MATHAIA 21
21
Jisua inlal takka Jerusalem a lût thu
(Mk.11:1-11; Lk.19:28-40; Joh.12:12-19)
1Khante, Jisua neh a kôilômhei khah Jerusalem an hong nâi tâk a, Oliv tlânga Bethfage khua an hong tlungin chu Jisuan a kôilômhei lâia mi inikah a tir a, 2an ziangah, “Nin matona khuah sôn fe unla, sakuartung, a kôla a te neh rithlung mu zel nin ti. Sût unla, ki ziangah hong kâi rei. 3Mi tukhomin nin ziangah imanih an ti le khom, ‘Pumapan#21:3 ‘A pu, â neitu’ iti thei a nit. ai nang a nit,’ ti pêk unla; khanchu, nangni infe zel a ti,” a ti a.
4Zânthla bâia a îsîr khah a hong tlung idik theina ranga amakhah a hong iom a nit:
5“Zion nainu chu iril roh,
En ta, ni Rêng khah ni ziangah a hong e,
Ringaiichîn takkan sakuartung chungah,
Sakuartungte chung le lea chuangin,
Ni ziangah ai hong a nit,” iti thu hih. #Isa.62:11; Zak.9:9.
6Khanchu, kôilômhei khah an va fe a, Jisuan he a be lam takkan an va tho a. 7Sakuartung neh a te khah an hong kâi a, an chungah khan an puanhei an dâp a, Jisua chu a chuang tâk a. 8Mipui itam takkan lampuiah an puanhei an dâp a; mi dangin sôl an sât a, lampuiah khan an dâp a. 9Mipui Jisua maton tianga fehei neh â nungtianga zuihei khan,
“Davida Naipa ziangah, Hosana,
Pumapa riminga zuang chu inpâkin om riseh;
Chungnung takah khin Hosana,”
itin an ikhêk a. #Lap.118:25,26.
10Jisua kha Jerusalem a hong lûtin chu a kho pum rengin, “Hi mi hih tûm ai nit?” itin an châng sêp a.
11Mipuihei khan, “Hi mi hih Zânthla Jisua, Galili rama Nazaret mi a nit,” an ti a. #Joh.6:14; 7:40; TS.3:22.
Jisua, Tempilah a fe
(Mk.11:15-19; Lk.19:45-48; Joh.2:13-22)
12Jisua khah Tempilah a lût a, Tempil sunga itika zuarhei neh richohei murdi a ûmisua riai a. Sum ithlenghei docham neh pharvali zuarhei ṭhungmunhei khah a nam inlîr pêk a; 13an ziangah, “Pathian Thubu-ah, ‘Ki in chu ṭongṭaina in tîng an ti,’ iti riziak a nit. Khanniseh, nangmanin chu inruhei ipûkin kêng nin isiam tâk a nit hih,” a ti a.
14Tempilah khan mitdelhei neh kebâihei a ziangah an hong a, a lei indam a.#Isa.56:7; Jer.7:11. 15Thiampu lalhei neh Dân inriseituhein sinrikhêl ai sinhei neh Tempila, “Davida Naipa ziangah Hosana,” itia naipanghei ikhêk khah an mun chu an ning a thik tâk a. 16Khanchu, Jisua ziangah, “Hi mihei iti hih ni riat im?” itin an ridon a.
Jisuan an ziangah, “O, ki riat, ‘Naipanghei neh naitesenhei bâia suak khan inpâkna nen rikip tâk,’ iti hih nin lai tep tlak ngai ino mani?” itin a sâm a.#Lap.8:1,2.
17Khanchu, Jisuan anni khah a mâk a, Bethaniah a fe a, amakhan a riak tâk a.
Jisuan theichâng kung vâni a sâm
(Mk.11:12-14,20-24)
18Khante, atûk zîngah khopui tiang a kîr nôk lâiin Jisua chu a von a hong ṭâm tâk a. 19Lam penah theichâng kung a hei mu a, a va pan a; nikhomseh, a nâhei banah chu îte mu mak a. Khanchu, theichâng kung ziangah khan, “Kumkhuakan irâ tlak khâi no roh,” a ti pêk a. Voikazelin theichâng kung khah a hong thêm tâk a.
20Kôilômhein amakhah an mu a, an ringai arkhêl tak tak a, “Ingkan im theichâng kung hih a thêm zel tâk tlia?” itin an ridon a.
21Jisuan an ziangah, “Thu dik nangni ke ril, ringlana nei viat loia iamna nin neiin chu hi theichâng kung chunga kî tho angkah hin tho thei nin ti. Khah bang khah ni loiin hi tlâng ziangah khom, ‘Rithon inla, tuikhanglianah ripaih roh,’ ti unla, ripai zel a ti.#Mat.17:20; Lk.17:6; 1 Kor.13:2; Jak.1:6. 22Tinrêng, iiam puma ṭongṭaia nin ini kah chu mûng nin ti,” a ti a.
Jisua richamneina an ridonna thu
(Mk.11:27-33; Lk.20:1-8)
23Jisua khah Tempilah a hong nôk a; ân risei lâiin thiampu lalhei neh upahei khah an hong a, a ziangah, “Tu richamin im hihei hih nî sin? Tûm richamneina nang ipe?” an ti a.
24Jisuan an ziangah, “Kei khomin thu khatkah nangni lei ridon rong, nin ne sâm theiin chu tu richamin im hihei hih kî sin nangni ril ki ti. 25Johana Baptisma khah taka rithoka richam neina mani? Pathiana rithok im, miriama rithok im?” a ti a.
An khâtin an risêl tâk a, “Im ei ti rang tâk? ‘Pathiana rithok,’ ei tin teh, ‘Khateh, ithôm Johana khah nin iam no?’ ne tîng a ta. 26‘Miriama rithok’ ei ti lakin mipuihei iṭi an om a, Johana khah mi murdîn zânthlan an ibe a nit a,” an ti a. 27Khanchu, Jisua ziangah, “Reh mang ung e,” itin an sâm a.
Jisuan an ziangah, “Kei khomin tu richama hihei hih kî sin manih nangni ril ual no ning e,” a ti a.
Naipa inikahei ṭongrikhek
28Jisuan, “A nitin teh, nangmanin ingkan im nin ringai? Tianah khan mi khatkan naiipa inikah a nei a. A nai ulianpu ziangah a va fe a, ‘Ki naipa, vuani chu grep rikulah fen la, sin va tho roh,’ a ti a. 29Ani khan, ‘Nuam mang e,’ itin a sâm a. Nikhomsela, nungah chu a lunginṭong a thleng a, a fe tâk a. 30Khanchu, khatka ziangah khom a fe a, khangkah ngirin a va ti a. Ani khan, ‘O epa, fêng ki ti,’ a ti a. Khanniseh, fe ual mak a. 31Kha mi inikahei khah a tukhôk im an pa nuam lam isin ual?” a ti a.
Anni khan a ziangah, “A ulianpu khan,” an ti a.
Jisuan an ziangah, “Thu dik nangni ke ril; siadôltuhei neh nochizuarhei khan Pathian Rama lût nangni an ikhêl tâk a nit hi. 32Baptistu Johana khan lampui dik nin zui rang nangni inmu a zuang a, ani khah lei iam mak chei a; siadôltuhei neh nochizuarhei khan chu an lei iiam a nit. Nangmani chu nin mu nung khomin nin lunginṭong ithlengin amah iam mak chei. #Lk.3:12; 7:29,30.
Grep rikul ṭongrikhek
(Mk.12:1-12; Lk.20:9-19)
33“Ṭongrikhek dang ringai nôk rei. Ram chongpu khatkah a om a, kha mi khan grep bil a siam a, idâiin arkul a, grep sômkhur a choih a, a ngâkna in risâng a sin a. Khanchu, grep rikul khah enkoltuhei kuta bângin ram dangah ân zin tâk a.#Isa.5:1,2. 34Grep irâ rimal zoro a hong tlungin chu â enkoltuhei ziangah khan dongtum va lah rangin a suakhei a tir a. 35Theibil enkoltuhei khan a suakhei khah an lei man a, khatkah an itôk bit a, khatkah an that a, khatkah lungin an dêng a. 36Khante, suak dang, a masa nêka tam ualin a tir nôk a; anni khom khah khangkah ngirah khan an lei tho a. 37A nungkhôn takah chu, ‘Ki naipa hi chu lei marit ngêt an ti,’ itin a naipa a tir tâk a. 38Khannisela, theibil enkoltuhei khan a naipa khah an lei mu kaneh, ‘Hi mi hih a chongpu naipa chu a nit. Hong rei, lei that rei u, archon lua rang hi ei donga rang,’ an ti a. 39Khanchu, ani khah an man a, grep rikul putiang an pai a, an that tâk a. 40Khante, grep rikul ineitu khah a hong tikin, kha theibil enkoltuhei khah im lo tâng a ti?” itin ardon a.
41Anni khan a ziangah, “Kha mi sualhei khah that a ta, grep rikul khah â enkoltu dang, â râ rimal zoro kipa a dongtum â peh ngai rangtuhei ziangah pêng a ti,” an ti a.#TS.13:46; 18:6; 28:28.
42Jisuan an ziangah, “Pathian Thubu-ah,
“‘In insintuhein lung an ipai mangmunboia an ibe khah,
 kila lung kâmiom tak a chang tâk.
Amakhah Pumapa itho a nit a;
Ei mitmuah hin a irkhêl a nit,
iti riziak khah nin itep ngai ino mani?’
43“Khasikin, nangni ke ril; Pathian ram chu nin ziang ata ila nîng a ta, irâ sua rang mihei ziangah ipe nîng a ti. 44Tutu kha lung chunga bâ kah chu rinôi an ta, kha lungin ai del vâng chu rinôi indîchit an ti,” a ti a.
45Thiampu lalhei neh Farisaihei khan Jisua ṭongrikhek isîrhei khah an riatin anmani chungthu a îsîr a nit iti an riat tâk a. 46Khasikin, iman an tum a; nikhomseh, mipuihei khah an ṭi a, mipuihei lak khan Jisua khah zânthlan an ibe a nit a.
Currently Selected:
MATHAIA 21: BIATBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More
