MATHAIA 28
28
Jisua thoinôk thu
(Mk.16:1-10; Lk.24:1-12; Joh.20:1-10)
1Sabatnî ṭum, Pathiannî zîng kôlrisam kaneh Mari Magdalini neh Mari dang khah ithlân ien rangin an fe a. 2Voikazelin nînu a hong inîng a, rivân ata Pumapa vântirtôn a zuang a, lung khah ân lumpai a, a chungah â ṭhung a. 3A mêl chu khothlâr angkah a nit a, a puansilhei khom ivur angkana vâr a nit. 4Ama ngâktu sipaihei khan an ṭi tak tak sikin an inthing a, mithi angkan an om tâk a. 5Vântirtôn khan nupanghei ziangah, “Nangnin chu ṭi no rei, Jisua an ihêmde khah nin izong a nit iti ki riat. 6Hin om khâi mak e, ai ti angkan kâiithoi a nit tâk. Hin hong unla, a zâlna hih hong en rei. 7Atûn fe zel unla, a kôilômhei ziangah, ‘Thina rithokin kâithoi a nit tâk, Galili ramah nin matonah a lei fe a; amakhan mûng nin ti,’ ti rei. Nangni ki iril hih remai rei,” a ti a. #Mat.26:32; Joh.21:1-23.
8Khanchu, iṭi neh râifânna sipin, ithlâna rithokin rimot takkan an fe a, kôilômhei va ril rangin an itlân tâk a.
9Voikazelin Jisuan anni khah a tong a, an ziangah, “Nin chungah thlangamna om riseh,” a ti a. Khanchu, a ziangah an hong a, a kepha an itûk a, chubai an ûn a. 10Jisuan an ziangah, “Ṭi no rei, fe unla, Galili rama fe rangin ki suapuihei va ril rei; amakhan ne mûng an ti,” a ti a.
Ithlân ngâktuhei thu sîr
11Nupanghei khah an fe lâiin ithlân vêngtu sipai ṭhenkahei khah khopuiah an va fe a, thil zuang itlung murdi khah thiampu lalhei an va ril a. 12Thiampu lalhei khah upahei neh an rimu a, lungvâr an siam a; vêngtu sipaihei ziangah khan sum itam takkah an pêk a. 13An ziangah, “Zânah kin inkârin a kôilômhei an hong a, a ruak an hong îrûk a nit ti rei. 14Ram-optu khan kha thurchi khah a lei riat le khom, thiam nin chang iti lei isîrpui kin ta, îte nin ilung nin inbuaina rang omak e,” an ti a.
15Sipaihei khan sum khah an lâk a, he an be lam angkan an tho tâk a. Khasikin, atûn tenah hin kha thu khah Judahei lâiah an lai ril inlum mai a nit.
Kôilômhei ziangah Jisua ân lâr
(Mk.16:14-18; Lk.24:36-49; Joh.20:19-23; TS.1:6-8)
16Khante, kôilôm Sômleikhatkahei khah Galili rama itlâng khatkah Jisuan fe rei a ti pêknaah khan an fe a. #Mat.26:32; Mk.14:28. 17Amah an mun chu chubai an ûn a; khanniseh, ṭhenkan chu iam titak mak a#28:17 ‘An pang â zat a’ iti thei a nit.. 18Jisuan a hong nâi a, an ziangah, “Rinêng neh rivâna thuneina murdi ki ziangah ipe a nit tâk. #Mat.11:27; Lk.10:22; Fil.2:9; Efes.1:20-22. 19Khanchu, fe unla, nam tina mihei ki kôilômin siam rei; Pa neh Naipa neh Rithla Rithiang rimingin baptis unla, thu nangni kî pêk murdi izôm rangin inrisei rei. #Mk.16:15,16; Lk.24:47; TS.1:8. 20Khante, ringai ta u, keimah kumkhuakan, rammual mong idênin nin ziangah om mai ki ti,” a ti a.#28:20 Mss ṭhenkatah chu ‘Amen’ iti a kop.
Currently Selected:
MATHAIA 28: BIATBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More
