1 SAMUEL 21
21
Daud Solni aroni khármani
1 #
Mat 12.3-4; Mar 2.25-26; Luk 6.3. Aphuru Daud Nobo tongnai ochai Ahimelekni thani phai kha, Ahimelek kwlwi twtwi Daud bai malainani ongkhorwi phaiwi hai hwnwi sa kha, “Nwng saichung de? Tamo nini logi-o khoroksabo kwrwi da?”
2Tei Daud ochai Ahimelekno hai hwnwi sa kha, “Ang habugrani samungni bagwi se oro phai-o. Bo ano khlai di hwnmano ‘Kebono ta sa di’ hwnwi dagi kha. Ani logini siklarokno kwrẃngsa-o mungsa samungni bagwi malainani sa kha. 3Hakhe tabuk nini yago tamo chájaknai tong? Ano auan lep ba wng ya khe yago tongmano phano rw gra di.”
4Hakhe Ochai Daudno hai hwnwi sa kha, “Ani yago lukuni bagwi auan kwrwi phiya ba auan kwthar simi se tongo, tamo khe bwrwirok bai thujak ya sikla hwn khe simi se cháui mannai,”
5Daud hai hwnwi sa kha, “Kubui’-no chwng samungo ongkhorwi thángna hwn khe bwrwirok bai hakchalo tongo tei se ahai’-no samungo ongkhor phurubo ani sengkrakrok kwthar’-no tongo; hakhe tini khe teibo bwswk se kwthar wngno?”
6 #
Leb 24.5-9. Hakhe ochaibo Daudno auan kwtharno rw kha, tamni hwn ba aro Subraiyungno yapharjak auanno karwi kubun auanrok kwrwi, abono a salo háyá kwtharni norwi kutung kutung auan bai sláiwi tubujakmani.
7Doeg mungwi Solni seleng khoroksa Idomsa Subraiyungni samung mungsa swkni bagwi aro tongmani jora; bo Solni mera mwrwknai bokhorok.
8Daud Ahimelekno hai hwnwi sẃng kha, “Oro nini thani mungsa koslu eba seng kwrwi de? Habugrani samung dóro kukni bagwi ang ani seng eba mungsa swk aitalrok phano tubu-ui man li ya.”
9 #
1Sa 17.51. Hakhe ochai hai hwnwi sa kha, “Nwng Ela harungo Philistiani sengkrak bokhorok Goliatno butharmani seng rí bai duljak khe ephodni uklogo tongo. Nwng tlangna hwn khe abono tlangwi mano, abono karwi le oro tei seng kwrwi.”
Daud hai hwnwi sa kha, “Abo hai tei seng kaham buro tongnai? Abono ano rw di.”
10Hakhe Daud a salo Solni aroni khárwi thángwi Gato tongnai habugra Akisni thani tháng kha. 11#1Sa 18.7; 29.5.Hakhe Akisni seleng bono hai hwnwi sa kha, “Omo bini hani habugra ya diba?” Bono tẃiwi’-no rwchabwi mwsaui hai hwnwi sa lai ya da,
“Sol khorok sasai buthar kha;
phiya ba Daud khe khorok chisai butharo!”
12 #
Lob 56. Hakhe bórokni kókno khnaui Daudni bwkha-o belai khe uanajak kha, hakhe Gatni habugra Akisno belai khe kirijak kha. 13#Lob 34. Hakhe bo bórokni bwskango bini tongmungno sláiwi kobor hai khe phunuk kha. Bo duglamo ahai’-no rigwi swi trwng kha tei sakni khochairogo khuktwirok yor khlai rwui ton kha. 14Hakhe Akis bini selengrokno hai hwnwi sa kha, “Nai di, o borok kobor se, hakhe tamni norok bono ani thani tubu lai? 15Ani oro ba kobor kwrwi diba? Koborsuluk wngmani phunukna bagwi da norok bono ani thani tubu lai? O borok da ani nogo phainai?”
Currently Selected:
1 SAMUEL 21: KOKBSI
Highlight
Copy
Compare
Share
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
