou ah amona Ephesiya haithou thing sier so.
22Amo na Kaisariya matung juija amona Jerushalem ma thing weta abom ngei ta riemtuk pe ae, hana Antiokka thing so. 23Apha ahre hana am phur weta amo na Galatiya lea Phrygia ram tieng nga ngoiring ngei ta ratta am rang rilla hou ae.
Korenthiya Lea Ephesiya Ah Apollo
24Hana lei apha ah Alexandria ah don Jihudi Apollo na Ephesiya ah phao ae. Amo chu leima thei shing mee ae, hana jieksha rou hina lam kom leima dang nge. 25Amo hi arengpu lam ma hrabak ta chu ah hang mee ae. Hana amo na Jisu hina rouram ma mee ngei kolla leima chupi nu takpi num ma hrabakta chupi ae. Chutiweta amo na baptias ae pa Johon ta chak dang nge. 26Amo na Synagog ka atri am no lutta rou ril ae Priscilla lea Aquila na marou theipha juija. Manui na mani inn na amo ta rui ah thing nga Chungthieng hina rou ah hella hra ah takpi so. 27Chuna Apollo na Akaiya ram ma thing ang sange malungir sha rukka. Ngoiring sha uleanao ngei na hana am rui ngei na amo ta ariem ma tung pi ranga jiekka hla ae, chuna Chungthieng malungshit jarra sanpi pha sha ngei na amo ta leima san ae. 28Hana jarra amo na mee abom shung nga thei ah shing nga jieksha rou hei thou wa Jisu hi sanpi pa ae ta hrabak ta ril shuk nea ae.
Currently Selected:
RUIHNGEI TULLU 18: CHOTBSI
Highlight
Copy
Compare
Share
Want to have your highlights saved across all your devices? Sign up or sign in
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
