MATHAIA 17
17
Mêl danglamna
(Mk.9:2-13; Lk.9:28-36)
1Khante, sûn rukka nungah chu Jisuan Petera, Jakoba neh Johana hei a ṭhui a, an khât bangin itlâng risângah a fepui a. #2 Pet.1:17,18. 2An mitmuah khan Jisua mêl a hong danglam a, a mêl inî angkan a hong vâr a, a puansilhei khom a hong vâr a, a hong ri-el tâk a. 3Khanchu, kôilôm ithumkahei khan Mosia neh Elija khan Jisua an risônpui lâi an mu a. 4Khante, Petera khan Jisua ziangah, “Pumapa, hintaka om hih ei ta rangin a ṭhat; ni nuamin chu dângdite ithumkah sin ki ti; nangma rang khatkah, Mosia rang khatkah, Elija rang khatkah,” a ti a.
5A la ṭong mai lâi takin sûm ivâr ri-elin anmani a zuang rikhû a. Sûma rithokin rôl khan, “Ani hih ki Naipa lungthlung, kî lôm tak takah chu a nit; ama thu hih ringai rei,” a ti a. #Riph.22:2; Lap.2:7; Isa.42:1; Mat.3:17; 12:18; Mk.1:11; Lk.3:22.
6Kôilômhei khan kha rôl khah an riat a, an ṭi tak tak a, rinêngah an ibok rak tâk a. 7Jisua a hong a, anni chu a tôn a, “Thoi rei, ṭi no rei,” a ti pêk a. 8Khanchu, an hang tang a, Jisua ti no chu tute a dang mu khâi mak a.
9Khanchu, itlâng ata an zuang ṭumin chu Jisuan an ziangah, “Miriam Naipa hih thina rithoka a thoinôk mâkah chu nin thil mu hih tute iril tlak no rei,” itin thu a pêk tâk a.
10Khante, kôilômhei khan Jisua ziangah, “Dân inriseituhein, ‘Elija ai zuang bak rang a nit,’ îtho sika an iti mani?” itin an ridon a.
11Jisuan anni khah a sâm a, “A dik takkan Elija kha ai zuang bak rang a nit, thil tinrêng aman lei siam infel riai a ti. 12Khanniseh, nangni ke ril, Elija chu a zuang pial tâk a; mihein amah chu lei reh mak a, an nuam an lei ilo a nit. Khangkah ngirin Miriam Naipa khom hih an nuam an ilo rang a nit,” a ti a. #Mat.11:14.
13Khanchu, kôilômhei khan Baptistu Johana thurchi an ziangah a îsîr a nit iti an riat tâk a.
Jisuan ramrili iman naipang ân dam
(Mk.9:14-29; Lk.9:37-43)
14Khante, mipuihei ziangah an hong kîr nôkin chu mi khatkah Jisua ziangah a hong a, a makungah rikhûk a dil a, 15“Pumapa, ki naipa lunginkham roh; risengol rivoi a nit a, a tuang tak tak tâk a, voi itam takkah meiah neh tuiah â lîr tâk a. 16Ni kôilômhei ziangah ki hong ṭhui a; khanniseh, anni lakin indam thei mak a,” a ti a.
17Jisuan a sâm a, “Ingkana iamna boi rai im nin init tâk na! Itena sôt im nin zianga omin nangni ki ngaitua thei ranga? Naipang khah ki ziangah hong ṭhui rei,” a ti a. 18Jisuan ramrili khah thu a pêk a, naipangpa sung ata khah a suak tâk a; kha zoro takah khan a hong dam tâk a.
19Khanungchu, kôilômhei khah Jisua ziangah an hong a, “Itho sik im keimanin chu kin ûmisua thei no?” itin mi riat loiah an ridon zâi a.
20Jisuan an ziangah, “Nin iamna roi sika a nit. Thu dik nangni ke ril, iamna anṭam ru tiakah nin neiin chu hi tlâng ziangah hin, ‘Hintaka rithokah hin son varthon roh,’ tîng nin ta, rithon zel a ti. Sin thei ino zel îte nei no tin u. 21Hingkana hi chu ṭongṭaina neh bu ngei ti non chu îten ûmisua thei mak e,” a ti a. #Mat.21:21; Mk.11:22,23; Lk.17:6; 1 Kor.13:2.
Jisuan a thi rang thu â sîr nôkna
(Mk.9:30-32; Lk.9:43-45)
22Kôilômhei khah an rêngkan Galili ramah an hong nungah khan Jisuan an ziangah, “Miriam Naipa hih miriamhei kutah inmanin om a ta, 23anni khan that an ta; nikhomseh, sûn thumka nungah chu kâiithoiin om a ti,” a ti a. Khanchu, kôilômhei kha an bei a dong tak tak a.
Tempil sia chôi thu
24Jisua neh a kôilômhei kha Kapernaum an hong tlungin chu Tempil siadôltuhei khah Petera ziangah an hong a, “Nangni inriseitu hin Tempil sia#17:24 Drachma inikah tina a nit, Sekel rizâtkah, Tempil sia ranga an ipêk ngai chu a nit. Drachma hi tangkarua gram 7.3 vêla rik a nit, rilofa sûn lika thalo vêl a nit. a chôi ngai im?” itin an ridon a.
25Petera khan, “O, a chôi ngai,” itin a sâm a.
Petera khah in a lûtin chu Jisuan a lei isôn a, “Simon im ner ngai dân? Hi rammuala rênghei ziangah hin tûm sia chôi ngai? A ram mihei im, ram dang mihei im?” a ti a.
26Peteran, “Ram dang mihei” itin a sâm a.
Jisuan, “A nitin chu a ram mihei chu sia an chôi ai nang ino a nit khate. 27Nikhomseh, hi mihei lung inhoi ino hih nuam mang me. Khasikin, dîlah fen la, rikuai va chia roh. Inga nî man masatak bâiah khan ei ruaika Tempil sia ei chôi inrup bang sum tangka inikah mûng ni ti. Amakhah hong chôi inla, ei chôitum khah an ziangah peh roh,” a ti a.#Rom.13:7.
Currently Selected:
MATHAIA 17: BIATBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More
