ROMAN 8

Ajiuli Long Kido Ajiubong

1Lalong la-apotsi minon ke Jisu Khristo long kido abangke jatsi adai ingjongot. 2Piyok pu tene Jisu Khristo long Ajiuli kido akanong ke, neyok pap aro kithi akanong para pajok ngo. 3Piyok pu tene kanongpo potsi chakche pho a-ok long, tiki un-eh yongo: abithang Asoyok pap det a-ok badi wangtolsi, pap aphan, a-ok long pap adai batsi Arnam pachokngo. 4La-apot ingho a-ok ateng ke kengkam chijorje si, Jiuli atengsi kengkam chijorman, anangke kanong kanange ili longsi pachokman. 5Piyok pu tene ingho a-ok ateng kido abangke a-ok abihini hel chironman, manta jiuli ateng kido abang ke ajiuli alam chironman. 6A-ok long neng kachi-en abang ke akithi, manta neng along Ajiuli aneng kachi-en abang ajiubong aro nengsamdo. 7Piyok pu tene a-okpen kachiron ke, Arnam yok hutur doman; labangsi Arnam kanong arlo chipabekbe— chipabekso ta un-eh, 8aro inghosi a-ok arlo do dundo, anali ke Arnam yok neng pangsam un-eh. 9Manta Arnam Ajiuli nali ingthin long do, tene nali a-ok arlo dode yong, Ajiuli arlo longsi do. Ingho anenglong Khristo ajiuli ingjong, anang ke Khristo long kalek. 10Manta Khristo nali ingthin along doman, yongta pap aphanke nalibangpo akithi; dhorom kangthir aphan Ajiuli si ajiubong. 11Inghosi Jisuyok kithi asitem para pangthuro, anang Ajiuli nali long doman, tene Khristo Jisu yok kithi asitem para kapangthur posi, nalilong kido anang Ajiuli pensi, nali pirthimipe abangpo yok ta panghrenge. 12Laparake, ei korte aro ingjirhel, ili a-ok arlo kidoyok ke a-ok adhar kicho arleng kalek ngo— 13piyok pu tene nali ke a-ok arlo arjak-thur, pu tene nali jibadi yongta thihlonge; manta ajiuli parasi abanglong katikihel paprel-un, pu tene hrenge. 14Piyok pu tene konbak arleng Arnam ajiuli pen kengkam chijorman, labang ahuwit ke Arnam aso lo. 15Piyok pu tene nali kachiphere phakyok turu ajiuli hlongo, ladi kalek; manta pot ajiuli parasi ili “Abba! Apa!” ladi pusi taramman, ladi kachi-al aso Ajiuli hlongo. 16Labang Jiuli abithang, ili Arnam aso pusi, ili jiuli pen hakhi piman, 17aro aso chiplango, tene Khristo pen jortang kidoyok, bor-eh kihlonge aidot chiplango; lasi ili anang pen duk-chihi duno, tangsi ili Arnam bor-eh kihlonge aidot, aro Khristo pen bor-eh kihlonge aidot chiplango.

Moyok Jortang Kipi

18Iliyok potsi jortang chiklange, bangpo pen minon apor kiduk kapachingbar yok jat michangche pusi alekhot otman. 19Piyok pu tene Arnam aso hel wang kachiklang arniyok, kithep-kichor ajal dung ta chihasi inghongdo. 20Piyok pu tene kithep-kichor ajal dung si abithang ar-ih si asisik arlo meng dun detno, ladi kalek; manta Arnam kar-ih ateng kachiha pensi chokngo, 21ladi kachiha pensi, kithep-kichor ajaldungsi abithang ta kipreljong aturu kido para joksi, Arnam asohel jortang kido aphan joknge. 22Piyok pu tene minon hok kithep-kichor ajal dungsi so kiplang abi badi aduk hlongsi, inan ar-emjeng si do hlongdo, bangpo ili chithan undo; 23aro ladet kalek, ili Jiuli-Kangthir abor-eh kihlong cheng abang, ili ta kachi-al aso aphang, lake ili abangpo kijoktang yok inghongsi, ili ingthin long ar-emsi do hlongdo. 24Piyok pu tene ili kachiha pensi jokngo. Minon ke kithek jong kachihapo, labang kachihapo kalek, piyok pu tene dak bangpo thekjong do, bangpoyok ingho chiha do? 25Manta ili dak bangpo thek hlonghle lang, bangpo aphan chiha do, tene ili chihisi bangpoyok inghongne donang. 26Labadisi Jiuli pota ili ki-un-eh along jakong rungdun do; piyok pu tene kanange amun pot badisi pingkit nange, bangpo ili chithan un-eh, manta Jiulisi abithang ili phan kithan nangne alamhel pen ar-emsi chingduk man. 27Aro ajiuli kachironpo potne, bangpo ingthin katorol Arnamsi than-un do, piyok pu tene Arnam aneng ateng, anang kangthir adun hel aphan pingkit chingdukman. 28Aro ili than-un do ke, inghosi Arnam yok nengdok do, anang kar-ih ateng taramo, anali phan ahuwit bor-eh kichok aphan inansi tikisi do. 29Piyok pu tene Arnam Aso ke, ako-ong kortehel asitem ango kiplang badi, lasi Arnam ingho yok ango chinilo, analiyok anang Aso arjan natsi, aporong honjok weno. 30Aro inghoyok aporong honjokweno, analiyok taram tango aro inghoyok anang taram tango, analiyok dhorom kangthir pusi alekhot otno; aro ingho yok dhorom-kangthir alekhot eno anangyok jortang ta pilo.

Jisu Khristo yok Arnam Anengdok Alam

31Tene lamehel alam anat ili pot te puye? Arnam ili phan do, pu tene ingho ili ado kol une? 32Ingho si abithang Aso yok chibibe yongot, manta ili ahuwit aphan anangyok champi detno, anangsi ili yok ahuwit abihini ili pipe ye ma? 33Arnam karwal arleng hel yok ingho ado piye? Arnamsi pap kolsi dhorom kangthir pusi alekhot ki-en pon po. 34Ado kibatpo ingho te? Inghosi thilo, layok ke, kithihel asitem para pangthuro, anang ke Khristo Jisu; anang Arnam ancho-ari aga dosi, ili phan chingduksi do. 35Khristo nengdok parake inghote iliyok patikang un-eh? Kiduk lale tongklak, honjat lale ka-ongkal, pe-rik kangwe lale kiprel, lale nokjir, lamehel patikang une ma? 36Kiwi alamthe pudo, “Ili nang natsi arnijon ta kamari pahlong si do; kithatyok kipon bherabik badisi ili alekhot chiplango.” 37Layong ta, iliyok nengdokpo parasi, labang ahuwit alam ili kihal yongta haldongsi do. 38Piyok pu tene ili Hemphu Jisu Khristo long Arnam nengdok, bangpo para kithi lale ajiubong, Arnam tharlon lale apharan, minon jong lale monphel yok alam, lale kihal ajakong, 39angsong lale aling, lale kamprek kithep-kichor abihini ta iliyok patikang un-eh, ne ladi krolpen do.

Currently Selected:

ROMAN 8: AMRI-BSI

Highlight

Copy