1 SAMUEL 20
20
Jonathan Daudno chubamani
1Hakhe Daud Ramani Naiotho tongmani khárwi thángwi, Jonathanni thani phaiwi hai hwnwi sa kha, “Ang tamo khlai kha? Ang tamo hamya khlai kha ba? Ang nini aphani thani tamo cha ya khlaiwi ba ano butharnani rutuk?”
2Hakhe Jonathan bono, “Abo hai ta wng thung, nai di, nwng thwi glak, ani apha samung kotor eba kotoi ano sa yaui mungsanobo khlai ya, bo mungsanobo huiwi tong ya, abo hai ya,” hwnwi sa kha.
3Phiya ba Daud hai hwnwi sa kha,#20.3: sa kha: Hibru-o khe hai’-no hai swmai tang kha. “Nwng ano bwswk hamjak abo nini apha saui mano; teibo uansugo abo Jonathan saui ta man thung, hakhe bo bwkha nangnai se, abo kubui se, ang Subraiyung kwthangni mung bai swmai tangwi sa-o, ang thwinani bagwi tei yakamsa se tong si-o!”
4Aphuru Jonathan Daudno, “Nwng samani haino ang nini bagwi khlainai,” hwnwi sa kha.
5 #
Lek 28.11. Daud Jonathanno hai hwnwi sa kha, “Nai di, khwna’-no tal kwtalni panda wngnai, ang habugra bai baksa chámung panda-o ma achuk anw, nwng chajak khe ang panthoro thángwi salthamni sanja jora huijagwi tong anw. 6Nini nwpha ano kwmajak khe hai hwnwi sa di, ‘Daud ano saui se bini núkhungni bisini yapharmung panda-o manjakna bagwi Betlehemo tháng kha.’ 7Bo, ‘Ham kha!’ Hwn khe nini selengni kaham’-no wngnai; phiya ba bo jolijak khe saui man di, bo hamya khe chongwi tong kha. 8Aboni bagwi nini selengno khairok ja di, nwng tepsa khe swmai tangmano narwk ja di, phiya ba ani cha ya tong khe nwng sak’-no ano buthar di tamni nwng nini aphani thani tlangna nang?”
9Jonathan hai hwnwi sa kha, “Abo hairok nwng ta uansuk di! apha nono hamya khlainani chongmano ang saui man khe ang nono sa yaui de tongno?”
10Hakhe Daud Jonathanno, “Nini apha nono joli khe sabo ano sa phainai?” Hwnwi sa kha.
11Tei Jonathan Daudno hai hwnwi sa kha, “Phai di, chwng panthoro ongkhorwi tháng lai anw.” Hakhe bórok khoroknwi’-no ongkhorwi tháng lai kha. 12Hakhe Jonathan Daudno hai hwnwi sa kha, “Subraiyung Israilni Kaitorno chini sakki wng thung! Omo hai jora-o khwna bai teini salo ang ani aphano sẃng anw, bo nini bagwi kaham sa khe ang nono sa hornai. 13Phiya ba bo nono hamya khlainani bagwi chabwi tongwi suda ang nono saui phiyógwi rohor ya hwn khe Subraiyung ano buthar thung. Subraiyung ani aphani logi-o tongmani hai’-no, nini logi-o bo tong thung. 14Ang kwthang tong khe Subraiyungni kók narwk tẃi nwngbo kók narwk di tei tumung ang thwi khe 15#2Sa 9.1.ani núkhungno mol brúm brúmni bagwi khairok ja di. Subraiyung nini kena arirokno bebakno sokomor bai phano kók narwk di, 16Jonathanni mung Daudni núkhungni#20.16: Daudni núkhung: Grik: Hibru-o khe ha tei Jonathan Daudni núkhung bai swmai rw lai kha. ta kwma thung tei Subraiyung Daudni kena arirokno yagul su thung.”
17Hakhe Jonathan bo bini sakno hamjakma swk Daudno hamjakma bagwi Daudno tei uáisa bono hamjaknani swmai tang rw kha. 18Hakhe Jonathan Daudno hai hwnwi sa kha, “Khwna’-no tal kwtalni panda, nini achukthai bukcha nuk khe nwng sijaknai. 19Salthamni salo nwng kwrwi wngmani#20.19: Nwng kwrwi wngmani mokol kaijaknai: Hibru-o khe nongkhorwi thángma. teibo sijaknai, nwng swkango huijakmani holongdap burung#20.19: holongdap burung: Hibru-o khe salgrabai-o. uklogo’-no huijagwi tongwi di. 20Ang chakhla kongtham mari naharwi kokmani hai khe kogwi rohor anw. 21Hakhe nai di ang ani selengno, ‘Tháng di chakhlarokno naitugwi nahar di,’ hwnwi rohor khe. Tumungno ang selengno ‘Nai di, chakhla nini gana-o se, abórokno tubu di,’ hwnwi sa khe nwng ongkhorwi phaiwi mano, tamni hwn khe Subraiyung kwthangni mung bai swmai tangwi sa-o, nwng kirina kwrwi. 22Phiya ba ang selengno hai hwnwi sa khe, ‘Nai di chakhla nwng tongma bai hakchalo,’ hakhe nwng khárwi tháng di, tamni hwn ba Subraiyung nono tháng di hwnwi sa-o hwnwi nwng romwi na si di. 23Nwng bai ani bisingo o swmai tang laimani Subraiyung chini thani mol brúm brúmno sakki tongnai.”
24Hakhe Daud panthoro huijagwi tongwi phuru tal kwtalni panda sók phai khe habugra Sol chámung panda-o achuk phai kha. 25Habugra bini achukthai’-ono achuk kha. Chokdeual gana-o Jonathan tei babaisa bwkhak achuk kha Abner khe Solni gana-o achuk kha. Tamo khe Daudni achukthai khe bukcha wng kha. 26Hai phano Sol a salo mungsa sa li ya tamni hwn ba, “Bini mungsa swk se wng khna; bo kwthar ya se wngwi tong khna, ao bo kwthar ya laha,” hwnwi bo chong kha. 27Phiya ba tal kwtalni teini salo, Daudni achukthai hai’-no hai bukcha wng phi khe Sol Jonathanno, “Tamo wngwi Jisaini bwsla miya bai tini chánani phai li ya?” Hwnwi sẃng kha.
28Jonathan Solno hai hwnwi sa kha, “Daud Betlehemo thángnani ano koiwi sa kha; 29bo ano hai hwnwi sa kha, ‘Chini núkhung kamiyungo yapharmung panda khlai-o tei ani ata aro-o manjak di hwnwi sa-o, hakhe nwng ano khairok khe tháng rw ja di, ang thángwi ani takhukrokno nai grana,’ aboni bagwi bo cháthai-o sók phai man li ya.”
30Sol belai khe Jonathanno jolijagwi hai hwnwi sa kha, “Kók khna ya kebengwi bachanaijwkmani bwsla! Ang saui mano, nini baithangni tei nwmani lachimasingcha phunuknani bagwi se Jisaini bwsla Daudno nwng saiwi na kha. 31Nwng saui man ya de Jisaini bwsla Daud kwthang tong sak nwng habugra cháui se man glak. Abo baino thángwi bono oro tubu di, bo butharjakna nangnai!”
32Hakhe Jonathan bini buphano, “Tamni bono butharnai? Bo tamo khlai kha ba?” Hwnwi sa kha.
33Aphuru kheno Sol Jonathanno butharwi páinani bagwi bini koslu bai sulhor kha, hakhe bini bupha Daudno butharnani chong súk kha hwnwi Jonathan kaham kheno saui man kha. 34Jonathan jolijagwi cháthaini bacha kha tei tal kwtal pandani salnwini salo mungsa chá li ya. Bo Daudni bagwi belai bwkha kham kha, tamni hwn ba Sol bini bupha bono lachimung rw kha. 35Teini phung ai khe Jonathan bórok sa laimani hai Daud bai malainani panthoro tháng kha, bini logi chwrai khoroksanobo tlang kha. 36Bo chwraino hai hwnwi sa kha, “Ang kogwi rohormani chakhlano naitugwi tubu di.” Chwrai khachigwi tháng khe bono lai rwui chakhla kogwi rohor kha. 37Jonathan kogwi rohormani chakhla jora chwrai sók phai khe Jonathan teibo hai hwnwi sa kha, “Chakhla tei kisa hakchalo se.” 38Jonathan chwraino ringwi hai hwnwi sa kha, “Do di, dakti do di, swdwgwi ta tong di.” Hakhe Jonathanni chwrai chakhlarokno thumwi bini bugrarokni thani kiphilwi phai kha. 39Phiya ba chwrai tamo tamo ya mungsabo saui man ya, Jonathan bai Daud simi se saui mano. 40Jonathan chwraino bini da-seng yapharwi “Kamiyungo tlangwi tháng di,” hwnwi sa kha.
41Chwrai tháng bai khe Daud holongdap kotorni bachaui yáskú sungwi uáitham ha-o klaiwi khulum kha, Daud bai Jonathan motom su laiwi khorok nwnwi’-no kap lai kha, Daud teibo bwkha nangwi kap kha. 42Jonathan Daudno hai hwnwi sa kha, “Kaitor nini logi-o tong thung, Subraiyungni mung bai chwng swmai tang laimani nini bai ani bisingo tei nini bosong bai ani bosongni bisingo mol brúm brúm tong thung.” Hakhe Daud bachaui tháng kha tei Jonathanbo kamiyungo kiphilwi tháng kha.
Currently Selected:
1 SAMUEL 20: KOKBSI
Highlight
Copy
Compare
Share
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
