RUIHNGEI TULLU 15
15
Jerushalem Ma Bomtul Na
1Judiah hai thou wa malmashi ahre na Antiok ka phao weh ta ngoiring sha ngeita chupi takpi thou sho. “Moses na pek roukung nu jui ja nangei na sanpi pha ang no weh ashartan no lea chu.” 2Hina rou sha rukka Pol lea Barnabas na mani hitta kalla trong jethlak sharukka Pol lea Barnabas akha chu Antiok ka mani ahre na ahalsha rouron akha chu ulien chang ngei hitta nahina rou sharukka Jerushalem ma tukhlak rang thingso.
3Abom na mani hata hla so ae; Hata mani thing na lam ma Phoenisiya akha chu Samaria ah mani na jat adang ngei na alo ta Chungthieng kolla am sha tina rou ril ae; Na routhar hi ngoiring sha ngei na thei pha jui ja ehekta mani na ariem meh. 4Mani na Jerushalem tung juija abom ngei na mani ta ariem ma tuk hlakkae, Chungthieng na mani kolla aloti tullu lu mo tina rou hi ahalsha rouron ngei akha chu ulien chang ngei kolla ripta rilso. 5Chutiweta ahra sha ngei meechang ngoiring ngei na chu ngir thou weta ril, “Jat adang ngei hi Moses roukung nu juija ashartan shu oh ta ril.”
6Ahalsha rui akha chu ulien chang ngei na na mani sai rou sha rukka hal hlakso ae. 7Apha shotta mani hal hlak nutieng nga Pitar na ngirthou wa rouril. “Uleanao ngei oh, nangei na dang ang nge, apha shotta Chungthieng na jat adang ngei ta ahra rou ril rang nga keita hal so ae chuna routhar ha thei weta ngoiring shu oh. 8Chuna malmashi lunghal lim dangne Chungthieng na jat adang matarang kom muihla athieng hla pi ah angai pe sho ae ani ta ma ae chu hek ta. 9Amo na mani lea ani hi ephao adanga sem no ae, amo nakom mani pak lim pa kom silpi so ae rouram chu mani ngoiring jarra. 10Ani nungei pa-ngei na kom ron nea no pot rit ha ani na kom rou nea no ha chuna eje ranga Chungthieng ta chang an na chau? 11Ani nakom ngoiring sharukka sanpi pha ae arengpu Jisu majarra, mani ha kom ha sha ae.”
12Hana bomtulla am malmashi lim na Barnabas akha chu Pol na Chungthieng na jat adang ngei kolla alota angakpi tullu lu mo tina rou hi ril juija mani lim na dai siem ta am meh. 13Mani rou ril lim shu juija, Jams na ril thou sier so, “Ulea nao ngei oh karouril te thei pi ri oh! 14Pitar na rilshu hekta Chungthieng na jat adang ngei ta alo ta mamee chang rang tullu lu mo ti na masha ah ril so ae. 15Rouphu pa ngei na rou hi ngei hlakka hou so ae, hina jiekka am meh,
16‘Arengpu na ril, hina waitakka keina
lea weta amang sha David rengram hi
Sem sier ang nge Hana woiha pa kei na
lea ah sa sier ang nge amang sha hi.
17Chuna malmashi lim na ka-am na munt
na phao ang nge hana katarang nga
kakok sha jat adang ngei lim pa kom.
18Na hi arengpu na rilsha so ae amo na
nahi apha eja matieng nga dangpi so ae.’
19“Jacob na hata rilla am meh, na hi kahal kalung sha ae, ha chu ani na jat adang ngei na Chungthieng ning tienga am lei ah mani ta aol ana shukpi ang no sha ae. 20Hana hutta ani na mani kolla rou jiekka hla ang nga sha ae hlawang kolla kat mahou sha thienglou abak ah een pot ha bakno oh ta. Hana namei apa vokno tullu lu no rang, ahong rui hitta thi asha akha chu athee bakno oh rillang sha ae. 21Rouram chu Moses na apha eja matieng nga hupi lim chang honna rouril lim ha Synagog shung nga Sabbath rungnie changhon na pa ah am sha ae.”
Jat Adang Ngoiringei Ta Jiek Rou
22Chuna pa chu ahalsa rui akha chu ulien chang ngeina abom lim hitta rachun ha ah Pol Barnabas hitta Antiok ka thing ha rang spa ahre hal ei oh ta meelung ngir so ae. Chuna pa chu ngoiringeina ehekta ajak ati shakka am Judas ta kokok Barsabbas lea Silas ta hal so ae. 23Hana mani na jiekka shi rou hi manui ta thunna hla so ae:
“Ahalsha rui akha chu ulien chang nangei uleanao kani na Antiokka Syriya akha chu Ciliciya ah am jat adang nga don nangei lim ta riemtuk pe ung nge. 24Kani na thai pha song nge kani bom hai thou wa nangei am na ahphao spa ahre na nangeita aol ana pe ah lung ol pi ae ti rou ha, mani ha kani kol hai thou wa hata ril thing ngo tina rou ephao am no ae. 25Chuna sarukka kani na bomtul ha ung nge ta akha chakka ngei halakka nangei kolla rouron nang mee hal ung weta hla song nge nangei am naah mani ha kani lungshit tonpi Barnabas lea Pol hitta phao ha ang nge. 26Mani ring ha chu arengpu Jisu khrista tullu tarange athi ti lou sha ae. 27Nangei am na kani hala Judas lea Silas na kom jiekka hla rou hekta manui na kom hata rillang nge. 28Muihla athieng lea kani ma juino ngeino lam anolutta adang pot rit nangei chung nga dolla shi no ei oh ta ngei hlak so ae. 29Kutta sem hlawang kolla kat pot bakno oh, athee kom bakno oh, ahongrui hitta thi asha bak no oh, namei apa vokno tullu hai thou wa adang nga am mo. Na jong tullu hai thou wa hlikka thing ngo.”
30Ngoiring ngei abam tul na amunt Antiok hana rouron ngei na jieksha rou ha mani ta pe so ae. 31Jieksha rou ha mani na pat jui ja thanum thathou na rou chang nga ariem na shi hakti sho. 32Rouphu pa unge ta manuina ril Judas lea Silas na manita apha shotta thanum thathou pi ah rouril ah hella arat rang nga. 33Apha atante mani hitta am ha shu takka ngoiring ngei na manuita hla ngei am na ah, alung dai ah lea pi sho ae. 34(Silas na chu hana am pa na hra tekkae ta hal ae.)
35Pol lea Barnabas Antiokka apha atante am phur ae, hana adang mee ngei hitta rachun na manui na arengpu rou hi hrabakta chupi takpi ah rouril ae.
Pol Lea Barnabas Hran Hlakso
36Apha atante nutieng nga chu Pol na Barnabas kolla ril, “Anui na lea weta hulok chang honna thing weta ulea nao ngei kolla arengpu rou ril sha ha manina alota am mo mani ha an thing ui oh. 37Barnabas na chu Johon Mak hi rui ah manui hitta thing ha num meh. 38Chutiweta Pol na chu amota rui hi hoi ang no ae, Rouram chu amo na mani tullu ha atreem phaowa tol no wa Pamphylia ah manui ta hou wa mathing sharukka. 39Hana manui ni shung nga laima trongjet hlakka manui ni mak hran hlak so ae. Barnabas na Mak rui weta Cyprus ram tieng nga kung chunga thingso. 40Pol na chu Silas ta halla manui ta hou phur ah ngoiring ngei ta arengpu lungshit thuija am rang nga trongsan pe phur so. 41Amo na Syriya akha chu Cilicia ngei abom ta rat pi phur ae.
Currently Selected:
RUIHNGEI TULLU 15: CHOTBSI
Highlight
Copy
Compare
Share
Want to have your highlights saved across all your devices? Sign up or sign in
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
