ROMAN 15
15
Abithangyok Kalek, Bangyok Aneng Pangsam
1Ili kikrol abang ke, ili bithangyok neng pangsamse si, kikrol un-eh helyok kirung un-eh abhar natsi rungdun nange. 2Ili abangten ibithang akung abangyok dhorom kihari yok, anang kimeyok, anangyok neng pangsamot. 3Piyok pu tene Khristo ta abithang aphan ke neng chipangsamse yongot; manta jibadi lo long wido, lake, “Nangyok nang kapatharak abang kapatharak alam nephuthak wango, ladisi chiplango;” 4Piyok pu tene aporong ahuwit kiwi alam, ili chineng-otsi aro lo kiwi alamthe hel, ili nengkirung pon kachirli chiha ayok labang hel wilo. 5Lateng nali isi anengpen isi alamthepen ili Hemphu Jisu Khristo Apa Arnam ayok jortang pinot, 6la-anat Arnam yok jortang kipi isi alamthe kachiplang yok aro Apa ili Hemphu Jisu Khristo long nali inan lamthe isi chiplang une.
Jihudi Pen Bang Ajatyok Inan Kime-Alamthe
7La-apot, Arnam jortang kapado aphan, jibadi Khristo naliyok chidengo, ladisi nalita ihut para ihutyok chidengot. 8Piyok pu tene ne nali pudo, sar-lar hel kapang-ak hel kapachip yok, aro Bang-ajat helta Arnam kajinso anat anangyok jortang kipi yok, Arnam khanang pen Khristo sunnot kachiplang abang amurkiya chiplango. 9La aphan lo long wido, “Lasi ne Bang-ajat hel asitem nangyok parklame; aro nang menpen lun lune.” 10Aro puphak do, “O Bang-ajat hel, anang arleng hel pen nengrong chipado.” 11Aro puphak ngo,“O ahuwit Bang-ajat hel, Hemphuyok parklam;” 12Aro Jisoya pota pudo, “Anangsi Bang-ajat arleng helyok kapangdom yok thursi dame, Jesi po para labadi irong angjok wange; anangyok Bang-ajat hel meng penbo.” 13Lasi nali Jiuli-Kangthir jortang pensi kachiha ongpon, lasi kachiha apharan Arnam nali long, kikrol ahuwit nengrong aro nengsam pawang nang.
Pol po Pangtangsi Kiwi Aron
14Ei ne korte aro ingjirhel, nali lam ne bithangta krolsi do, nali ahuwit agiyan pensi, aro ihut para ihut yok ahari pipon thek si, akime agunhel chansi wangdo. 15Layongta labang nali neng kachipurki aphan ne chihasi wilo, piyok pu tene Arnam kajinso neyok pilo. 16Khristo Jisu Bang-ajat hel aphan katiki yok Arnam kime-alamthe long murkiya badi chiplangsi do, tangsi Bang-ajat hel kipi banta pomar Jiuli-Kangthir pen pangthirsi chideng pon une. 17La-amun Arnam badi katiki alam ke, Jisu Khristo long ne aborai do. 18Piyok pu tene asombhik asin aro bismat angtar hel anat, Jiuli-Kangthir apharan pen, Bang-ajat helyok kithan alam hel kimeng aphan, lamthe aro katiki long ne parasi Khristo jibak pachokngo, labang aparke prek jatsi kipuyok ne aha dode ye, 19asombhik asin aro asot hel Arnam Jiuli apharan pen tikisi, Jerusalem aro Iliriyam long yok artingsi Khristo kime-alamthe me-atsi paharo. 20Aro ne kar-ih ke Khristo alam karjuje athem long kime-alamthe kapahar yoksi, bang kapahar abhitipo athak kemke, manta jibadi lo long kiwi do, te “Ingho angot anang lamthe than damde lang, analisi theknge, aro inghosi arjuje lang, analisi abhu hlonge;” 21Labang kichok badi, lasi, mehel athem Khristo amen pahar damde lang, labang athem long kime-alamthe paharyok ne mesosi tikilo.
Pol po Rom Ayok Kidam Alam Kachiron
22Labang aronsi ne nalidung kiwang yok wang kitengdun ong abang dolo. 23Manta minon ke labang ahol ne katikiyok aro athem hlonghle si, Ispain alongri kidamjong amun, nali dung ayok kidampen yok jokha anengkan para nineng ar-ih si do, piyok pu tene ne chihasi do, 24ne Ispain yok kidam amun ne nali kilange anengdo, aro ango nalipen chithansi nengsam si, la aphel nali parasi lalongyok pango si nepon hlonge. 25Minon ke kangthir adun hel aphan kapahar aphan Jerusalem yok damsi do. 26Piyokte pu tene Mesidoniya aro Akhaya alongri arleng hel Jerusalem kido kangthir arleng hel asitem kicho kangwe hel aphan, bekso banta kapajirdam akime thek hlongo. 27Piyok pu tene me-at chithek hlongo, aro anali adhar kicho chiplang hlongsi do. Piyok pu tene Bang-ajat hel jiuli alam anat analipen chingchongo, tene a-ok alam anat anali al-ki-en along adhar chosi dohlongdo. 28La-apot lamehel asal patangsi, lake anali phan kirung banta bor-eh hel analiyok champi tangsi, ne nali dungsi Ispain ayok dame; 29aro ne than undo, nali dung kidam amun Khristo bor-eh plengsi dame. 30Ei korte aro ingjirhel, Hemphu Jisu Khristo amen pen, aro Jiuli-Kangthir nengdokpen nali nephan, Arnam angot pingkitsi nephan nengchipine meso katikiyok, nalidung chingdukdo, 31Judiya long kithan alam kimengme hel para ne kijok-un yok, aro Jerusalem yok ne kapahar asal, la kangthir adun hel angot chideng pame nang, 32lasi Arnam kar-ih pen nalidung nengrong damsi, nalipen neneng chipangsam bang. 33Nengsam Arnam nali ahuwit long pado dun nang. Amen.
Currently Selected:
ROMAN 15: AMRI-BSI
Highlight
Copy
Compare
Share
Want to have your highlights saved across all your devices? Sign up or sign in
AMRI KARBI N.T. - AKIMI ANGTON N.T.
Copyright © 2014 by The Bible Society of India
Used by permission. All rights reserved worldwide.
