ADUNHEL 28

Maltayok Kidam

1Hali kijok tang aphel, labang lang-lompe amen Malta pusi than uno. 2Aro lalong kido borbor ajat arleng hel haliyok jinso paklang-ngo, lake la amun arwe aro kichum anat me pakar pisi, hali ahuwityok chidengo. 3La amun Pol po theng ipeng pangrumsi melong thek ngo, me akiso hlongsi ijon abi-aphurul wang olesi anang arilong ingthok dongsi chimere detno. 4Sotong-hlar ajat arlengpo, Pol po ari long phurulpo chiwek lingsi kido theksi anali chipulo, “Labang arlengpo, khanangsi arleng kamari arleng; anang langpe para jok yongta, kime-kangho angban kipipo, anangyok pahrenghre yongot.” 5Manta Pol po ari-hujuk si phurul yok melong phrem putno, ananglong abi hlonghle yongot. 6Manta anang abang arponge, lale photsi kolothetsi thiye pusi anali langphrong si dolo; manta jokha apun inghong langsi, aphel yokta kanghohe theksi, lahel wang chingduk phaksi pulo, “Anangke Arnam!” 7Labang athempo adung Pabliyas amen labang langlompe rongthepo alungle kido. Anang haliyok chingdeno, aro nengdok aneng pen ni-thomyok don badi hali padolo. 8La-amun Pabliyas po anang apo po ase aro apok kidam wor-wor kachiplang apot isit si kido apot, Pol po anang hem apulu yok lut damsi pingkit damo, anang abang long ari batsi, anangyok ase pahamo. 9Ladi kachiplang aphel, labang lang-lompe long kido ahuwit kiso arleng kido, labang ahuwit wangsi kiso melo. 10Lalong anali haliyok banta ako-ong pisi al-eno; aro hali kachikak apor, kanange prek abihini wang pidun si jahaj long wang thal duno.

Malta Para Rom Ayok Kidam

11Chiklo jon-thom aphel, Alekjendriya arongpe ‘diyoskori’ amen, lake “jonja akorte” asin kido ihong jahajpo, labang lang-lompe long kichum apor kido, labang jahajpo long hali arlusi damjongo; 12aro Sirakas rongpe long hlengsi, lalong ni-thom dolo. 13Lalong para hali jahaj pen chirtingwit aduwar wangsi Rejiyam rongpe yok wang hlengo; inirsi aphel ni-tu agak para tomon kijap apot, ni-ni aphel ke Pateyuli rongso yok wanghlengo. 14Lalong hali angkhan kikrol abang pochaksi, anali haliyok lalong hathi irul kido yok chingdukngo; ladisi hali Rom ayok damsi dolo; 15Lalong kido kikrol korte hel hali lam arju hlongsi aro Apiyus hathi longyok wango aro Kithom Don ahemyok hali kapochak yok kiwang; Pol po analiyok theksi Arnam yok kardom pisi neng aha chipado dutno.

Rom Along Arnam Alam Kapahar

16La-aphel hali Rom arongpe long lutdamsi, Pol po yok kihonpon sonturihel pen kampreksi kido yok hawang pilo. 17Ni-thom aphel, anang Jihudi phu-phang helyok taramsi pangrumo; aro anali chingrumo apot, anang pulo, “Ei kortehel, ne ili ajatpo lale sar-lar abi-pun kapangho asal tikike yong; yongta Jerusalem long nenepsi, Roman arlenghel arideng akrol along ne kichampi. 18Anali neyok bisar-otesi, nelong kamari ado pangthek un-eh si, kiphlok aneng kido; 19manta konam Jihudi hel wangteng dun klakngo, Sijar poyok kachi-ojor alam chiplango; layongta nejat po yok isi ado kipi ayok, puke kalek. 20Lasi naliyok kilang aro la kachithan ayok nali taramo, piyok pu tene Israyel yok kachiha anatsi ne labang hirkuli pen chibam hlongdo.” 21La-amun anali anang yok pulo, “Hali nanglam Judiya long para ipak lo ta hlonghle yong; aro korte hel asitem kaita holek wangsi, nang lam isi kangho a-odi parjuje yong, lale wang pupe yong. 22Manta nang kapaklang alamthe ke pot te, labang hali nang para ka-one akime pusi thekdo; piyok pu tene labang kapaklang alampo, hali than-undo, bangpo jotmehelta akangho pusi pudo.’ 23Laparake lahel anangyok inirsi adin pachip si, ako-ong arleng anangyok kapochakyok anang kangning ahem long wango; lalong anang adap para anithuyok Mosipo kanong aro turki hel alo para pur-ponsi, Arnam longri hakhi pisi, Jisu alam analiyok nengrungo. 24Anang lamhel angkhan ke krolo, manta angkhan ke krolkre yongo. 25Lasi anali hijan lam kachikengke apot, anali kachipadi apor en pono; kachikak ango, Pol po labang alam pulo, “Jiuli-Kangthir ke Jisoya turki arideng ili sar-lar hel yok me-atsi pulo, 26‘Labang arleng hel adungyok damne than, anali oneke oneye, manta abhu hlonghle ye; thek ke theknge, manta neng wak phlenphle ye; 27piyok pu tene labang arleng hel mekpen chithekthe ye, ano kardip, ingthin penta abhu hlonghleye, aro chipharlep ke wangweye, aro ne anali kiso pame hlonghle ye, la-anat anali angthin ardipkul, aro karju yok ta ano ingthong klak; aro anali abithang mek hel chisoloksi do.’ 28La-apot nali chithan une, Arnam labang kapajok alam Bang-ajat hel asitemyok padam tolsi do; aro anali bangpo oneye.” 29Pol po labang alampo kipu aphel, Jihudi hel anali ihut para ihut adaksi ajat-jat ahul chipawang dutsi chikak detno. 30La-aphel anang nengkan hi-niyok, abithang nohok kipi ahem dosi, konbak arleng anang dungyok man, lahel ahuwityok chingdensi, 31angkipu wedet si, neng chipangtang dutsi Arnam-alongri alam paharsi, Hemphu Jisu Khristo alam paklangsi kido.

Currently Selected:

ADUNHEL 28: AMRI-BSI

Highlight

Copy