EPHESIA 4
4
Tak khat anga lung kan rualna
1Puma ama ruia ren inna ka om hi ka na manjet ani nangni hi ama han ana kui karra asat ringkhuo han lui om ru. 2Lungnem, man kan rit, man kan sin le kan ruaia, lungsiat hin khat le khat chunga kan khangtheiru. 3Thavang Thiang ning ana pek lunghip na han kan rual na neiru. 4Taksa khat sunga Thavang khat a om anga taksa khat lungdo khat mit en khat chang ranga nangni hi ana lui kui. 5Pathian khat, takngai na khat tuija baptais tho om khat jak ani. 6Pathian khat, kan pa khat jak ani, amahi chunga a om ama tenna irakip a honga nan sunga a om.
7Lunghip na chuan ha keini jiang Jisu Khrista ning kutchoi ja ana pek. 8Pathian chong thiang in ati, Jisu Khrista ning chung tiang alui kal han mitam alui chur ama le kan ruaia hale kutchoi ngaiha alui pek. 9Ijarra mo ama han chung tiang alui kal? Ti ko ama han alui hong chum han ramuol a torna tenna alui che mo? 10Chung tenna a hong chum amaha thuai tenna chung tiang a kal ha ani. Vanram ma phur rakip hi ama han a jet pet. 11A ma kutchoi ngaiha ko, mi aviar ning Pathian tirlon, aviar ning tashanthei, Pathian chong ri, aviar ning belramsel, hale aviar ning oja, chingna manchu ninanti. 12Mi thiang ngai ning puma chuan tho rang le biakrup man thiang thei na ranga puman a nei man ani. 13Hiva ruia keini lung khat jak changa takngai na hi jom khat jak changa Jisu hi Pathian nai ani tia lui nang puitung mi khat changa Khrista ama omchan na om rei. 14Hale keini hi rothi phaivuo ning amun khat le amun khat a choi tor nai pangngai anga nima rei. Kan lung det a om rei mi saluingai ning ani lui lam ma man kan tuang maru. 15Hiva rahut a lungsiat na chong dik ha riru, Khrista hin kan lu man changa chuan rakip a kan son de det rei. 16Jisu a kut thuaija kan taksa rakip ha a kontong, hale tak ruang rakip ning an chuan an chuan an tho karra taksa ha a man kan son na a man kan lungsiat pet.
Khrista jiang ringkho thar
17Pathian minga kati ani, Jatdangai ringkhuo a nem lui mi kan ni tia om lai maru nan lung sunga; 18hava vakhal han Pathian na manjet noning, a jing na lam ma Pathian jet luija mi pang ringkho hin an om. 19Anmani ning thui saluija an lui om ma an taksa ringkhuo ngaiha ani lui lungdo le athiang lui chuan na an lui kan pek.
20Ajarko nang ni jiang Khrista a ruia na lui ripe ma u. 21Jisu jiang adik a om tia na lui man chu ma u tia kan ngaidon. 22Atunko nangni chunga a salui nun chan ngai rakip mi en lal leisei chong, taksa ning adei rakip ha mak taru. 23Hale nan ngaidon nan lungdo ngaiha pum tharra man thar taru. 24Pathian tenna a hong adik ringkhuo le a thiang lam ma puma anga athinga om taru.
25Tu khat ning om ani lui leisei chong ri maru, chong dik ha nan u nan naingai jang riru ajarko keini Khrista le kan om suam ani. 26Mi an khat ning lung hui luia a om karra siatna chul ma rase, a lung thak ha ni man taak luia om rase. 27Seitan jiang a salui tho ranga phat pek maru. 28Mi rukngai ning a ruk chuan ha banga chuan sat ha phut rase u, lung thianga chuan sin na ring rase hale ariangai ha sanru. 29Chong salui ha nan murra mas suak maru, a nem na om chong jak ha riru, hi aninko nan ri chongsat han a ngai mirakip jiang asat ha ni nati. 30Pathian tenna ahong Thavang Thiang ha man pong maru nan sunga a om thavang ha nang nin a selpu nan ni Pathian ning a masua rang phat a la hong rang ke. 31Nang ni tenna lung tel lung hang enda, en lal lung nat rakip ha mak taru. 32Hale nang ni khat le khat chunga kan lungsiat nale kan ngaidam na neiru, Pathian ning Jisu Khrista tenna ina ngaidam anga kan ngaidomru.
Currently Selected:
EPHESIA 4: AIMOLBSI
Highlight
Copy
Compare
Share
Want to have your highlights saved across all your devices? Sign up or sign in
Aimol (Re-edited) NT - Rabu Athar
Copyright © The Bible Society of India, 2016.
Used by permission. All rights reserved worldwide.
