MATHAIA 18
18
Tûm â roinpui tak?
(Mk.9:33-37; Lk.9:46-48)
1Kha lâiah khan kôilômhei khah Jisua ziangah an hong a, “Rivân Ramah tûm â roinpui rang tak?” itin an ridon a. 2Khanchu, Jisuan naipangte a koi a, an makungah ân ding a, an ziangah, 3“Thu dik nangni ke ril, nin rilet a, naipangtehei angkan nin om non chu Rivân Ramah lût tlak no tin u. #Mk.10:15; Lk.18:17; 1 Pet.2:2. 4Rivân Rama â roinpui rang tak chu ringaiinchîna, hi naipangte angkana om hih a nit. 5Tutu ker ming sika hingkana naipangte lôm chu keima ne lôm an nit. #Mk.9:37; Lk.10:16; Joh.13:20.
Isual ranga thlêmna
(Mk.9:42-48; Lk.17:1-2)
6“Tukhomin hi ne iamhei lâia naipangte khatkah khom hih ân ban chu a ringah bunôilung ilianpa inlin tuikhanglian inthûk takah iṭhul ni sela a ta rangin ṭha ual a ti. 7Ibânahei sikin rammual chung ân khôk vang na! Ibânahei chu om mai a ti; khannisela, ibâna in-omtu chung chu an khôk vang na!
8“Ni kutin manih, ni ken manih, nang ân bân chu tan pai inla, pai zel roh; kut inika manih, ke inika manih ineia kumtluang meidîla nang ipai nêkan chu kut iboi manih, ke boi manih puma ringnaa lût chu ni ta rangin a ṭhat ual.#Mat.5:30. 9Ni mit khomin nang ân bân chu ikhel pai inla, pai zel roh; mit inika neia dûkmun meidîla nang ipai nêkan chu mit khatkah bang ineia ringnaa lût chu ni ta rangin a ṭhat ual.#Mat.5:29.
Bera rimang ṭongrikhek
(Lk.15:3-7)
10“Hi mi chîntehei lâia khatkah khom hih musit loi rangin ridîn rei. Rivâna an vântirtônhei kha ki Pa rivâna makungah an om mai ngai iti nangni ke ril. 11Miriam Naipa hih armanghei izonga saninring rang piala zuang a nit.
12“Mi khatkan bera rizakah nei sela, an lâia khatkah rimang sela, ingkam tho sela nin iam? Sômikuakkah ikuakkahei khah itlâng panga bûmin mâng a ta; khanchu, fêng a ta, armang khah va zong a ti. 13Thu dik nangni ke ril, a va mun chu sômikuakkah ikuakkah armang inohei nêkah khan kha khatka chungah khan lôm ual a ti. 14Khangkah ngirin, hi mi chîntehei lâia khatka rimang khom hih nin Pa rivâna mi khan ai nuam ino a nit.
Suapui thil thonsual
15“Ni suapuiin ni chungah thil isual a sinin chu fen la, â châina khah inmun la, idâirek kan nin ruaikah bang riatah iril roh. Ni ṭong arngaiin chu ni suapui khah ni înê nôk nîng a ti. #Lk.17:3; 1 Kor.6:1-6; Gal.6:1; Jak.5:9,20; Lev.19:17; Dn nik.19:15. 16Khanniseh, ni ṭong arngai non chu mi dang khatka manih, inika manih ṭhui sa roh; khanchu, Pathian Thubûn ai ti angkan ni ṭong murdi khah riatpuitu mi inika manih, ithumka manih bâia indet ni thei a ti. 17Khante, an ṭong khom arngai non chu thil tinrêng koindanghei ziangah ithlun roh. A nungkhôn takah koindang ṭong khom arngai nuam non chu kha mi khah chu sanong angkan manih, siadôltu angkan manih be roh.
Ikhap neh iphal
18“Thudik nangni ke ril, rinêng chunga nin ikhuap#18:18 ‘Ikhap…iphal’ iti thei a nit. kah rivânah ikhuap nîng a ta, rinêng chunga nin isût kah rivânah khom isût nîng a ti.#Mat.16:19; Joh.20:23.
19“Thu dik nangni ke ril; rinêng chungah hin nin lâia mi inikah lung inrual takka îthu-ah khom an ṭongṭaiin chu, ki Pa rivâna min nangni sin pêk a ti. #Lk.9:9. 20Mi inika manih, ithumka manih ker minga an ribûmna kipah an lâiah kî om ngai a nit,” a ti a.
Isom izâna nei ino ṭongrikhek
21Khanungchu, Petera khah Jisua ziangah a hong a, “Pumapa, ki suapuiin ki chungah thil thonsual mai sela, voi izâkâm ke zâ rang? Voi sarika tenâm ai nit rang?” itin ardon a. #Lk.17:3,4.
22Jisuan a ziangah, “Voi sarika tenah ni mak, voi sari mun sômsarika tenah a nit.#Riph.4:24.
23“Khasikah khan Rivân Ram chu rêng khatkah â somhei zianga sum chungchâng infel itumtu neh inrikhek a nit.#Mat.25:19. 24Khante, hang eninfel a phut kaneh chu mi khatkah talent sîngka ribâng a ziangah an hong ṭhui a. 25Kha som khan tuakna rang a nei no sikin rêng khan amah neh a nupui neh a naihei neh ai nei murdi izuar a, a lâkai ituak rangin thu a pêk a. 26Khanchu, isom khan rêng makungah rikhûk idilin â bok a, ‘Ki chungah ner ngai lân sôt inla, a rêngkan nang tuak khai ki ti,’ itin a ngên a. 27Rêng khan lung ân kham a; khanchu, a lâkai kha a zâ riai a, â thla tâk a.
28“Khanchu, kha mi khah a fe a, â som champuihei lâia khatkah, a duli #18:28 Tangkarua gram 3.98 vêla rik, rilofa sûkah thalo a nit a, denari an ti ngai. rizaka ribâng a va mu a, a man a, a ring â râk pêk a, ‘Ni lâkai kha ne tuak ta roh,’ a ti a. 29Kha â som champui khah â bok a, ‘Ki chungah ner ngai lân sôt inla, nang tuak ki ti,’ itin a ngên a. 30Khannisela, nuam mak a, a lâkai a tuak mâkah tâng inah a khum tâk a. 31Khante, isom danghein a sintho dân khah an mun an ringai a siat a; rêng ziangah an fe a, thil tinrêng an va sîr pêk a. 32Khanchu, rêng khan isom khah a koi a, a ziangah, ‘Isom mangmunboi, ni ner phat sikin ni lâkai murdi nang ki îzâ a nit kha. 33Lung nang ki înkham angkan nang khomin ne som champui lung nen kham rang kêng ai nit,’ a ti a. 34Rêng khah a ning a thik tak tak a; khanchu, a lâkai a tuak zoi mâkah chu kha som khah kuttum itho rangin tâng inah a khum tâk a,” a ti a.
35Khante, Jisuan, “Mi tinin nin lungril takin nin suapui nin izâ non chu ki Pa rivâna mi khomin khangkah ngirah khan nin chungah thông a ti,” itin a ṭong ân mong tâk a.
Currently Selected:
MATHAIA 18: BIATBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More
