1 SAMUEL 7
7
1 #
2Sa 6.2-4; 1Bo 13.5-7. Hakhe Kiriatjearimni bororok Subraiyungni swmai bokhokno phaiwi tlangwi abono hachukni Abinadabni nogo tubu lai kha. Bórok bini bwsla Eliasarno Subraiyungni swmai bokhokni barja rwnani bagwi kwthar khlai lai kha.
Samuel Israilni tẃiphang wngmani
2Subraiyungni swmai bokhok Kiriatjearimo bisi kolokma láiwi nokha bisi nwichi swk tong kha, a jora-o Israilrok Subraiyungni thani kap lai kha.
3Hakhe Samuel Israilni bebak bororokno hai hwnwi sa kha, “Norok Subraiyungni thani bebak khá nangwi kiphil khe Astartes mwtairok tei bebak buini hani mwtairokno khibiui rohor bai di, norokni bwkha Subraiyungni thani ton di, Bono simi mon di, hakhe bo norokno Philistiasarokni yakni phiyóknai.” 4Hakhe Israilrok Bal tei Astartes mwtairokno khibiui rohorwi Subraiyungno simi se mon lai si-o.
5Hakhe Samuel, “Mijpa-o bebak Israilrok kuthum lai di tei ang norokni bagwi Subraiyungni thani suri sannai,” hwnwi sa kha. 6Hakhe bórok Mijpa-o kuthum lai kha, bórok twi khók laiwi Subraiyungni bwskango lukhlai rw lai kha, bórok a salo sapung ok bukcha tong lai kha. Tei bórok hai hwnwi sa kha, “Chwng Subraiyungni thani sumsok khlai kha.” Samuel Mijpa-o Israil bororokno buj thum kha.
7Philistiasarok Mijpa-o Israilrokno kuthum lai kha hwnwi khna khe khorokba Philistiani habugrarok Israilrok bai nang laina bagwi ongkhorwi tháng lai kha. Israilrok abono khna khe belai kirijak bai kha, 8tei Israilni bororok Samuelno hai hwnwi sa lai kha, “Philistiasarokni yakni chwngno phiyók thung hwnwi Subraiyung chini Kaitorni thani suri sanma ta thak di.” 9Hakhe Samuel abuk cháui tongnai mera bwsa masa naui Subraiyungni thani sógwi yapharmung yaphar kha, Samuel Subraiyungni thani Israilrokni bagwi suri san kha, hakhe Subraiyung bini surimano khna kha. 10Samuel yapharmung yapharwi tong phuru khe Philistiasarok Israilrok bai nang lainani phai lai kha, phiya ba Subraiyung Philistiasarokno phirang kok khe bórok pál man ya wngwi Israilrokni bwskangni khárwi ma tháng bai kha. 11Israilrok Mijpani ongkhorwi thángwi Philistiasarokno Betkar jora riphrigwi buthar bai kha.
12Hakhe Samuel kaisa holong naui Mijpa bai Jesanani kwcharo káiwi abono “Ebenejer” hwnwi mung phar kha, tamni hwn ba “Bebago Subraiyung chwngno chuba kha.” 13Hakhe Philistiasarok mechenjak kha tei hap phai li ya, Samuel kwthang tong sak Subraiyung Philistiasarokno kebengwi tong kha. 14Philistiasarok Israilrokni kamiyung Ekronni simi Gat jora segwi namano kiphilwi ma rw kha, hakhe Israilrok abórokno kiphilwi man bai phi kha. A jora-o Israil bai Amorrokni bisingo kwchang kwchang wng kha.
15Samuel kwthang tong langsak Israilo buj thumnaisa wng kha. 16Tei bo bisi brúm brúm Bethel, Gilgal tei Mijparogo thángwi Israilrokni buj thumo. 17Hakhe bini nok Rama-o bo kiphilwi thángo, bini nok arono tei Israilrokno bo aro sói khe buj thumo. Tei Rama-o bo Subraiyungni bagwi kaisa háyá snam kha.
Currently Selected:
1 SAMUEL 7: KOKBSI
Highlight
Copy
Compare
Share
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
