ADUNHEL 26

Pol po Agripa po Ango Abithang Kachiral

1La-aphel Agripa po Pol poyok pulo, “Nang bithang aphan lam nangyok kapathan ayok apor pido.” La-amun Pol po anang ari-jongsi abithang alam angthan duno. 2“O Agripa recho, Jihudi hel neyok potsi ado ne koldo, la ahuwit alam nang ngot ne mini nebithang aphan than hlongsi, ne korom-kime do pusi ne chirondo. 3Thanbang pu tene Jihudi hel adak potsi abi-pun aro kachingbarbe alamdo, labang ahuwit nangthan unsi do; lasi nang chingduk do, nang chihine ne lam onenot. 4“Ne kengkam-kachijor, riso apun para abithang ajat asitem aro Jerusalem long kido ahuwit Jihudi hel kicheng cheng para thek kreng. Ne longri pen Jerusalem long kido, bangpo ahuwit Jihudi arleng thekdet. 5Anali kicheng adak para neyok kachini apot, hali adhorom along akisumchot abi-pun alam, labang abi-pun badi ne ke Pharisi chiplangsi cho-arjaksi kido, labang hakhi kipi nange ahisa dotene hakhi pi-un. 6Arnam nali sar-lar hel ango posi kapang-ak kido, labang kachiha anat ne minon bisar hlongsi, arjapsi do. 7Labang kapang-ak athe kapahlong yok, hali kere-hini ajat anuwe-anerlo nengrungsi chirdomsi, chihasido; labang kachiha alamthe, O recho, Jihudi abang neyok ado koldo. 8Arnam kithi helyok pangthuro, bangpo nali kachiron kachibem amun piyok krol un-eh pho pusi chirondo? 9“Ne ta labadi Najaret Jisu amen lang setsetsi kangho asal katiki ayok ne bithang kachiron; 10aro ladisi ne Jerusalem long katiki; lake bor-bangthe salchak hel para apharan hlongsi, ako-ong kangthir arleng hel yok akrol long kibeng; aro analiyok kamari apor, ne ta kachikeng dun. 11Ahuwit Arnam ahem long, analiyok aduk pijongsi, anali kikrolpo dhorom kapatharak hlong ayok, ladi anali phuthak akang kidosi; kamprek alongri arongpe helyok ta aduk kipidam.

Pol po Abithang Dhorom Kilut Alam Kachithan

(Aka. 9:1-19; 22:6-16)

12“Labang aron anatsi bor-bangthehel jakong aro thansi kiwi alo pahlongsi, Damaskas yok kidamjong amun si. 13O recho, anelo apor, duwar asitem arni aturyok katha-ang chot isi katha-ang athak para nepen kidam abangyok chikomwelsi kachiklang thek hlongo. 14Aro hali lungle athak kijang amun, ‘O Sol, O Sol, neyok piyok aduk nepido? Chorme kangchim long kitur nang un-eh ye, pusi Hibru alampen neyok kipu alam asi arju hlongo.’ 15Ne arju dunsi pulo, ‘O Hemphu, nang inghote?’ La-amun Hemphu pulo, ‘Inghoyok nang aduk pido, ne labang Jisu. 16Manta thurnot, nang keng chipangtangne arjap mot; piyok pu tene nang kachiklang amun neyok thek hlongo, aro aphel yok ta labang arleng hel aro Bang-ajat hel arideng para nangyok pajoksi, jibadi chiklangsi ne nangyok klange, labang ahuwit alam aharapo, aro hakhi kipiyok, nangyok karwal aphan ne nang chiklango. 17Aro anali neyok kikrol parasi pap-kolman, aro kangthir phlen kachiplang asitem aman dopon, 18labang chironsi anali mek kapachar yok, analiyok kangting para kapatha-angyok, aro si-ik arlo para Arnam ayok kachipharlep aphan, anali sitem ne nangyok toldo.’

Pol po Abithang Asal Alam Kithan

19“Tene O Agripa recho po, ne la athak kachiklang alam mengme ke dodesi, 20ango ke Damaskas aro Jerusalem long kido abang ango, tangsi Judiya alongri dungsi aro Bang-ajat arleng ango ta, anali neng Arnam yok chipharlepsi, aneng chipharlepsi, kamichang asal tiki pono, lasi paharo. 21La-anatsi Jihudi hel Arnam ahem long neyok nepsi kamari yok rono. 22La-amun Arnam angkirung dun hlongsi, minihok krolsi do; 23aro Khristo aduk kicho aden hlong ta hlonghle ta, kithi asitem ango kibursi, abithang ajat Jihudi hel pen Bang-ajat hel yokta katha-ang pachiklan hlonge, lale hlonghle ye, labang alam ne akithe-akibek ahuwit ango hakhi pisi, turki hel aro Mosi po potsi kachiplange alam kipu, labang aparke prek alam thanthe yong.” 24Pol po, ladi anang abithang kachiral alam angkipu amun, Phestas po hang chersi anangyok pulo, “Ei Pol po, nang ingcham chiplango; kithek ongsi ingcham nang ote do.” 25Manta Pol po pu phakngo, “O Phestas kithepo, ne ingcham kalek; manta khanang aro agiyan alamthe si thando. 26Piyok pu tene rechopo ta labang alamhel thek kreng; lasi ne anang ngot aha pensi thando; piyok pu tene ne khanangsi than-undo, labang alamthe anang ngot isita butite yong; piyok pu tene labang chi-arsit ke chiplangple yong. 27O Agripa recho, nang turki hel alam krolman ma? Ne than-undo, nang ke krolman. 28La-amun Agripa po Pol po yok pulo, nang neyok khristan kachiplang ayok, labangso kithan pensi ka-ote yok neneng rungdo ma?” 29Manta Pol po pulo, “Ne detke kalek, inghosi nelamthe arju hlongdo, lahel ahuwit bekso alampen yongta, lale ako-ong alam yongta, labang hirkuli kibam apar ke, ahuwit anang ne badi kachiplang yok pachiron tol, Arnam ango labangsi pingkit sido.” 30Latangsi recho, gobornorpo, Bernis pe aro lalong kangning ahuwit ingthursi, 31chiterek dam si, anali ihut para ihut chipulo, “Labang arlengpo kithi nange lale akrol kibi nange isi asal tikike yong.” 32Aro Agripa po Phestas po yok pulo, “Anang Sijar po yok kachi-ojorje tene, anang ayok pajok uno hoi.”

Currently Selected:

ADUNHEL 26: AMRI-BSI

Highlight

Copy