MATHAIA 26
26
Jisua that rang tlia an ngaitua thu
(Mk.14:1-2; Lk.22:1-2; Joh.11:45-53)
1Khante, Jisuan kha thuhei murdi khah ân risei zoiin chu a kôilômhei ziangah, 2“Sûn nika nungah Kalkan Kût hong om a ti iti nin riat a, Miriam Naipa hih ihêmde rangin inman nîng a ti,” a ti a. #Fes.12:1-27.
3Kha lâiah khan thiampu lalhei neh upahei khah Thiampu Laltak Kaiafa inah rimuna an nei a. 4Jisua khah inrûkka iman a, an that thei rang lam ingaituan an risôn a. 5“Kût sungin chu ni no riseh, vântlâng lâiah buaina a om duai lôiin,” an ti a.
Bethaniah Jisua riak inrithu a nit
(Mk.14:3-9; Joh.12:1-8)
6Khante, Bethania iphâr Simona inah Jisua a om a. 7Jisua bu a nêk lâiin, nupang khatkah alabastar bûra siriak namhoi man ilutak hong ichôiin a hong a, a luah siriak khah a buak a. #Lk.7:37,38. 8Kôilômhei khan amakhah an mun chu an ning a thik a, “Îtho rang im hingkana a înrichêk hi? 9Hi siriak namhoi hih man itam takka zuar a, inrianghei zianga peh thei kêng ai nit,” an ti a. 10Jisuan an ṭonghei khah a riat a, an ziangah, “Ithôm hi nupangnu hih nin înbuai? Ki ta rangin thil iṭha neh enihoi tak ai tho a nit. 11Inrianghei chu nin zianga om mai an nit a; khanniseh, kei chu nin ziangah om mai no ning e.#Dn nik.15:11. 12Hi siriak namhoi ki takpuma ai buak hih iphûm ranga nen risiam thlâmna ranga ai tho a nit hih. 13Thu dik nangni ke ril, rammual pumpuiah Thurchi Ṭha an isîrna kipah hi nupangnu sintho khom hih ama riatmaina rangin isîr sa mai an ti,” a ti a.
Judan Jisua inman a tum
(Mk.14:10-11; Lk.22:3-6)
14Khanungchu, kôilôm Sômleiinikahei lâia khatkah, Juda Iskariota an iti khah thiampu lalhei ziangah a fe a. 15“Jisua hih nangni inman inlang im nin ne pêk rang?” a ti a. Tangka sômithumkah an tep a, an pêk tâk a. #Fes.21:32; Zak.11:12. 16Kha rizoia rithokin chu Juda khan Jisua an kutah a bâng thei rang lam khah a zong mai tâk a.
Jisuan a kôilômhei neh Kalkan Kût ruai a fâk
(Mk.14:12-21; Lk.22:7-13,21-23; Joh.13:21-30)
17Bairiam Kût sûn masatakah khan, kôilômhei an hong a, Jisua ziangah, “Kalkan Kût ruai hih takâm nang inrifûk pêk unlang ni nuam?” itin an ridon a.
18Ani khan an ziangah, “Khopuiah, mi khatka ziangah fe unla, a ziangah, ‘Minriseitu khan ki zoro a nâi tâk a; ki kôilômhei neh Kalkan Kût ni inah mang kin ti,’ a ti va ti rei,” a ti a.
19Khanchu, Jisuan thu a pêk lam angkah takin an tho a, Kalkan Kût ruai khah an inrifûk tâk a.
20Kholoi a hong nitin chu Jisua neh a kôilôm Sômleiinikahei khah khalai rikhîlin an iṭhung a. 21Khalai an rikhîl lâi takin Jisuan an ziangah, “Thu dik nangni ke ril, nin lâia mi khatkah hin nen man a ti,” a ti a.
22Khanchu, kôilômhei ilung a buai tak tâk a, a ziangah, “Pumapa, keimâm ni ne iti?” an ti seng a.
23Jisuan an ziangah, “Khêng khatka ne otpuitu tak hin nen man a ti. 24Pathian Thubûn ai ti angkan, Miriam Naipa hih thîng a ta; nikhomseh, Miriam Naipa inmantu rang chung chu ân khôk vang na! Kha miriam kha chu suak no sela a ta rangin ṭha ual a ti,” a ti a.
25Ân man rangtu Juda khan a sâm a, “Minriseitu, keimâm ni ne iti?” a ti a.
Jisuan a ziangah, “Ner ti mai tâk khate,” a ti a.
Pumapa zânbu
(Mk.14:22-26; Lk.22:14-20; 1 Kor.11:23-25)
26Khante, an fâk lâiin, Jisuan ibai a lâk a, lômthu â sîr zoiin a khoi a, a kôilômhei ziangah a pêk a, “Lah unla, fah rei, amahih ki taksa a nit,” a ti a. 27Khanungchu, kilât khah a lâk a, Pathian ziangah lômthu â sîr zoiin chu an ziangah a pêk a, 28“Nin rêngkan in rei, amahih ki thisen, Pathian thuthlung indettu, sual izâna ranga mi tam takka ranga suak rang chu a nit.#Fes.24:8; Jer.31:31-34; Heb.9:20. 29Nangni ke ril, ki Pa Ramah nangmani neh uain ithar ki in nî sûn a tlung mâkah chu hi uain hih in nôk khâi no ning e,” a ti a.
30Kha rizoiin chu la khatkah an sak a, an sak zoiin chu Oliv Tlang tiang ipanin an suak tâk a.
Peteran a phial rang thu Jisuan a rillôk
(Mk.14:27-31; Lk.22:31-34; Joh.13:36-38)
31Khanchu, Jisuan an ziangah, “Vuanzân ngêiah hin nin rêngkan lâizâm thông nin ta, ne mah riai nin ti; Pathian Thubûn, ‘Pathianin berapu khah that a ta, berahei khah rithekindar chit an ti,’ ai ti a nit.#Zak.13:7; Joh.16:32. 32Nikhomseh, kâiithoia ki om nungin Galili ramah nin matona lei fêng ki ti,” a ti a.#Mat.28:7,10,16.
33Peteran a ziangah, “A danghein nang marak riai khom seh, keiman chu nang mah tlak no ning e,” a ti a.
34Jisuan Petera ziangah, “Thu dik nang ke ril, vuanzân âr a khuang man nangman voi thumkah ne phial ni ti,” a ti pêk a.
35Peteran a ziangah, “Ni thinaah thi sa rang khom inlang nang phial tlak no ning e,” itin a sâm a.
Kôilôm danghei khomin khangkah korongin an ti chit a.
Gethsemani rikulah Jisua a ṭongṭai
(Mk.14:32-42; Lk.22:39-46)
36Khanungchu, Jisua khah a kôilômhei neh mun khatkah Gethsemani an iti-ah khan an fe a, Jisuan an ziangah, “Son ki va ṭongṭai sungkah chu hin lei iṭhung rei dua,” a ti pêk a.
37Petera neh Jebedaia naiipa inikahei khah a ṭhui a. Thlavâina neh lungkângnan a zuang rikhû tâk a. 38Khanchu, an ziangah, “Ker thla â vâi tak tak a, ithi tlak rang dôrkan kêng ki om. Hin lei om unla, ne rakpui rei dua,” a ti a.#Joh.12:27; Heb.5:7,8.
39Khante, matiang a va fe ual viat a, rinêngah â bok rak a, a ṭongṭai a, “Epa, ithei a nitin chu hi tuangna kilât hih ki zianga rithokin ne khâi pêk roh. Nikhomsela, keima richam ni loiin nangma richam ni ual riseh,” a ti a.
40Khanungchu, a hong kîr nôk a, kôilôm ithumkahei khah â in thlarin a hong mu a; khanchu, Petera ziangah, “Ingkan im nangmanin thum hih dârkâr khatka lua khom nin ne irakpui thei ino kêng na? 41Thlêmnaah nin lût nona rangin intûng ṭiankan ṭongṭai rei. Rithlan chu a nuam a, taksan chu ai phâri no a nit,” a ti a.
42Khante, a voi niknah Jisua a fe nôk a, a ṭongṭai a, “Epa hi tuangna kilât hih ki in noa ikhâi thei a nit tlak non chu nangma richam ni riseh,” a ti a.
43A hong kîr nôkin chu kôilômhei khah â in thlar ngirin a hong mu a; an mit reng an imeng zoi ino a nit.
44Jisuan a mâk nôk a, a voi thumnan ai ti ngaingir itin a ṭongṭai nôk a. 45Khanungchu, kôilômhei ziangah a hong a, an ziangah, “Atûn tenan ringamin nin lai in thlar mai na? En ta u, Miriam Naipa hih mi sualhei kuta pêk rang zoro a hong tlung tâk. 46Thoi unla, fe tâng ei ti u. En ta u, nen man rangtu hih a hong nâi tâk,” a ti a.
Jisua an man thu
(Mk.14:43-50; Lk.22:47-53; Joh.18:3-12)
47Khante, Jisua a la ṭong mai lâiin kôilôm Sômleiinikahei lâia khatkah, Juda khah a hong tlung a. Ama lômin thiampu lalhei neh upahei hong itir mipui, khandai neh tôkmol ichôiin an hong tâk a. 48Ân man rangtu khan, “Â biang kî tum tak khah nin izongpu chu nîng a ti; man zel rei,” itin risin a lei ipêk thlâm tâk a nit.
49Juda khah Jisua ziangah a fe thal a, a ziangah, “Minriseitu, ni chungah thlangamna om riseh,” itin â biang a tum a.
50Jisuan a ziangah, “Mala ni hongna bi chu tho zel roh,” a ti pêk a.
Khanungchu, an hong a, Jisua chu an man a, an itûk khap tâk a.
51Jisua zianga omhei lâia khatkan a khandai a thuat a, Thiampu laltak suak khah a sât a, â kuar a sât iṭhul pêk a. 52Jisuan a ziangah, “Ni khandai khah a kokah thun nôk ta roh; khandai ilekhei chu khandai ngirin thîng an ti. 53Ki Pa ziangah sanna ki zong thei a, aman voikazelin vântirtônhei sângirukkah lôm sômleiinika nêka tam a zuk tir thei iti nî riat ino mani? 54Nikhomsela, ngên tan lang, hingkana thil hong iom rang Pathian Thubu-a lei isîr khah ingkan im a tlung thei rang?” a ti a.
55Khanungchu, Jisuan mipuihei ziangah khan, “Suammi man rang angkan khandai neh tôkmol ichôiin ne man rangin nin hong irthok kêng na hi? Tempilah nîn tin iṭhungin mi ken risei ngai a, ne man mak chei a.#Lk.19:47; Joh.18:19-21. 56Nikhomsela, zânthla lekha Thuhei khah a hong tlung idik theina rangin hihei murdi hih a hong iom tâk a nit hih,” a ti a.
Khanungchu, kôilômhei murdîn amah an mâk a, lâizâm an tho riai tâk a.
Jisua Sanhedrin maah a ngîr
(Mk.14:53-65; Lk.22:54-55,63-71; Joh.18:13-14,19-24)
57Khante, â mantuhei khan Jisua khah Thiampu laltak Kaiafa inah Dân inriseituhei neh upahei lei ribuknah khan an ṭhui tâk a. 58Petera khan ilah iankatah a zui a. Thiampu laltak in kottual idênin a zui a. Khante, in kottual a va lût a, a mongna imu tumin vêngtuhei lâiah â ṭhung a.
59Thiampu lalhei neh roirêltuhei murdi khan Jisua an that theina ranga thiamno an inchangna rang bi an zong a. 60Mi itam takkah ihongin a chungchângah milak thu an ril a; nikhomseh, thu tluk mu mak a. A nungkhôn takah chu mi inikah an hong a, 61“Hi mi hin, ‘Tempil hih iṭhetin sûn thumkan ken ding nôk thei,’ a ti,” an ti a. #Joh.2:19.
62Khanchu, Thiampu Laltak khah â ding a, Jisua ziangah, “Hi nang an nona thu-ah hin îte sâmna nî nei ino mani?” a ti a. 63Nikhomseh, Jisua chu a dâirek a. Thiampu Laltak khan â sôn nôk a, “Pathian iring rimingin nang ki ti; Pathian Naipa, Mesia khah ni nit im, ne ril roh,” a ti a.
64Jisuan a ziangah, “Ni ne ti mai tâk khate. Khanniseh, nangni ke ril; nakanah chu Miriam Naipa hih Tinrêngthothei changtianga ṭhungin rivân sûm lâia zuang nin lai mu rang a nit,” a ti a. #Dan.7:13.
65Khanchu, Thiampu Laltak khan a puansilhei â potthlêr a, “Pathian a îsîrinsiat a nit, riatpuitu dang nang khâi mang meh. Pathian â sîrinsiat tlia chu nin riat tâk a,#Rit.14:6; TS.14:14; Lev.24:16. 66Ingkan im nin ringai?” a ti a.
Anni khan, “Ithi rang inrup a nit,” an ti a.
67Khanungchu, a mâiah an ichil a, an itôk a, ṭhenkan an ibên a,#Isa.50:6. 68a ziangah, “Nangmah, Mesia, tûm nang ibên ne ril roh,” an ti a.
Peteran Jisua a phial
(Mk.14:66-72; Lk.22:56-62; Joh.18:15-18,25-27)
69Khante, Petera khah in rikul sung tolâiah â ṭhung a, Thiampu Laltak isom nungâkhei lâia khatkah a hong a, a ziangah, “Nang khom hih Galili mi Jisua zianga om ngai khah ni nit hi,” a ti a.
70Khanniseh, ani khan, “Ni thu sîr khah a omzia reh viat mang e,” itin an rêngka makungah a phial a. 71In rikul dâikot putiang a va suak a, isom nungâk dangin a lei mu nôk a, khantaka omhei ziangah khan, “Hi mi hih Nazaret Jisua zianga om ngai khah a nit,” a ti a.
72Peteran a phial nôka, “Vânirisâmin kî ti a nit, kha mi khah reh mang e,” a ti a.
73Itôiteka nungah chu khantaka dinghei khah Petera ziangah an hong a, a ziangah, “Nang khom hi an lâia mi ni nit ngêt, ni ṭong dan rengah hin ei riat thei,” an ti a.
74Khanchu, Peteran an ziangah, “Thudik irilin vâni ki irsâm a nit. Â dik non chu Pathianin deng nen thei riseh. Kha mi khah kî riat tlak ino a nit,” a ti a.
Kha zoi kaneh chu âr a khuang zel tâk a, 75“Âr a khuang man nangman voi thumkah ne phial ni ti,” Jisuan ai ti pêk khah Peteran a riat suak a. Khanchu, a suak a, a ṭap ngûi ngûi tâk a.
Currently Selected:
MATHAIA 26: BIATBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More
