1 SAMUEL 8
8
Bororok khoroksa habugra san laimani
1Samuel chakra wng khe bini bwslasongno Israilni buj thumnairok snam kha. 2Bini bwsla okrani mung khe Joel, kusuni mung khe Abia, bórok Birseba-o buj thumo. 3Phiya ba bórok bupha hai wng lai ya, bórok rangno se hamjak kuk lai-o, bórok rang chá laiwi sói bujni samung tang li ya.
4Hakhe bebak Israilni okra chakrarok thum laiwi Rama-o Samuelni thani phai laiwi 5#Uái 17.14.bono hai hwnwi sa lai kha, “Nai di, nwng chakra wng kha, nini nwslasong nwng himmani lama-o him ya, tabuk buini dopharok hai khe chwngnobo khoroksa habugra chongwi rw di.” 6Tamo khe Samuel bórok habugra sanmano chajak li ya, hakhe Samuel Subraiyungni thani suri san kha. 7Hakhe Subraiyung Samuelno hai hwnwi sa kha, “Bororok nono bebak samani kókno khna di, bórok nono norma klai ya, bórokni bugra ta wng thung hwnwi ano se bórok norma klai-o. 8Ang bórokno ha Ijipni tubu phuruni simi bórok ano yakarwi kubunni mwtairokno khulum kha, tabuk bórok ano khlaimani hai’-no nonobo khlai-o. 9Hakhe tabuk bórokni kókno khna di tei bórokno jai khe’-no khorai di, habugrarok bórokno bahai tamo khlaino saui khna rw di.”
10Hakhe Samuel bini thani habugra sannai bororokni thani Subraiyung samani kókrokno bebak saui khna rw kha. 11Bo hai hwnwi sa kha, “Norokni habugra norokno omo hai khlai anw: Bo norokni bwsarokno sengkrak snam anw, baksa borokno chobani korai malkhungni sengkrak chong anw, baksano bo bini korai malkhungni swkang khachikna bagwi chong anw. 12Bo bini bagwi baksa borokno khorok saisani bokhorok tei baksano khorok bachini bokhorok chong anw, norokni bwsarok bini panthoro al ma chuai anw tei bini mai kumun ma ra anw tei baksa chobani sengrok tei malkhungni bagwi manwirok ma snam anw. 13Phiya bo norokni sajwksongno tlangwi thok motom snamnai, mai-mui sóngnai tei auan snamnai chong anw. 14Bo norokni kaham kuk panthor, angur bari, olib buphangrokno na baiwi bini selengrokno rw anw. 15Bo norokni mai tei angurrokno chi-o kaisa naui bini tangphangrok bai selengrokno rw anw. 16Bo norokni seleng tei selengjwkrok, kaham kuk mal-matarok,#8.16: mal-matarok: Kaisa kwcham kók séma-o mal-matarok; Hibru kógo khe Siklarok. koraichirkarok, tlangwi samung tang rw anw. 17Bo norokni chi-o kaisa merarokno naui noroknobo seleng snamnai. 18A jora khe norok chongwi namani habugrano tẃiwi chirigwi kap lainai, phiya ba Subraiyung norokni kapma khna glak.”
19Hai phano bororok Samuelni kókno khna lai li ya tei bórok hai hwnwi sa lai kha, “I’nhi” chwng habugra se nai-o! 20“Hakhe chwngbo kubunni dopharok hai khe chini habugra chwngno tẃidulnai tei bwskango tongwi chobarogo nang lai mannai.” 21Samuel bororokni bebak kókrokno khna bai khe Subraiyungno saui phi kha. 22Hakhe Subraiyung Samuelno, “Bórokni kók khna di tei habugra chong si di,” hwnwi sa kha. Hakhe Samuel, “Israil bororokno nogo tháng bai si di,” hwnwi sa kha.
Currently Selected:
1 SAMUEL 8: KOKBSI
Highlight
Copy
Compare
Share
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
