ADUNHEL 27

Polpo Rom Alongriyok Jahaj Pen Kidam

1La-aphel hali Itali alongriyok jahaj pen kidam pen alam chipachip tangsi, anali recho Akithe sonturi long Juliyas amen aphoro sonturi aghaipo arideng Pol po pen angkhan akrol kido abangyok champilo. 2Lalong Asia alongri akung-kungsi kidamyok kahonjok si, Adramitiyam long jahaj hali arlusi, langpe aduwar damsi dolo. Hali pen Thesalonika para kiwang Mesidoniya arleng Aristarkhas po ta kido. 3La-aphel arni Sidon arongpe long jahaj hlengo, Juliyas po Pol po yok injinsosi anang alok hel adung damsi neng chipangsam yok hawang pilo. 4Lalong para hali langpe aduwar damjongsi, tomon kithe kijapsi, hali, Saipras lang-lompe akungsi damo. 5La-aphel Silikiya aro Pamphiliya amahangsi arpatsi, Lidiya alongri, Mira arongpe hlongo. 6Lalong aphoro sonturi aghaipo, Itali alongri kidam Alekjendriya rongpeyok kidam jahaj ihong hlongsi, haliyok labang jahaj long parlulo. 7Ladi arni kiding dam helsi, aro duk-lak pen Kinidas arongso adungsi, tomon hali tengsi, Kret lang-lompe akung kung, Salmoni chirpatsi, 8duk lak pen langlompe akung kung damsi, Kijok Arlok amen isi athem hlongo; labang adungsi Leseya rongso adung kido. 9Ladisi kihleng abhemsi, aro An Kihum-kamai arni kidam tang apot langpe-athak kaphere meme chiplang si, Pol po analiyok chirwalsi pulo, 10“Ei arlenghel, ne thek hlongdo, labang langpe-athak kidam akisum do aro chipanghon nangbo; lasi dorop aro jahajpo, ladet kalek; manta ili jiuta chipanghon nangbo. 11Lasi, aphoro sonturi aghaipo Pol po kipuyok ke, paton pen jahaj ahemphu poyoksi mengdun chotno. 12Aro labang arlok polong kichum ongsi langpe akung do-un-eh theksi, ni-ting ni-chel aro ni-tu ni-chel aga aphutangsi kido Kret along Phoyenis arlok arpat uno pu tene, lalongsi kichum adak kido anengwesi, aki-ongchot jahaj ponsi lalongyok kidam chikengo.

Langpe long Tomon Akithe Kiwang

13Konam ni-tu aga tomon wang jir-jiro, anali kachiron atengsi chokbo pusi chironsi, jahaj ponsi Krete akungyok ponsi dolo. 14Manta bekso kidamjong aphel, lalong ‘urakulu’ amen, lake ni-tu ni-hang para kijap atomon kithe wangjap mo; 15aro jahajpo yok tomon kiteng anat, tomon amahang pango un-ehsi, jahaj poyok tikang hrol hlongo, la-amun haliyok tomonsi pono. 16Lasi Kauda amen aso langlom akung kung damsi, chipaduk manta aso tilong isi ot-duno. 17Aro bangpo angsong bat dungsi, potdi si jahajpo alingsi bamket si bilo; manta Syrti along sangtel athak chingthang mene pusi chipheresi kihing ape aplangpo pasuno apot, anglangsi damo. 18Aro tomon akithe japsi, jahajpo pling-plangdetno apot, aphel arni ke angkhan bihini-athul hel jahaj athak para war detno, 19aro nithom arnike anali abithangsi jahaj abihini hel war krengo. 20Jokha adin yok hali arni lale chiklolangso thek hlonghle yongot, aro or-eh len tomon abau angkijap lensi, hali jiu chipajok yokta chiha un-eh pholo. 21Bekso adinyok arleng hel an wepho kido apot, Pol po anali sitem arjapsi pulo, “Ei arleng hel, nali labang akisum kachitong aro ili kanghonhe yok, nelam onesi, Krete para jahaj wan nangnelo hoi. 22Manta minon ne budi-sere kithaneke lalo, “Aneng aha chipado; piyok pu tene nali sitem ihut arleng inghoheye, jahaj po detsi inghoye. 23Piyok pu tene ne Arnam arleng, aro inghoyok chirdoman, 24aro anang tharlonpo kidam anuwe nedung wang arjap dingsi pulo, “O Pol po, phere yek; Sijar po ango nang arjap dam nange; aro langot, nang pen jahaj long kidam abang ahuwit yokta Arnam nang aridengsi pilo.’ 25Lasi, ei arleng hel, nang aha chipado; piyok pu tene neyok potsi nekithan, ladi si chiplang pene, Arnam yok ne ladi krolsi do. 26Manta dakne bak isi lang-lompe long ili jangdam hlonge.” 27La-aphel Adriya langpe long haliyok li-li aga pon-worsi, nuwe kere-phili arni ajo-jarlo apun, dakne bak bam akung wang hlengo pusi jahaj pen kidam atoru abang chirono. 28Lasi anali lang akarnuk punsi, angkol-hini angruk karnuk hlongo, 29aro bekso damsi, lang kipun phakyok ke, ingruk kere-phongo karnuk hlongo, aro arlong along tongbo pusi pheresi, jahajpo aphel agak phili awek tisi, aro katha-ang aphan pingkitsi dolo. 30Manta jahajlong paton abang ango aga awek kipi asolsi, langpe long tilong pasunsi chipajokyok kikat awak chilango; 31manta Pol po aphoro sonturi salchakpo yok aro sonturi helyok pulo, “Lahel jahaj long dode tene, nali bithang chipajok un-eh ye.” 32La-amun sonturihel tilong arikpo rotsi, bangpo langlong pajango. 33La-aphel adap katha-angbo amun, Pol po anali ahuwit yok bekso an-cho jun tolyok chingduksi pulo, “Mini ni-kere-phili yok nali chinghong si, 34nali chohlonghle si, an-lang wesi do, lasi nali chingduk do, nali bekso ancho not; piyok pu tene labangsi nali ajakong piye; piyok pu tene nali ihut ta nali phu achu-ikok ta chingbobe ye.” 35Labangpo pusi, anang himpo ensi, ahuwit ango Arnamyok chirdomsi, him-ingbengsi cholo. 36Laparake anali ahuwit ta ahado dutsi anali bithangsi an cholo. 37Jahaj long hali kidokangwe phoro hini-ne bang kep thorok-isine bang thorok arleng kido. 38Ahuwit an chosi neng ingsamsi, anali gom asok hel langpe long tisi jahajpo parjang tango.

Jahaj Kachingho

39Konam tha-ango, anali labang athempo chinine yongot; manta langpe apar anali adop-plang athem ilong thekngo, anali un pu tene jahajpo lalong pango ponsi biye pusi chironsi, awek hel rot detsi langpelong tikango; 40aro la amunsi anali arik hel phloksi, tomon along aplang pomar tarsi labang adop-plang athem longyok pango pono. 41Manta hini alangpe kachitok athem hlengsi, jahajpo sangtel along chingthango; la-amun ango amahangpo thirkuk si phodamo, aro aphel aga lang-adul anat jahajpo chingho ropmo. 42La-amun akrol arleng inghone bak ke langpe ingjongsi kaknge pusi chironsi, sonturi hel analiyok kamari yok chirwalo. 43Manta aphoro sonturi aghai poke Pol po yok pajokyok chironsi, labang kamari kachiron po para analiyok tengklaksi, ladi thano, “Inghosi lang ingjong thek, lahel ango chonsi bam alongyok damot;” 44aro kiri-er hel ke tokta, lale jahaj long ingho potsi pahlong, labang penne damot. Labadi si ahuwit ta bamyok damsi jokngo.

Currently Selected:

ADUNHEL 27: AMRI-BSI

Highlight

Copy