MATHAIA 16
16
Risin an zong thu
(Mk.8:11-13; Lk.12:54-56)
1Khante, Farisaihei neh Sadukaihei ṭhenkah Jisua ziangah an hong a, ama fiana rangin rivân ata risinsiana thil rikhêl anmani inmu rangin an ngên a.#Mat.12:38; Lk.11:16. 2Nikhomseh, Jisuan an ziangah, “Kholoi a hong nitin chu ‘Khua hoi a ti, kôl kêng a sen,’ nin ti ngai. 3Zîngah khom, ‘Vuani chu rua ai sûr rang nîng a ti, kôl a sen a, rivân arnîm,’ nin ti ngai. Rivân ienin rammual a hoi rang neh a hoino rang nin riat thei a; khanniseh, atûn lâi zoro risinsianahei hi chu nin iriatthiam thei ino a nit. 4Atûn lâi thoithar, mi sia tak neh Pathian ngaisak inohei o, risinsiana thil rikhêl nin ne izong na? Jona risinsiana banah chu nin ziangah risinsiana thil rikhêl dang rêng rêng ipe ni no nih,” itin a sâm a. Khanchu, anmani a mâk a, a rot pat tâk a.#Mat.12:39; Lk.11:29; Jon.3:4,5.
Farisaihei neh Sadukaihei chol
(Mk.8:14-21)
5Kôilômhei khah dîl râl an kâiin chu ibai ichôi an hong ringil a. 6Jisuan an ziangah, “Farisaihei neh Sadukaihei chol ata ridîn unla, rivêng rei,” a ti pêk a.#Lk.12:1.
7Khante, anni khan, “Ibai ei hong chôi no sika amahih ai ti a nit,” itin an khâtin an isîr inrituk a.
8Jisuan amakhah a riatin chu an ziangah, “Ithôm ibai nin nei no thu ringot nin ibuaipui hi? Nin iamna a chîn vang na!#Mat.6:30; 8:26; 14:31. 9Nin lai riat tlak ino mani? Mi sângringakahei ta ranga ibai ringaka kî khoi khah nin iriat khâi ino mani? An fâk bân khamlu izâkâm nin la însip kha?#Mat.14:17-21. 10Mi sângilikahei ta ranga ibai sarikah rêk khate? An fâk bân khamlu izâkâm nin la însip kha?#Mat.15:34-38. 11Nin ziangah ibai thurchi isîr mang iti ithôm nin riat no? Farisaihei neh Sadukaihei chol ata ridîn rei,” a ti a.
12Khanungchu, kôilômhei khan ibaia pol ngai chol ata ridîn rang ni loiin, Farisaihei neh Sadukaihei inriseina ata ridîn ranga a îril a nit iti an riat tâk a.
Peteran Jisua nitna ân puang
(Mk.8:27-30; Lk.9:18-21)
13Khante, Jisua kha Kaisara Filipi bial a hong tlungin chu, a kôilômhei ziangah, “Mihein Miriam Naipa hih tûm a nit an ti?” itin ardon a.
14Anni khan, “Ṭhenkan, ‘Baptistu Johana a nit,’ an ti a; ṭhenkan, ‘Elija a nit,’ an ti a; ṭhenkah nôkin chu, ‘Jeremia manih, anitnole, zânthla tukhôk manih a nit,’ nang an ti,” itin an sâm a.#Mat.14:1,2; Mk.6:14,15; Lk.9:7,8; Joh.1:21.
15Khante, ani khan an ziangah, “Khateh nangmanin tûm a nit nin ne ti?” itin ardon a.
16Simon Petera khan a sâm a, “Mesia, Pathian iring Naipa ni nit,” a ti a.
17Jisuan a ziangah, “Simon, Jona naipa, ni ham a ṭhat e. Hi thutak hih taksa neh thisenin nang a înriat ni mak a, ki Pa rivâna mi nang înriat a nit.#1 Kor.15:50; Gal.1:16; Efes.6:12; Heb.2:14. 18Khaangkan, nangmah Petera: Lungpui ni nit iti nang ke ril; hi lungpui chungah hin ki koindang inding ki ta, thina khomin inê no nih. 19Rivân Ram chabihei nang pêng ki ta; rinêng chunga nî khuap #16:19 ‘Khuap…isût’ iti thei khom a nit. kah chu rivâna khom ikhuap nîng an ta, rinêng chunga ni sût kah chu rivânah khom isût nîng an ti,” a ti a.#Mat.18:18; Joh.20:23; Isa.22:22; Thup.1:18.
20Khanungchu, Mesia a nit iti tute iril loi rangin kôilômhei khah thu a pêk tâk a.
Jisuan a tuang rang thu â sîr
(Mk.8:31—9:1; Lk.9:22-27)
21Kha rizoi ata chu Jisuan a kôilômhei ziangah ifel riai kan thu â sîr tâk a, an ziangah, “Jerusalemah kî fe ngêt rang a nit a, upahei, thiampu lalhei neh Dân inriseituhei kutah kî tuang tak tak rang a nit. Ne that an ta; nikhomseh, sûn thumka nungah chu kâiithoiin om ki ti,” a ti pêk a.
22Peteran ani khah a khâtin a ṭhui a, a ziangah, “Pumapa, ni thei tlak no nih; kha thil khah ni chungah tlung tlak no nih,” itin a ngo a. 23Jisua khah arhêl a, Petera ziangah, “Soitan, ke nungah lôn roh, ki lam ne dantu ni nit, Pathian lungdo ngaitua loiin, miriam nuam lam ringot nî ngaitua a nit hih,” a ti a.#Mat.4:10.
24Khanchu, Jisuan a kôilômhei ziangah, “Tutu ne zui a nuamin chu mahni phialin a kros riputin ne zui riseh.#Mat.10:38; Lk.14:27. 25Tutu a ringna inrihuam inuam kan ichân a ta; tutu keima sika a ringna chân kan inzôk a ti.#Mat.10:39; Lk.17:33; Joh.12:25. 26Mîn rammual hih a pumin nei sela, a ringna chu ichân sela, a ta rangin im rifena a mu ranga? Mu no nih. A ringna mu nôkna rangin îte a pêk rang ai nei ino a nit. 27Miriam Naipa hih a Pa roinpuinaa rithlukin a vântirtônhei neh ai zuang rang tâk a nit, kha tikin chu mi tin an sintho angkah chitin thung a ti. #Mat.25:31; Lap.62:12; Rom.2:6; Thup.22:12. 28Thu dik nangni ke ril, hintaka om ṭhenkahei hih Miriam Naipa inlal takka a zuang an mu mâkah chu thina ritem ino rang an om,” a ti a.
Currently Selected:
MATHAIA 16: BIATBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More
