1 SAMUEL 9
9
Sol Samuelno malaimani
1Aro Benjamin bosongni belai rang gwnang borok khoroksa tongo, bini mung khe Kis; Kis Abielni, Abiel Serorni tei Seror Bekoratni tei Bekorat Aphiani bwsla. 2Bini bwsla khoroksa tongo, bini mung khe Sol, bo belai chwla naithok. Israilni bisingo bo wng kha buini slái kuchuk-kotor, bo hai khoroksa phano kwrwi.
3Solni bupha Kisni baksa koraichirkarok kwmaui tháng kha, Kis bini bwsla Solno hai hwnwi sa kha, “Seleng khoroksano tlangwi koraichirkarokno rutuk di;” 4bórok hathái kami Ephraim tei ha Salisa tẃi tháng lai kha, phiya ba bórok rutugwi man lai li ya, bórok Salim ha bwkhak tẃi tháng lai phi kha, tamo khe arobo kwrwi; hakhe bórok Benjamin ha bwkhak tẃi tháng lai kha, phiya ba bórok man li ya. 5Bórok Juphni amchoi-o sók phai khe, Sol bini selengno hai hwnwi sa kha, “Phai di, chwng kiphilwi tháng lai si anw, wng ya khe ani apha koraichirkarokno uansuk yaui chini bagwi se uana kuknai kha.”
6Tei bo bono hai hwnwi sa kha, “Nai di, o kamiyungo khoroksa Kaitorni borok tongo, bo kaham khe’-no bórom khlaijago tamni hwn ba bo samani kókrok bebak’-no nang phai-o, phai di, bini thani tháng lainai phiya ba bo chwngno buro thángnai saui mannai.”
7Aphuru Sol bini selengno hai hwnwi sa kha, “Chwng bini thani tháng khe, tamono chwng yapharnai? Chini sola-o chámungbo páiwi tháng kha, Kaitorni borokno yapharjaknai chini mungsa kwrwi kha. Chini tamo tong?”
8Seleng Solno hai hwnwi sa phi kha, “Ani thani rukphaini rang lepbrwi tongo, chini lamano chwngno sa khe Kaitorni borokno ang abono rwnai.”
9Swkango Israilo diyarino “Nuknai” se hwnjago, aboni bagwi khoroksa swk Kaitorno sẃngnani muchung khe, “Phai di nuknaini thani tháng lai anw,” hwn lai-o. 10Hakhe Sol bini selengno, “Kaham’-no sa kha; phai di tho tháng lainai,” hwnwi sa kha. Hakhe bórok Kaitorni borok tongmani kamiyungo tháng lai kha.
11Bórok hathái kasaui kamiyung bwkhak tháng lai khe bórok twi khóknani phai bainai sikla bwrwirok bai malai kha; bórok bwrwirokno, “Nuknaisa oro de tong?” Hwnwi sẃng kha.
12Bórok hai hwnwi sa kha, “I’n tongo, bo norokni bwskangdrobo se. Norok dakti tháng khe malainai, bo tabuk’-no kamiyungo sók phaidrop, tamni hwn ba bororok tini hathái-o yapharmung yaphar lai-o. 13Kamiyungo hap khe’-no bo chánani bagwi kuchuk jidolo thángmani swkang bono nuknai, bo aro sógwi ya sak bororok chánani cheng lai glak, tamni hwn ba bo se swkang yapharmungrokno hamari rwnani nango, tabuk norok tháng khe malainai.” 14Hakhe Sol bai bini seleng kamiyungo tháng lai kha, bórok kamiyungo hap twtwi wng khe Samuel hathái-o thángnani bagwi bórokni phaising phaiwi tongma nuk kha.
15Sol phaimani sal swkang Subraiyung Samuelno hai hwnwi sa kha: 16“Ang khwna omo hai jora-o khoroksa ha Benjaminni borokno rohornai, bono nwng thok lu-ui ani Israil bororokni habugra snam di, bo se Philistiasarokni yakni ani bororokno mwthangnai, ang bórokni birmanno nuk kha tei bórokni kapma khna kha.”
17Samuel Solno nuk khe Subraiyung bono hai hwnwi sa kha, “Omo’-no ang nono samani a borok, bo’-no ani bororokni bugra wngnai.” 18Hakhe Sol duglam gana-o tongnai Samuelno, “Nuknaisa buro-o tong ano sa di?” Hwnwi sẃng kha.
19Samuel hai hwnwi sa kha, “Ang’-no nuknai, ani slái swkang hathái kuchugo tháng di, tini norok ang bai ma chá lainai, khwna phungo norok khá-o chongmarokno saui rohor anw. 20Ta uana di, nokha saltham swkang norokni koraichirka kwmaui thángmani, abórok manjak kha. Israil bororok aswk naimani abo sabo? Abo nwng bai nini nwphani núkhung se.”
21Sol hai hwnwi sa kha, “Ang Israilni bisingo kotoi kuk Benjamin bosongni se, ani núkhung khe Benjamin bosongni bisingobo chúk ya kuk; hakhe nwng tamni bagwi abo hai kókrok saui tong?”
22Hakhe Samuel Sol bai bini selengno nok kotoro tlangwi borok khorok thamchi ringjaknairokni slái sakani achukthai-o achuk rw kha. 23Samuel mai-mui sóngnaino, “Ang nono khagwi ton di hwnwi rwmani muihanno tubu di,” hwnwi sa kha. 24Hakhe sóngnai biyani tei aboni logini bahanno Solni bwskango rw phai kha. Samuel hai hwnwi sa kha, “Nai di, omo nini bagwi narwkjakmani, chá di, nograirok bai baksa chánani bagwi ang tisaui narwkmani.”
Hakhe Sol a salo Samuel bai chá lai kha. 25Bórok hathái kuchukni kamiyung bwkhak ongkhorwi phai khe bórok Solni bagwi núkhúng saka-o thuthai snam kha,#9.25: Thuthai snam kha: Hibru-o khe kók sa lai kha. 26bo aro’-no thu kha.
Samuel Solno bugra chongmani
Aichugo khe Samuel Solno hai hwnwi ring kha, “Bacha si di, ang nono rohor sinai.” Hakhe Sol bacha kha, bo bai Samuel laharo ongkhorwi tháng lai kha. 27Bórok ongkhorwi kamiyung baichingo sók phai khe Samuel Solno, “Nini selengno chini slái swkang tháng di hwnwi sa di, bo tháng khe nwng oro srapsa bathak di, Kaitor ano tamo hwnwi sa kha ang nono saui khna rw anw,” hwnwi sa kha.
Currently Selected:
1 SAMUEL 9: KOKBSI
Highlight
Copy
Compare
Share
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
