ROMAN 5

Kikrol Kangthir Kihlong

1La-anatsi, ili kikrol parasi kikrol kangthir pusi alekhot otsi, ili Hemphu Jisu Khristo parasi Arnam pen ili nengsam do. 2Labang kajinso long arjapsi dohlongdo, labang kajinso long lutdun hlongsi, Arnam jortang abhag kihlongdun chihasi nengrong chipado do. 3Ladet kalek, manta kamprek duk-lak amunta nengrong chipadonang, piyok pu tene ili than un, 4duk-tap hel kachihi wanman, kachihi long aporman piman, aro aporman hel kachiha pachok man, 5aro labang kachihapo patharakre, piyok pu tene ili yok kipi Jiuli-Kangthir pensi ili nenglong Arnam nengdok lisi pilo. 6Piyok pu tene konam ili chakchepho kido, la-amunsi Khristo kanange apunsi Arnam yok kimengme hel aphan abithang ajiu pilo. 7Piyok pu tene dhorom kangthir arleng hel— aphan pudo tene ihut arleng ajiu pipe yongta akime arleng aphan kithiyok ke inghone bak aneng dota hal. 8Manta Arnam iliyok anang nengdok aporman paklangdo lake, la-ango konam ili pap longsi kido, la-amun Khristo ili natsi abithang ajiu pilo. 9Lasi minon Khristo awi pensi dhorom kangthir pusi alekhot otsi, konbak ongchot bor-eh pen ili anang pensi akang along chipajok une. 10Piyok pu tene konam ili hutur naksi kido, la amun Arnam Aso kithi para ili Arnam pen chilok phakngo, tene chilok phaksi, layok ongchotsi anang ajubong pen ili joknge. 11Manta layok ke, Arnam pen minon labang pachilok tango, ili labang Hemphu Jisu Khristo pensi Arnam along aborai chipado do.

Adam po Pen Khristo

12Lasi, jibadi ihut arleng parasi pap wango, aro pap anatsi kithipo pirthepe long wango, aro ahuwit arleng pap katiki anat, labang kithipo ahuwit arlengyok chisang detno— 13kanong kipi ango pirthepe adak pap kido, manta daksi kanong wedung, lalong pap alekhot weman. 14Layongta ingho Adam poyok kithan alam kimengme badike pap tikike yong, Adam po para Mosi po arniyok anali phu-thakta kithipo kihal, labang Adam po kiwang nangepo arjan kido. 15Manta jibadi pap katiki, kajinso abor-eh ladi ke kalek. Piyok pu tene ladi pap katiki anat ako-ong thilo, tene konbak ongchotsi Arnam kajinso aro kajinso abor-eh, la-hini, ihutdet arleng, lake Jisu Khristo kajinso long ako-ong arlengyok bor-eh hlongo. 16Aro pap katiki ihut parasi jibadi pap chiplango, kajinso abor-eh ladi kalek. Piyok pu tene ihut pap katiki para bisar ado wano, manta ako-ong pap parasi dhorom kangthir aphan bor-eh wangpilo. 17La-anat, ihut pap katiki along, ihut arleng apap parasi kithipo halo, tene inghosi kajinso aro dhorom kangthir ong-ongsi hlongman, anali aro ongchotsi ihutpo, lake Jisu Khristo parasi ajiulong kajinso haldong bo. 18Lasi, pot badi isi apap parasi ahuwit arlengyok ado kolo, ladisi dhorom kangthir isi katiki parasi ahuwit arleng yok ajiu long dhorom kangthir kajinso bor-eh pilo. 19Piyok pu tene, ihut arleng kithan lamthe kapangho parasi jibadi ako-ong arleng yok papi ingholo, ladisi ihut kithan alam kamainot parasi ako-ong arlengyok dhorom kangthir ingholo. 20Manta kanong wango, pap katiki pachan ongo; manta daksi pap katiki halo, ladisi kajinso pensi hal un, 21la-anatsi, jibadi kithi aphan dak long pap ong-ongo, labadi si ili Hemphu Jisu Khristo long kido kajinso pensi kikrol kangthir pensi ki-or-eh len ajiuli lut dun uno.

Currently Selected:

ROMAN 5: AMRI-BSI

Highlight

Copy