ROMAN 14
14
Nali Korteyok Bisar Oteyek
1Ingho kikrol un-eh yong, anangyok nali enpon; manta lam kachihul abisar aphan ke kalek. 2Inghone bakpo ahuwit abihini kicho phrotyok kikrolpo do; manta ingho krol un-eh yong, anang han-bapsi choman. 3Ingho choman, anang kichochepo yok patharak ngek; ingho choche anang kicho po yok bisar oteyek; piyok pu tene Arnam anangyok chidengo. 4Nang ke bang atoru yok bisar ka-ote, nang ke ingho ma? Anang abithang ahem ahemphu angot un tene arjak dunman lale ingho man. Aro anangyok pathirpiye, piyok pu tene Hemphu analiyok pathir un man. 5Inghone bak ke inirsiyok prek adinyok mainot chotdo; kamprek ihut ke arniten ta inansi mainot do. Abang ten abithang aneng long kaphere wesi chinengtang ngot. 6Inghosi me-at adin pusi mainot do, anang Hemphu aronsi bangpo mainot do; inghosi choman, anang Hemphu aronsi choman; piyok pu tene anang Arnam yok kardom piman; aro inghosi choche, anang Hemphu aronsi choche; aro Hemphu yok kardom piman. 7Piyok pu tene ili kaita abithang aphan ke hrenghre, aro kaita abithang aphanke thithe. 8Lasi, ili hrengman, tene Hemphu aronsi hrengman; aro thiyong ta, lasi Hemphu aronsi thiman; labang anat hrengman lale thiman, ili Hemphu pensido. 9Piyok pu tene akithi aro akihreng hel Hemphu kachiplang yok Khristo thilo aro hreng phakngo. 10Manta nang piyok abithang korte ayok bisar oteman? Nang korte ayok ke piyok pangwe detman? Piyok pu tene ili ahuwit ta Khristo bisar ka-ote anghol angot arjap dam hlonge. 11Piyok pu tene lo-kangthir long wido, “Hemphu pudo, ne hrengsi do, ahuwit ta nengo tarhuksi nechirdom nange, aro abangten ade Arnam jortang pisi hoi chonange.” 12Lasi laparake, ili abangten Arnam angot abithang alam alekha pihlonge.
Nang Korteyok Patukungek
13Lasi wangot, ili ihut para ihutyok bisar ote nangne lo; manta nali ke, korte ango patukungek lale kijang thengtut chibi nangne pune chipachip mot. 14Ne than-un do aro Hemphu Jisu amen yok krol pendo lake isi abihini ta akisim ingjong; manta ingho jipe abihini ta akisim pusi chirondo, anang phan labang abihini akisim chiplang man. 15Nang kicho abihini para nang korte aneng doho man, tene nang aro nengdok pen kengkam chijorje yong. Ingho aphan Khristo thilo, anangyok nang kicho abihini parake panghoyek. 16Lasi nali akimepo akangho puke pathan hlongek. 17piyok pu tene kicho lale kijun parake Arnam-alongri chokche; manta dhorom kangthir, nengsam, aro Jiuli-Kangthir kipi nengrong, lamehel si Arnam-alongri long khanang. 18Labang alam anat inghosi Khristo murkiya asal tikiman, anang Arnam nengdokman aro arleng hel angot aporman hlong tango. 19Lasi nengsamjin, aro ihut para ihut yok kapangthur alam jibak do, lamehel mesone tikinang. 20Kicho abihini anat ke Arnam asal pangho yek. Ahuwit abihini ingthir phlen; manta nang pot cholo labang nang kapangho yok tikilo; 21nang korte yok patukung do, pu tene a-ok kicho, lale hor kijun, lale labadi kamprek hel tiki ke si kime. 22Nang long kikrol do, bangpo nang Arnam angot pap hoi kicho aphan chibi. Ingho bangpo lam wang kabisar nange dode anangke bor-eh chok. 23Manta hik-hak laksi cho, cholo pu tene ado batman, piyok pu tene labang kikrol ateng tikike yong; piyok pu tene jibak kikrol ateng tikike, bangpo ahuwit pap dolo.
Currently Selected:
ROMAN 14: AMRI-BSI
Highlight
Copy
Compare
Share
Want to have your highlights saved across all your devices? Sign up or sign in
AMRI KARBI N.T. - AKIMI ANGTON N.T.
Copyright © 2014 by The Bible Society of India
Used by permission. All rights reserved worldwide.
