ROMAN 6

Khristo Pen Kithi Aro Kibur Alam

1Ili ke pot te punang? Arnam kajinso kihlong ayok ili pap tikisi donange ma? Ladi ke kalek. 2Ili pap alongke akithi, ili lalong aro pot badi hrengsi doye? 3Lale, ili konbak arleng Jisu Khristo aronsi baptist chiplang hlongo, ahuwit ta anang kithi aronsi baptist chiplang hlongo, bangpo nali chithan un-eh yong ma? 4La-apot Apa yok jortang padosi pot badi Khristo yok kithi asitem para pangthuro, ladisi ilita ajiu akimine kengkam chijornang, la-anat baptist kachiplang parasi anang pen kithidun aphansi ahilik long kibi badi chiplango. 5Piyok pu tene anang kithi badi ilita chingchong hlongo, tene kibur badi ta chingchong hlonge. 6Ili ke aro pap aturu kalek, lasi pap abangpo chipanghon si, ili aban munusi poyok anang pen kros long tarduno, bangpo ili chithan un. 7Piyok pu tene ingho thilo, anang pap para joksi, dhorom kangthir pusi alekhot otno. 8Manta ili Khristo pen thilo, pu tene anang pen ili ajiu pen chingchonge, bangpo ili krolman; 9kithi asitem para kapangthur Khristo aro anang jat thithe, anang phuthak kithipo aro hal un-eh, bangpo ili chithan un. 10Anang potbadi kithi aduk cholo, bangpo ke pap aronsi iphong det dukcholo; manta anang jipe ajiubong aduk cho do, bangpo Arnam aphansi duk chodo. 11Lasi nalita Jisu Khristo long nang pap aphan ke akithi, aro Arnam aphan akihreng pusi alekhot en-no pune chiron. 12Latene nali akithi abang po yok ajatjat kar-ih arlo chipek ke, nali kithiman abangpo long pap pahal hlonge not. 13Abithang abangpo aroremhel akangho katiki abihini badi pap asal long chipek ngek, manta abithang yok kithihel asitem para hreng hlongo pusi Arnam aphan, nali abang arorem hel yok dhorom kangthir asal abihini pusi Arnam yok chipek. 14Piyok pu tene nali phuthak pap hal un-eh ye, piyok pu tene nali kanong arlo kalek, kajinso arlosi do.

Dhorom Kangthir Amurkiya

15Tene pot te? Ili kanong arlo dodesi, Arnam kajinso arlo chiplango apotsi ili pap tikijong nang ma? Ladi kalek. 16Kithi aphansi pap, lale dhorom kangthir aphan kithan alam kimeng, labang hini long nali bithangke kithan alam kimeng aturu badi chipekpe si, labang kithan alam hel mengsi anang aturu chiplangman, bangpo nali chithan un-eh yong ma? 17Manta la-anat Arnam yok kardom pajirnang, aporong ke nali pap aturu kido, manta kachirli alamyok chipekngo, ingthin wakphlen si bangpomar kimengyok nali kithan alamthe arlo chiplango, 18aro nali ke, pap para joksi, dhorom kangthir amurkiya chiplango. 19Nali a-ok long ki-un-eh anat, ne munusi badisi nali thando; piyok pu tene jibadi aporong kangho katiki anat, abithang abang arorem hel akisim aro akangho asal aturu badisi kachipek, ladi ke minon kangthir kihlong dun aphan, abithang abang aroremhel amurkiya badi dhorom kangthir asalyok chipekngot. 20Piyok pu tene konam nali pap aturu kido, la-amun ke dhorom kangthir aphan ke joksi kido. 21Lasi jibak alam anat minon nali chitharakdo; la-amun lamehel along nali pot angban kido? Piyok pu tene lamehel asal kijut ke kithi. 22Manta minon ke nali pap para jokngo, aro Arnam amurkiya chiplango, nali phan apor akime pisi chipangthir hlongo; aro labang kijut ke or-eh len ajiu do. 23Piyok pu tene pap adatke kithi, manta Arnam kipi bor-eh ke, ili Hemphu Khristo Jisu parasi or-eh len ajiubong hlong do.

Currently Selected:

ROMAN 6: AMRI-BSI

Highlight

Copy