MATHAIA 15
15
Pipu thumâk
(Mk.7:1-13)
1Khanungchu, Jerusalema rithokin Farisaihei neh Dân inriseituhei Jisua ziangah an hong a, a ziangah, 2“Ithôm ni kôilômhein ei pipu thumâkhei hih an zôm ngai no? Fâk an zong rang khomin ti lam angkan an kut risuh ngai mak e,” an ti a.
3Jisuan an ziangah, “Ithôm Pathian thupêk zôm loiin nangmani khâta thumâk khah nin izui hi? 4Pathianin, ‘Ni nu neh ni pa ngîk roh, tutu a nu manih, a pa manih, vâni sâm chu ithat rang a nit,’ a ti a. 5Khannisela, nangmanin chu ‘Tutu a nu manih, a pa manih ziangah ni ne mangna rang murdi kha Pathian ta tâk kêng ai nit, a tin chu a nu neh a pa a ngîk rang ni khâi mak,’ nin ti ngai a. 6Khangkah khan nangmani thumâk nin zôm theina rangin Pathian thupêk khah iten nin ibe ngai ino a nit. 7Nangni vârrilethei o, Isaian nin chungchâng a lei îsîr tâk khah â dik vang na!
8“‘Hi mihei hin an bâiin an nen pâk a,
Nikhomseh, an lungril chu a ne ilat vit a nit.#Isa.29:13.
9Ki dânhei angkah takin miriam thupêkhei an risei a,
Khasikin, chubai an ne ûnna hih â tlong a nit,
Pathianin a ti,’ itia a lei irziak kha,” a ti a.
Miriam innim ngai thilhei
(Mk.7:14-23)
10Khante, Jisuan mipuihei khah a koi a, an ziangah, “Ringai unla, rethiam rei. 11Bâia lûtin miriam innim ngai mak a; bâia suakin kêng miriam a înnim ngai a nit,” a ti a.#TS.10:14,15; 1 Tim.4:3.
12Khanungchu, a kôilômhei an hong a, a ziangah, “Ni ṭong khan Farisaihei lungril a îphop a nit iti ni riat im?” an ti a. 13Jisuan anni khah a sâm a, “Kung murdi ki Pa rivâna mi iphun nino chu iphâi paiin om a ti.#Isa.60:21; Joh.15:2. 14An chungthu-ah nin ilung inbuai no rei. Anni khah mitdelhei ruaitu mitdel an nit a; mitdelin mitdel ngir â ruaiin chu an ruaikan khurah an iṭul ngai a nit,” a ti a.
15Peteran a ziangah, “Kha ṭong omzia khah ne rilfia pêk roh,” a ti a.
16Jisuan a ziangah, “Mi danghei nêkan la vâr ual ngir mak chei. 17Nin iriat thiam inôm ai nit? Bâia lût murdi chu phûngah a lût a; khanungchu, vâikôm fenaah ai suak nôk ngai a nit. 18Khanniseh, bâi ata hong isuak chu lungrila hong rithok a nit a, kha thilhei ngêi khah miriam innim ngai chu a nit. #Mat.12:34. 19Lungrila rithokin ngaituanan sualhei a hong suak a, kha ngaituanan sualhei khan mi thatna hei, inrêna hei, riditna hei, inruna hei, mi lêmnahei neh Pathian isîrinsiatna hei a îthlun ngai a nit.#Mk.7:15. 20Khahei khah miriam innim ngai chu a nit. Khannisela, kut risuh loia fâk izong hin chu mi innim ngai mak e,” a ti a.
Nupangnu iamna
(Mk.7:24-30)
21Jisuan kha mun khah iman Tura neh Sidon khopui kôla ramhualah a fe tâk a. 22Kha rama om, Kanan nupangnu khatkah a ziangah a hong a, “Davida Naipa, lung nen kham roh, ki nainu ramrilin a man a, denginthei takkan ai om a nit,” itin â khêk a.
23Khannisela, Jisuan chu bâika luan sâm mak a. A kôilômhei a ziangah an hong a, “Hîm nu hih infe ta roh, ei inungah a ne zui a, â khêk diai a,” itin an ngên a.
24Khanchu, Jisuan, “Israel mi, bera rimanghei ziang bangah kêng itir kî nit,” itin a sâm a.#Mat.10:6,23.
25Kha ṭong khah nupangnu khan a riatin chu a hong a, a ke bulah â bok a, “Epu, ne san roh,” a ti a.
26Jisuan, “Naihei ibai ilah pêk a, uihei zianga pe chu idik mak e,” a ti a.
27Nupangnu khan a ziangah, “Epu, inih chu a nit, khan uihei khomin an puhei dochama rithoka ibai zit iṭul chu an fâk ngai im ki ta,” itin a sâm a.
28Kha tenan chu, Jisuan a ziangah, “Nupang, iamna liantak inei ni nit. Ni lungdo tak khah ni ta rangin isinin om a ti,” a ti pêk a. Khanchu, a nainu khah kha zoro takah khan a hong dam tâk a. #Mat.9:22,28; Mk.10:52; Lk.7:50; 17:19.
Jisuan mi itam takkah ân dam
29Khante, Jisua chu khantak ata khah a suak a, Galili dîl rikamah a fe a; itlângah a lui a, amakhan â ṭhung a. 30Mipui itam takkah a ziangah an hong a, kebâihei, mitdelhei, fangisiahei, bâiiboihei neh dam ino dang itam takkah Jisua ke bulah an hong ṭhui a; ani khan a lei indam khai a. 31Mipuihei khan bâiiboi hong iṭonghei, fangisia hong idamhei, kebâi hong ilônhei neh mitdel hong imu thei tâkhei khah an mun chu an ringai arkhêl tak tak a; khanchu, Israelhei Pathian khah an inpâk tâk a.
Jisuan mi sângilikah a vâi
(Mk.8:1-10)
32Khante, Jisuan a kôilômhei khah a koi a, an ziangah, “Mipuihei hih sûn thumkah ki ziangah an om tâk a, atûnah hin îte ifah rang an nei no sikin ke lung a kham tak tak, bu ngeiin infe nuam mang e; khanonchu, lam lâiah ṭâmisôl rivoiin an rizal duai lôiin,” a ti a.
33Kôilômhei khan a ziangah, “Hi dôra mipui vâi inkhop rangin hi ramchârah hin takâm fâk ei mu rang?” an ti a.
34Jisuan, “Ibai izâkâm nin inei?” itin ardon a.
Anni khan, “Ibai sarikah neh inga ichîntekah” an ti a.
35Khanchu, Jisuan mipuihei khah rinênga ṭhung rangin thu a pêk a. 36Khante, ibai sarikah neh inga ichîntekah khah a lâk a, Pathian ziangah lômthu â sîr a, a khoi a, kôilômhei ziangah a pêk a; kôilômhei khan mipuihei ziangah an pêk tâk a. 37An rêngkan an fâk a, an khop seng a. Khanchu, kôilômhei khan an sem bân khah khamlu sarikah an la însip a nit. 38Â fahtuhei khah nupang neh naipang tep loiin mi sângilikah an nit. 39Khanungchu, Jisuan mipuihei â ṭhîn zoiin chu rikuangah a chuang a. Magadan #15:39 Mss ṭhenkatah chu ‘Megadon, Magdala’ itihei a nit. ramhual tiang a fe tâk a.
Currently Selected:
MATHAIA 15: BIATBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More
