ROMAN 10

1Ei korte aro ingjirhel, nengthin ke ar-ido, aro anali phan Arnam yok angot pingkit do, anali kijok pahlong nang. 2Arnam yok kachirdom aneng arleng do pusi ne anali phan hakhi pido; manta la kachirdom agiyan atengke kalek. 3Piyok pu tene anali Arnam dhorom kangthir chinine si, abithang kaparjap ayok chilangsi, Arnam dhorom kangthir long chipabekbe yongot. 4Piyok pu tene dhorom kangthir aphan kikrol abangten yok Khristo si kijut akanong.

Kijoktang Ahuwit Aphan

5Piyok pu tene Mosi po wilo, te “ingho arleng kanong tikisi dhorom kangthir pusi mainot pon, anangsi bangpo parake hrenge.” 6Manta kikrol para kihlong dhorom kangthir abang ladi pu do, nang bithang ingthin long pu yek, “Ethakpe yok inghote thursi dame?” (lake Khristo yok kapasun yok;) 7“lale, ‘harang longyok inghote sune?’ ” (lake, kithi hel asitem Khristo yok pangthursi kiwan yok). 8Manta bangpo ke pot te pudo? “Labang lamthe nang dung hetsido, nang angho long aro nang angthin longsido” (lake, hali kapahar kikrol nange alamthe); 9piyok pu tene, nang bithang anghopen Jisu yok Hemphu pusi hoicho, aro Arnam si anangyok kithi asitem parake pangthuro, pusi bangpo ingthin long kroldo, tene kijok hlonge. 10Piyok pu tene dhorom kangthir aphan ingthin pensi krol hlongman; aro kijoktang aphan angho pensi hoicho hlongman. 11Piyok pu tene lo-kangthir long pudo, “Inghosi anangyok krolman, anang tharak hlonghle ye.” 12Piyok pu tene Jihudi aro Grik labang ajat prek-prek donangne; abangten aphan ihutdet Hemphu si do; konbak arleng anang ngo pingkit, la ahuwit ayok anang bor-eh apuru do; 13piyok pu tene “Inghosi Hemphu amenpen pingkitdo, anang kijoktang hlonge.” 14Manta Jisu yok, anali krolkre yong, anang ngot pot badi pingkit bo? Aro anang lamthe arju hlonghle yong, anang yok pot badi krol une? 15Aro tolte lengke pot badi pahar dam bo? Ladi alam kiwi wendo, “Bor-eh kichok kime-alamthe kapahar abang akeng konbak athok!” 16Manta ahuwit arleng kime-alamthe mengo, ladi kalek; piyok pu tene Jisoya po pudo, “O Hemphu, hali kapahar alamthe ingho krol lo?” 17Lasi karju parasi kikrol, aro Khristo lamthe parasi arju hlongman. 18Manta ne pudo, anali ke arju hlonghle yong ma? Khanang ke arju hlongo; “Anali asi ajal dungsi pirthimipe yok, aro anali lamthe pirthepe kijut yok chingtang detno.” 19Manta ne pu bang, Israyel abang ke abhu hlonghle yong ma? Kicheng ke Mosi po si pudo, “Aso ajat parasi nalimek kachiso paplange; aro kamango ajat parasi nali neng pakange.” 20Aro Jisoya pota chipangtang si pudo, “Ingho neyok bisarse yongot, anali neyok pahlongo; aro ingho nelamthe kabisare yongot, analingot ne chiklango.” 21Manta Israyel arleng hel alam anang pudo, “Kithan alam kimengme aro kachikeng ke abangyok ne arsini ne ari jarsi dolo.”

Currently Selected:

ROMAN 10: AMRI-BSI

Highlight

Copy