EPHESIA 3
3
Paul jatdangai ranga chuan a tho na
1Paul kei ning Jisu Khrista chongsat ruia jatdangai rahut a ren inn na ka om. 2Ajarko nang ni ning nan jet Pathian ning ana lungsiat jarra hiva chuan hi nangni satna ranga a na pek ani. 3Pathian ning a tho jot a lungdo chuan rakip ha ruk a ana lui ri han kei ning akip a che chunga ka lui jiak ani. 4Kei ning ka jiak rakip ha nan pa karra Khrista ning kei jiang ina manjet rakip ha jet nanti. 5Hiva Pathian chong ruk hi a chesa phat han tute khat jiang lui ripe mak tak-ha atunko Pathian Thavang Thiang hin tirlonngai le Pathian chong lui ringai jiang a man mu jui. 6Pathian chong ruk ha ko, nang ni jatdangai ngaihi, Jiwngai le tak khat anga ana man om jui, Jisu Khrista chongsat jarra Pathian phual rakip ha Jiwngai le a kan ang rip amu rang nan ni.
7Puma a chongsat ngaiha ri ranga keihi ana thang suak jui, hiva chuan tho torna ranga ranak ana pek. 8Keihi mi thiangai karra asin tak kani nom tok a mu torlui rang Jisu Khrista a chongsat ha jatdangai jiang ana manri. 9Hale mi ning an lui jet torlui puma a lungdo, ruk a alui ngaidon chuan mirual rakip jiang athup a alui siak puma jiang alui om chongsat le phur rakip hi ama kut sin alui ni. 10Pathian tenna ahong chingna phual rakip ha biakrup tenna ramuol aput reng ator mingai jiang man jetru, vanram ringkhuo anga ni rase. 11Amongti bui Pathian lungdo ngaiha kan puma Jisu Khrista jiang a om. 12Jisu Khrista jarra ama takngai le kan ruaia keini hi Pathian kol la ningsat tak a kan lut tor jui. 13Kein nang ni, jiang ka na ri ani, khodengthei na ka dui rakip chunga nan lung man sin maru, nang ni lurna lian na ranga ani.
Thavang Thiang tenna rat na
14Hiva jarra kein puma madonna chubei ka lui buk. 15A ma jiang han ramuol le vanram ma a om hale insung rakip ning an ming rakip alui mu. 16Kein nang ni ranga lamna ka nei, puma rat na ranak han nangni ha na man rat nati hale ama Thavang Thiang ning nan sunga om rase. 17Hale nan takngai na jarra Khrista ning nan lung sunga om rase han lungsiat han a det tak a ngirru. 18Pathian lungsiat ha iduk mo asei iduk mo a lian, iduk mo, athup tiha nangni le Pathian mi thiangai ning jet nanti. 19Jisu Khrista a mi lungsiat thei na nan jet han nan chunga Pathian omchan nunchan ha sip rase.
20Puma ama ranak han kan sunga a om kan lui ngaidon phak lui tho torlui rakip ha kan tho tor jui. 21Puma lurna lian na rakip biakrup le Jisu Khrista jiang mirual mirual la ator ti buia om rase.
Currently Selected:
EPHESIA 3: AIMOLBSI
Highlight
Copy
Compare
Share
Want to have your highlights saved across all your devices? Sign up or sign in
Aimol (Re-edited) NT - Rabu Athar
Copyright © The Bible Society of India, 2016.
Used by permission. All rights reserved worldwide.
