MATHAIA 27
27
Pilata ziangah Jisua an ṭhui
(Mk.15:1; Lk.23:1-2; Joh.18:28-32)
1Zîng a hong nitin chu thiampu lalhei murdi neh upahei khan Jisua an that rang dân lampui an siam a. 2Zingzirin an khuap a, an ṭhui a, Rom.Ram-optu Pilata #27:2 Mss ṭhenkatah chu ‘Pontia’ iti a kop. ziangah an ṭhui tâk a.
Juda thi thu
(TS.1:18-19)
3Ân mantu Juda khan Jisua khah thiamno an inchang iti a riat kaneh chu ân sîr a, a sum tangka sômithumkah khah thiampu lalhei neh upahei ziangah a hong chôi nôk a.#Mat.26:15. #TS.1:1-19. 4“Mi fel ithi ranga ki înman kha kî thonsual a nit,” a ti a.
Anni khan a ziangah, “Amakhah kin ta rangin im ân khôkna a om? Nangman nî nuam nuam lo roh,” an lei ti pêk a.
5Juda khan kha sum khah Tempil sungah a pai a, a rot a; khanchu, a fe a, a var khâi that tâk a.
6Thiampu lalhei khan sum khah an rût a, “Ama sum hih thisen man a nit sikin Tempil sum sia muna sia chu rithiang mak e,” an ti a.#Dn nik.23:18. 7Khanchu, thu an inrual zoiin chu ram dang mihei phûmna mun rangin Bepu mun an richôk tâk a. 8Khasikah khan kha mun khah atûn tenan, “Thisen Mun,” an iti mai tâk a nit.
9Zânthla Jeremian, “Israelhein ama man ranga an îndôr tangka sômithumkah khah an lâk a.#Zak.11:12,13; Jer.32:6-15. 10Pumapa thupêk angkan Bepu mun man rangin sum khah an mang tâk,” ai ti khah a hong itlung tâk a nit.
Pilatan Jisua ṭongridon a pêk
(Mk.15:2-5; Lk.23:3-5; Joh.18:33-38)
11Jisua khah Rom.Ram-optu makungah a ngîr a, Ram-optu khan, “Judahei rêng ni nit im?” itin ardon a.
Jisuan, “Ni nit ni ne ti tâk khate,” itin a sâm a. 12Khanniseh, thiampu lalhei neh upahein an nôna thu kha chu iten sâm mak e.
13Khanchu, Pilatan a ziangah, “Nang an nôna thuhei hih nî riat ino mani?” a ti a.
14Nikhomseh, Jisuan ṭongbâikah khomin sâm mak a, Ram-optu khah arngai arkhêl tak tak a.
Jisua ithat ranga thupêk
(Mk.15:6-15; Lk.23:13-25; Joh.18:39—19:16)
15Khante, Rom.Ram-optu khan Kalkan Kût zoro fengin mi tâng khatkah mipuihein an iti tak â sua pêk ngai a. 16Kha lâiah khan mi tâng riming inthang tak Baraba #27:16 Mss ṭhenkatah ‘Jisua Baraba’ iti a nit. an iti khah a om a. 17Khanchu, mipui an hong ribûmin chu Pilatan an ziangah, “Tûm nangni sua pêk inlang nin nuam? Baraba hîm, anitnole Jisua, Mesia an iti pu hîm?” itin ardon a. 18Juda thuneituhei khan Jisua khah an narsa sika a kutah an hong ipêk a nit iti ifel takkan a riat a.
19Khante Pilata khah roirêlna munah â ṭhung lâiin, a nupuiin, “Kha mi fel chungah khan îte tho no roh dua, zânin ker mangin ama sikin kî tuang ok kêng,” itin he a hong richa a.
20Thiampu lalhei neh upahei khan Baraba isua a, Jisua ithat ranga Pilata zianga ngên rangin mipuihei an ithlêm a. 21Pilata khan mipuihei ziangah, “Hi mi inikahei lâiah hin tu hîm nangni sua pêk inlang nin inuam?” itin ardon nôk a.
Anni khan, “Baraba” an ti a.
22Pilatan an ziangah, “Khateh, Jisua, Mesia an iti hih im ki lo rang tâk?” a ti a.
Anni khan, “Krosah hêmde roh,” an ti a.
23Khannisela, Pilata khan an ziangah, “Im a thonsualna ai nit?” itin ardon a.
Nikhomsela, mipuihei khan, “Krosah hêmde roh,” itin an rât dôr dôrkan an ikhêk a.
24Pilatan îte nemna om no nia, buaina bang kêng ai suak rang iti a mun chu tui a lâk a, mipuihei makungah a kut arsûk a, an ziangah, “Hi miriam thinaah hin îte rinangna nei mang e, amahih nangmani sintho a nit,” a ti a.#Dn nik.21:6-9; Lap.26:6.
25Mipui murdîn, “Hi mi thina sika rinangna chu keimani neh kin naihei chungah om riseh,” an ti a.#TS.5:28; Jos.2:19. 26Khanchu, Pilata khan Baraba khah â sua pêk tâk a; Jisua kha chu ân hêm a, krosa hêmde rangin an kutah a pêk tâk a.
Sipaihein Jisua an phengsan thu
(Mk.15:16-20; Joh.19:2-3)
27Khanchu, Pilata sipaihein Jisua khah praitorianah#27:27 Praitorian hih Ram-optu in sunga sipai omna nîng a ti. an ṭhui a, an lôma mi murdi a kôlah an hong ribuk a. 28A puanhei an lîk pêk a, puan senduk an insil a. 29Khanchu, riling lukhum an phan a, an inkhum a, a kut a changtiang irol an inchôi a; a makungah rikhûk idilin, “Chibai, Judahei Rêng,” itin an phengsan a. 30Ani khah an ichil a, â rol khah an sut a, a luah an itôk a. 31Khante, an phengsan zoiin chu puan senduk khah an lâk nôk a, ama puan ngir khah an insil nôk a. Khanchu, krosa hêmde rangin an ṭhui tâk a.
Jisua ihêmden a om
(Mk.15:21-32; Lk.23:26-43; Joh.19:17-27)
32Khante, lampuiah an fe lâiin Kurini kho mi khatkah arming Simona an mu a; sipaihei khan Jisua kros riput pêk rangin an dânde a.#Heb.13:12. 33Golgotha, “Luru Mun” an iti khah an hong tlung a. 34Amakhan Jisua khah uain, thil ikhâ neh ripol a in rangin an pêk a; khan a zuk ritem a, in nuam khâi mak a. #Lap.69:21.
35Khante, krosah an hêmde a; khanchu, thlasânin a puansilhei khah an risem a.#Lap.22:18. 36Khanungchu, amakhan an iṭhung a, an ngâk tâk a. 37Amah an nôna, “Hi mi hih Jisua, Judahei Rêng a nit,” iti riziak a lu chungah khan an ikhop a.
38Khante, ama lômin suammi inikah, â changtiang khatkah, â voitiang khatkah an hêmde sa a.
39Khante, mi â fe â hong murdîn an lu thingin Jisua khah an êro a. #Lap.22:7,8; 109:25. 40“Nangmah, Tempil hi iṭhet a, sûn thumka inding nôk theitu, Pathian Naipa ni nitin chu ni khâtin zôk inla, Kros lêra rithokin zuang ṭum ta roh,” an ti a. #Mat.26:61; Joh.2:19; TS.6:14.
41Khangkah ngirin Thiampu lalhei neh Dân inriseituhei neh upahei khomin ani khah an êro a, 42“Mi danghei lak ân zôk ngai a; khanniseh, amah chu zôk thei mak a. Israelhei rêng ni mak im a? Atûn kros lêra rithokin zuang ṭum sela chu iam ei ti. 43Pathian a iam a, Pathian Naipan arbe a. Tho lei en rei u, Pathianin atûnah hin a zuang inzôk nuam im,” an ti a.#Lap.22:8.
44Suammi, ama lôma an ihêmdehei khomin khangkah ngirin an êro a.
Jisua thina thu
(Mk.15:33-41; Lk.23:44-49; Joh.19:28-30)
45Khante, sûn lâi taka rithokin kholoi fasukrup idênin rammual a zîng khap a. 46Kholoi fasukrup vêlin chu Jisua rôl iring takkan â khêk a, “Eloi, Eloi, lema sabakthani?” a ti a. Amakhah, “Ki Pathian, ki Pathian, ithôm ni ne mâk a?” itina a nit. #Lap.22:1.
47Kha muna ding ṭhenkahei khan amakhah an riat a, “Hi mi hin Elija ai koi a nit,” an ti a. 48Khanchu, an lâia mi khatkah a tlân zel a, sponj #27:48 Sponj hi bûrduap angkana tui ipom thei a nit. a lâk a; uain thûrah â chia a, irol mongah a târ a, Jisua khah hang in-in a tum a.#Lap.69:21.
49Khanniseh, mi danghei khan, “La ngâk hi roh, ân zôk rangin Elija a zuang im lei en rei,” an ti a.
50Jisua chu rôl iring takkan â khêk nôk a, arthla â thla tâk a.
51Khanungchu, Tempil sunga puanzâr khah a chungtianga rithokin a nuaitiang idênin a thlêr a; rinêng â nîng a, lungpuihei a koi a;#Fes.26:31-33; Heb.9:8; 10:19. 52ithlânhei a hong ri-ong a, mi rithiang lei ithi tâk itam takkah khom khah kâiithoiin an om tâk a. 53Jisua thina rithoka a thoinôk nungah khahei khah ithlân ata hong isuakin khopui rithiangah khan an lût a, mi tam takka ziangah an inlâr tâk a.
54Sipai rizaka ruitu neh a zianga sipai iom Jisua thlîrhei khan, nînu nîng neh thil zuang itlunghei khah an mun chu an ṭi tak tak a, “Hi mi hih Pathian Naipa a nit ngêt,” an ti a.
55Kha munah khan nupang itam takkah, Galili rama rithoka Jisua nung izui a, â ṭangpui ngaihei khan ilah iankatah an thlîr a.#Lk.8:2,3. 56Khahei khah Mari Magdalini hei, Jakoba neh Josefa#27:56 Mss ṭhenkatah Josia nu ti a nit. nu Mari hei neh Zebedaia nupui hei an nit.
Jisua an phûm thu
(Mk.15:42-47; Lk.23:50-56; Joh.19:38-42)
57Khante, kholoi a hong nitin chu Arimathaia khuaa mi richong khatkah, arming Josefa a hong a; ani khom khah Jisua kôilôm a lei nit a. 58Kha mi khah Pilata ziangah a va fe a, Jisua ruak khah a va ni a. Ruak khah Josefa zianga peh rangin Pilata khan thu a pêk a. 59Khanchu, Josefa khan Jisua ruak khah â ṭhum a, puan rivuai itharin a tuam a, 60ama thlân, lung a îhol zoi phingah khan ân zâl tâk a. Khanungchu, ithlân bâi khah lung ilian takin a sîng zoiin chu a fe tâk a. 61Amakhan Mari Magdalini neh Mari dang khah ithlân tiang masongin an iṭhung a.
Ithlân ingâktu sipaihei
62Atûk, sabatnî sûnin thiampu lalhei neh Farisaihei khah Pilata ziangah an hong a, 63a ziangah, “Epu, kha Milakah khan a ring lâiin, ‘Sûn thumka nungah chu thoinôk ki ti,’ a ti kin iriat mai a nit.#Mat.16:21; 17:23; 20:19; Mk.8:31; 9:31; 10:3-34; Lk.9:22; 18:31-33. 64Khasikin, ithlân khah sûn thumka sung chu iṭha takka ngâk rangin thu peh roh; khanonchu, a kôilômhei an fe a, an va rûk a, mipui lâiah, ‘Thina rithokin a thoinôk tâk,’ an tia a nitin chu hi lêmna nungkhôn hih matona nêkan ai ṭhat ino ual rang a nit,” an ti a. 65Pilatan an ziangah, “Vêngtuhei nin nei im ki ta,#27:65 ‘Tempil vêngtuhei nin nei im ki ta,’ iti thei a nit. fe unla, ithlân khah ṭha nin ti lam angkah takin inngâk rei,” a ti a. 66Khanchu, an fe a, ithlân khârna lung khah risin an sia a, vêngtuhei khah an inngâk khap tâk a.
Currently Selected:
MATHAIA 27: BIATBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More
