ROMAN 3

1Laparake Jihudi hel ke pot te akime dolo? Lale sunnot ka-ote pot te kanange dolo? 2Ahuwit alamthe nali pahlongo. Piyok pu tene kicheng amun ke, Arnam angho alamthe hel Jihudi helyok kipek; 3angkhan ke krolkre detno apotsi pot chiplang bo? Anali kikrolkre anatsi Arnam ke wang meng dundesi doye ma? 4Ladi ke weye, ahuwit arleng chobe yong ta, Arnam ke khanang pusi thek nange; labang kiwi alam do, “Nang ke nang bithang kithan alamthe long kangthir alekhot dohlonge, aro bisar amun hal pene.” 5Manta ili akangho tiki pon tangsi Arnam dhorom kangthir aporman hlongdo, pu tene ili pot te punang? Labang aneng akang kapachok tang Arnam akangho ma? (ne munusi badisi thando.) Ladi kalek; 6akangho lo tene Arnam pirthepe yok pot badi bisar-ote bo? 7Manta ne asisik parasi Arnam khanang po anang jortang aphan harman, tene minon papi pusi neyok piyok bisar-ote phakdo? 8Aro piyok akime kiwangyok akangho tikike?— ladi pusi angkhan ke ado ili kipiyok ladi pu do. Anali wang kipudun alam abisar kadhorom do.

Ihut-ta Dhorom Ingjong

9Laparake pot te? Ili Jihudi hel, Bang-ajat yok kimechot ma? Jat kalek; piyok pu tene ili ango Jihudi aro Grik abang ayok labang pap ado pihlongo, 10kiwi alamthe badi: “Ihut ta dhorom kangthir arleng ingjong peno, ihut ta ingjong; 11kachiron thek ihut ta ingjong, Arnam yok kar-ih ihut ta ingjong. 12Ahuwit kangho aduwar damo, inan chakchepho chiplango; kime kengkam kachijor arleng ingjong, ihut ta wepeno.” 13“Anali angphun alangjol mokol thiri natsi; anali ade pen chobeldo; anali angtur arlo abi akujuk hel do.” 14“Anali angho hel hao pen akiho plengsi do.” 15“Anali keng-kam awi kapajang yok kidam karjang, 16Anali ahuwit kidam aduwarhel kanghon aro duk-lak chitongman, 17anali nengsam aduwar chithek kel hlongo.” 18“Anali mek ango Arnam yok kaphere wepen.” 19Hali than-undo, kanong long potsi pudo, ahuwit angho alam kapadosit yok, aro pirthepe dungsi Arnam ango ado kidoyok, labang ahuwit kanong arlo kido abangyok pudo; 20piyok pu tene kanong kamainot para ke pirthepe adak ihut ta, Arnam ango kangthir pu ke alekhot chiplangple; kanong parasi pap alam agiyan wang plangman.

Potbadi Arnampen Kangthir Ilibiman

21Manta minon kanong aro turki hel hakhi piyong ta, Arnam dhorom kangthir alamthe chiklangdo; 22Arnam labang dhorom kangthirpo Jisu Khristo long kikrol parasi kikrol abangten yok pahlongman; piyok pu tene ihut ta jat kamprek kalek, 23ahuwit pap tikilo, aro Arnam ajortang chipangbo lo, 24manta Jisu Khristo longsi kijok do, labang parasi Arnam para adorwesi kajinso hlongsi dhorom kangthir pusi alekhot chiplang un. 25Arnam anang kangthir kachihi apharan anat, aporong katiki ajat-jat pap ado ot-eh detsi kido apot, abithang dhorom kangthir kapaklangyok, aro inghosi Jisu Khristo awilong krolman anang ke pap para jok un pusi alekhot kachiplang un aphan, 26aro labang pachok tangsi, anangke dhorom kangthir kidolen aphan Jisu ayok kikrol abangten, pap-kiron aphansi anangyok pachiklango. 27Labang aphel, ili jiu aborai daklongdo? Bangpo terek detno. Pot badi akanong pensi? Sal katiki akanong pensi ma? Kalek; kikrol kanong pensi. 28La-apot kanong kimeng asal tikike yongta, kikrol pensi arleng dhorom kangthir pusi alekhot otman, hali chihlongo. 29Arnam Jihudi hel aphan detsi Arnam ma? Anang Bang-ajat aphan ta Arnam kalek ma? Oik, Bang-ajat hel aphanta, 30piyok pu tene Arnam ihutdet apot, sunnot kachiplang abang kikrol anat, aro sunnot kangwe abang kikrol parasi dhorom kangthir pusi alekhot enbo. 31Tene ili kikrol parasi kanong pachilut detdo ma? Ladike kalek; kanongsi pachipket do.

Currently Selected:

ROMAN 3: AMRI-BSI

Highlight

Copy