MATHAIA 20
20
Grep rikula sinithotuhei
1“Rivân Ram chu mi khatkan a grep rikula sinthotu rang mi zonga zîng renga suak angkah kha a nit. 2Ani khan sinithotuhei khah a sûnah dulika lo rangin ân rifûkpui a; khanchu, a grep rikula sin rangin a tir tâk a. 3Khante, zîng dâr ikuakkan bazâr munah a fe nôk a, nuam idinga ding mihei a va mu a; 4an ziangah, ‘Nangni khom fe unla, grep rikulah va sin unla, thalo chu arhoi lamin nangni pêng ki ti,’ a ti a. 5Khanchu, an fe tâk a. Khanungah khan sûn lâiah neh kholoi dâr ithumkan khom a suak a, khangkah ngirin a tho a. 6Kholoi dâr ringakah vêlin bazâr munah a va fe nôk a, mi ṭhenkah îte sin loia ding ṭian a va mu nôk a, an ziangah, ‘Ithôm îte sin loia hi munah hin sûn nin îhek?’ itin ardon a. 7Anni khan a ziangah, ‘Tute lakin nen rilo mak a,’ itin an sâm a. Khanchu, ani khan an ziangah, ‘Nangni khom fe unla, ki grep rikulah va sin rei,’ a ti pêk a.
8“Kholoi a hong nitin chu a chongpu khan a grep rikul enkoltu ziangah, ‘Sinthotuhei khah koi inla, nungita taka phutin a mâsa tak idênin an thalo peh roh,’ a ti a. #Lev.19:13; Dn nik.24:15. 9Kholoi dâr ringaka sin ikophei khah an hong a, dulikah chit ipe an nit a. 10Khanchu, masataka sin ikophei khah an hong a, dong intam ual rangin an sabei a; nikhomsela, anni khom dulikah chit ipe an nit a. 11An thalo khah an hang lâkin chu a chongpu chungah an riphun tâk a. 12‘Hi a nungkhôn taka sin ikophei hi chu dârkâr khatkah bang an isin a nit a, keimani inî lum ituanga sûntluana sin ithohei ni ne pêk dôrkah ngir anni khom ni pêk a,’ an ti a.
13“A chongpu khan an lâia khatka ziangah, ‘Ringai ta, mala, nang lêm mang e; a sûnah duli lo ranga ni îpom a nit. 14Atûn ni thalo khah lan la, ni inah fe roh. Nangmah nang ki pêk dôrkah khah hi a nungkhôn taka sin ikoptuhei khom hih ki pêk nuam a nit. 15Ki sum chu ki ti lam takka mang rangin richam nei mang im a? Anitnole, ki tikthlâi sikin nî narsa #20:15 ‘Nî nuar’ iti thei sa a nit. mani?’ a ti pêk a. 16Khaangkan a nungkhôn takhei khah a mâsa tak la chang an ta, a mâsa takhei khah a nungkhôn tak la chang an ti,” a ti a.#Mat.19:30; Mk.10:31; Lk.13:30.
Jisuan a thi rang thu â sîr voi thumna
(Mk.10:32-34; Lk.18:31-34)
17Khante, Jisua Jerusalemah a hang fe lâiin, kôilôm Sômleiinikahei khah an khâtin a ṭhui a, lampuiah chu inrûkkan an ziangah, 18“Ringai ta u, Jerusalemah ei ife rang a nit a, amakhan Miriam Naipa hih thiampu lalhei neh Dân inriseituhei kutah inmanin om a ti. Ithi rangin a chungah thu rêl an ta, 19Jentailhei kutah pêng an ta, anni khan nuiza siamnan mang an ta, hêm an ta, krosah hêmde an ti; nikhomseh, sûn thumka nungah chu kâiithoiin om a ti,” a ti a.
Nu khatka ngênna
(Mk.10:35-45)
20Khanungchu, Jebedaia nupui khah a naiipa inikahei hong iṭhuiin Jisua ziangah a hong a, chibai a ûn a, lungkhamna a ngên a.
21Jisuan a ziangah, “Im nî nuam?” itin ardon a.
Ani khan, “Hi ki naiipa inikahei hih ni ramah, ne changtiang khatkah, ne voitiang khatkah inṭhung rangin ṭong nen kung pêk roh,” a ti a.
22Jisuan a sâm a, “Nin thil ngên hih nin iriat ino a nit. Tuangna kilât ki in rang hih nin iin thei rang mani?” a ti a.
Anni khan, “O, in thei kin ti,” itin an sâm a.
23Jisuan an ziangah, “Ki kilât chu in thei nin ti; khanniseh, tûm ke changtiang neh ke voitianga ṭhung rang chu keima zen rang ni mak e. Kha munhei kha chu ki Pa inrifûkpêkhei ta rang a nit,” a ti a. #TS.12:2.
24Kôilôm sômkahei khan kha thu khah an riatin chu urnaikahei chungah khan an ning a thik tâk a. 25Khanchu, Jisuan an rêngkan a koibûm a, an ziangah, “Jentailhei chunga roirêltuhei chu an inlal tak tak ngai a, an ruaituhei khom an chungah richam an nei tak tak ngai iti nin riat. #Lk.22:25,26. 26Khanniseh, nangmani lâiah chu khangkah khan a nit rang ni mak e. Nin lâia tukhomin mi lian ini a nuamin chu nin isom a nit bak ngêt rang a nit.#Mat.23:11; Mk.9:35; Lk.22:26. 27Khabanah, nin lâia tukhomin a mâsa tak ini a nuamin chu nin suak a chang bak ngêt rang a nit. 28Miriam Naipa lua khom hi mîn a sin an itho pêk ranga zuang ni mak a, mi sin itho pêk rang neh mi itam takka ritlanna ranga a ringna peh rangin ai zuang a nit,” a ti a.#Mk.10:45; 1 Tim.2:5,6; Tit.2:14; 1 Pet.1:18,19.
Jisuan mitdel inikah ân dam thu
(Mk.10:46-52; Lk.18:35-43)
29Jisua neh a kôilômhei khah Jerikoa rithoka an suak lâiin mipui itam takkan an zui a. 30Mitdel inikah lampui kôla ṭhunghei khan Jisua a hong iti an riat kaneh chu, “Davida Naipa, lung nen kham roh,” itin an ikhêk a.
31Mipuihei khan idâirek rangin an ngo a. Nikhomseh, anni khan, “Davida Naipa, lung nen kham roh,” itin an ikhêk ual ual a.
32Jisua khah a ngîr a, kha mitdelhei khah a koi a, “Im nangni ki tho pêk ranga nin inuam?” itin ardon a.
33Anni khan a ziangah, “Pumapa, mit vârna kin inuam a nit,” itin an sâm a.
34Khanchu, Jisuan lung ân kham tak tak a, an mithei a tôn pêk a; khanchu, voikazelin an mu thei a, amah an zui tâk a.
Currently Selected:
MATHAIA 20: BIATBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More
