1 SAMUEL 22
22
Ochairokno butharmani
1 #
Lob 57; Lob 142. Daud kamiyung Gatni khárwi thángwi Adulamni ganani hagurungo huijagwi kha hwnwi khna khe; bini takhukrok bai núkhungni bororok bini aro tháng lai kha. 2Bwkha báijakrok, lakai suthai gwnangrok tei bwkha kochom yarok bebakno bini thani kuthum lai kha tei bo bórokni tẃiphang wng kha. Abo tẃi khe bórok borok khorok brwira swk wng lai kha.
3Tei Daud aroni khe Moab amchoini Mijpa-o thángwi Moabni habugrano hai hwnwi sa kha, “Kaitor ani bagwi tamo khlaino ang saui man ya sak ani ama bai aphano nini thani tong rw ja di.” 4Hakhe Daud bórokno Moabni habugra bai klangwi tháng kha, Daud hagurungo tongwisak bórok arono tong lai kha.
5Hakhe diyari Gad Daudni thani phaiwi hai hwnwi sa phai kha, “Nwng oro tei ta tong si di, ha Juda-o tháng di.” Daud aroni khe Heret bolongo tháng kha.
6Hakhe Daud bai bini palrokno rutugwi manjak kha hwnwi Sol khna kha, aphuru bo Gibeani kaisa hathái saka-o tamarisk buphang yaphango achugwi tongo, bo yago koslu kongsa tẃijak tei bini selengrok bono kitingwi tong bai-o. 7Sol bini gana-o bachaui tongnai selengrokno hai hwnwi sa kha, “Benjaminsarok norok ani kók khna di! Jisaini bwsla norokno panthorrok, angur barirok rw da rwno ba? Tei sengkrak khorok sasairokni eba khoroksararokni bokhorok swda snam langno ba? 8Aboni bagwi da norok ano kebeng laiwi hamya chap lai? ani sajla, Jisaini bwsla bai kók kha laimano norokni bere khoroksa phano ano sa ya gwja. Tini angsla ani selengrokno ano butharnani bagwi ampaui tongna bagwi swksaui rwmano nugwi suda norok ano khá sajak bai li ya gwja.”
9 #
1Sa 21.7-9; Lob 52. Hakhe Solni selengrok bai bachaui tongnai Idomni Doeg hai hwnwi sa kha, “Ang Jisaini bwslano Nobo tongnai Ahitubni bwsla Ahimelekni thani thángma nuk kha; 10tei bo Jisaini bwslano tẃi Subraiyung tamo nai abono sẃng kha, bono chámung-nungmungrok rw kha phiya Philistia Goliatni sengnobo rw kha.”
11Hakhe, habugra Sol Ahitubni bwsla ochai Ahimelekno tei bini sandairokno tei Nobo tong bainai ochairok bebakno ring rw hor kha; hakhe bórok jotono habugrani thani phai lai kha. 12Phiya Sol, “Khna di, Ahitubni sajla!” Hwnwi sa kha.
Bo hai hwnwi sa kha, “Tamo bugra.”
13Sol bono hai hwnwi sẃng kha, “Tamo wngwi Jisaini sajla bai nwng ano kebengwi hamya chap lai? Bo ano kebengwi bachaui man thung hwnwi tamni nwng bono chámung tei seng ma rw? Tei bini bagwi Kaitorni thani kaham hamya ma sẃng?”
14Hakhe Ahimelek habugrano hai hwnwi sa kha, “Nini selengrokni bisingo nwchamari Daudni slái tei kók narwknai sabo tong? Bo le nono mwrwknai tẃiphang bokhorok,#22.14: Tẃiphang bokhorok: Hibru-o khe bo khlai phi kha. tei nini núkhungo bebak bai’-no bórom khlaijago. 15Ang ba tini simi bini bagwi Kaitorni thani kaham hamya naimani wng ya bla? Ahai ya, abórokno nini o seleng eba nini o selengni núkhungni bororok mungsa phano saui man ya!”
16Tamo khe habugra hai hwnwi sa kha, “Ahimelek nwng bai bebak nini sandairok ma thwinai.” 17Hakhe habugra bini gana-o bachaui tongnai mwrwknaino hai hwnwi sa kha, “Subraiyungni ochairokno buthar di, bórok Daud bai yak tongo, bo khárwi thángjak bórok hwnwi saui manẃi suda ano mungsa phano sa ya gwja.” Phiya ba habugrani selengrok Subraiyungni ochaini saka-o yak tisanani lon li ya. 18Hakhe Sol Doegno, “Nwng bórokno buthar di!” hwnwi sa kha. Doeg bórok bebak’-no buthar bai kha. Bo a salo charchiba ochaini kamchwlwi chumnai borokno buthar kha. 19Tei ochairokni kamiyung Nobo tong bainai bebakno buthar bai kha, bwrwirok tei chwlarok chwrairok bai absa kwlwirok musukrok koraichirkarok tei merarokno tanthar bai kha.
20Tamo khe Ahitubni busuk phiya Ahimelekni bwsla Abiathar khoroksa yógwi Daudni aro khárwi tháng kha. 21Abiathar Sol bahai khe Subraiyungni ochairokno buthar kha abono sa kha. 22Hakhe Daud Abiatharno hai hwnwi sa kha, “Ang a salo Doegno aro nuk kheno saui man kha bo Solno saui rwnai hwnwi romwi man kha. Nini bebak sandairok ma thwimani le ani se marja tongo. 23Ang bai tong di ta kiri di, tamni hwn ba ano butharna nainai le nonobo butharna nai-o: hakhe ang bai tong khe nwng yógwi tongnai.”
Currently Selected:
1 SAMUEL 22: KOKBSI
Highlight
Copy
Compare
Share
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
