ROMAN 9

Arnam Pen Anang Arlenghel

1Ne Khristo long dosi khanang alam thando chobelbe yong; ne kachiron ta Jiuli-Kangthir along dosi nephan hakhi pido— 2Ne ingthin la-an aduk dopen do aro or-eh lensi nengthin long sohrimsi do. 3Piyok pu tene inghosi a-okpo badike nebithang ajat, ne kortehel aphan, nebithangsi Khristo para hao kipahlong yok ahisa lo hoi. 4Analike Israyel arleng ajat, aro analiyok kachi-al aso adeng, jortang, kachingnak angton kido, kanong kihlong abang, kachirdom, aro seme-kitang hel anali phansi kido; 5sar-lar abangta anali ajatsi, aro anali ajat a-ok badi yongta, Khristo ta anali sitemsi wang plango, anang kithechot Arnam awe-awe bor-eh chokman. Amen. 6Arnam alamthe akijol chiplango, ladike kalek. Piyok pu tene Israyel hel para kiwang arleng ahuwit ta Israyel arleng kalek, 7aro anali Abraham po agijing chiplangsi, aro ahuwit ta anang so-su lo labang ta kalek; manta “Aijak po parasi nang agijing amen-anang doye.” 8Labang lo-kangthir lamthe achoke lalo, a-okpo jipe kiplang aso, anali Arnam aso kalek, manta Arnam seme-kitang kipu aso, analisi agijing pusi alekhot otman. 9Piyok pu tene Arnam seme-kitang alamthe lalo; “Labang apunsi ne wange, la-amun Sara pe ihut aso penso choknge.” 10Ladet kalek; konam ili sar Aijak po, para aso agat dolo apot, Rebeka pe ta labadi ihutpe natsi kido. 11Aso kiplangple amunsi, aro kime lale kangho jatsi katikike amunsi, manta katarampo kar-ih apot, (lasi sal katiki anat ta kalek, 12Arnam karwal tang badi karwal pachok ngo,) anang yok kipu, lake “Aklengpo si amupo aturu asal tiki hlonge.” 13Labang alam lo-kangthir long wido, “Ne Jakup poyok nengdok ngo, manta Esau po yok ne simo.” 14Tene ili pot te pu nang? Arnam long akangho doma? Ladi ke kalek. 15Piyok pu tene anang Mosi poyok kipu, “Ne inghoyoksi jinsodo, anang yoksi jinsoye, aro ingho yoksi bor-eh batdo, anangyoksi bor-eh batne.” 16La-apot, arleng kar-ih kido, lale ki-en dun para ke kalek, manta kajinso kapaklang Arnam parasi chokman. 17Piyok pu tene lo-kangthir along Pharau po yokta pudo, “Ne nang yok kihal ajakong nang paklange, la anat aro pirthepe ajal dungsi nemen kapaharpon aphan, ne nangyok pathelo,” 18La-apot inghoyok anang kar-ih, anangyoksi anang bor-eh piman, aro inghoyok si anang ar-ih, anang yoksi anang angthin parthat man.

Arnam Aneng Akang Pen Kajinso

19Holek nang neyok puye, te “Tene anang akangho pangthek une ma? piyok pu tene Arnam anang kar-ih long inghote ado kol une?” 20Manta ei munusi hel, Arnam yok ado ki-ot unpo nang ke inghote? Kithep tang abihinipo, “Neyok labadi piyok nethepmo pusi kithep poyok pu ye ma?” 21Idum alungle pensi isi ke kilangme aro isike kilangho, labadi hini adorop ka-ote yok, lunglepo aphuthak komarpo thep un-eh ye ma? 22Arnam ke, anang akang kachipaklang ayok, aro anang apharan kapaklang ar-ihsi, kachipangho aphan kahonjok akang kihlonge hel yok ongsi chipanengding si chihilo, 23aro inghoyok jortang aphan anang aporong honjokngo, labang kajinso aron long jortang kapahar aphan si tikilo, 24anang iliyok ladisi, Jihudi abangdet parake kalek, manta Bang-ajat hel asitem parata taramre yongma? 25Labadi si anang Hosiya alo long pudo, “Inghosi nelong kalek, anangyok ‘ne arleng pusi,’ aro ne nengdokde peyok ‘nengdok pe’ pusi tarame.” 26“Aro analiyok ne arleng kalek, ladi alam daklongsi analiyok kithan hlong,” lalong anali kihrengjong Arnam aso pusi amen-anang chitha-ange.” 27Manta Israyel alamke Jisoya po labang alam pahar do, “Israyel aso hel alekha langpe sangtel badi ongman, layongta anali angkhan abang detsi kijok hlonge; 28piyok pu tene Hemphu anang lamthe pathi-otsi aro pa-ordapsi, pirthimipe athak tikisi patange.” 29Labang alam Jisoya turkipo yok aporong kipathan badi, “Tharlon hel Hemphu ili phan agijing bibe nang tene, ili Sodum badi chiplang hlongo hoi, aro Gomora badi pangbaro hoi.”

Pol po Israyel Aphan Kapingkit

30Tene ili pot punang? Bang-ajat hel dhorom kangthir yok ar-ih dunde yongta, dhorom kangthir hlongo, lake kikrol parasi dhorom kangthir pahlongo; 31manta Israyel arleng hel dhorom kangthir kanong pensi tiki-tung yongta, labang kanong pachok un-eh yongo. 32Pot anatsi? Piyok pu tene anali kikrol parake kalek, manta katiki parasi hlongman pusi tiki-tung rongo. Patukung arlong along anali patukung dutno, 33ladi alam kiwi ta do, “Langot, ne Jayon long kapatukung arlong, lake patukung si kijang arlong biye, aro anangyok kikrolpo tharak hlonghleye.”

Currently Selected:

ROMAN 9: AMRI-BSI

Highlight

Copy