MATHAIA 14
14
Baptistu Johana thi thu
(Mk.6:14-29; Lk.9:7-9)
1Kha zoro lâiah khan Galili rama rêng Heroda khan Jisua thurchi a lei riat a. 2A mihei ziangah, “Hi mi hih Baptistu Johana khah a nit ngêt; mithi lâi ata a hong iring nôk tâk a nit hih. Khasikin kêng hi sinrikhêl sin theina ritha hih ai nei,” a ti a.
3Matonah khan Herodan Johana khah a lei inman a, a khuap a, tâng inah a lei ikhum tâk a nit. Khangkana a thona bi chu a suapuipa Filipa nupui Herodi sika a nit.#Lk.3:19,20; Lev.18:16; 20:21. 4Baptistu Johana khan Heroda ziangah, “Herodi neh nin irnei hih idik mak e,” a lei ti pêk tâk a. 5Heroda khan Johana khah ithat a nuam a; nikhomseh, Johana kha zânthlan an be sikin Juda mipuihei lak kha a ṭi a.
6Khannisela, Heroda suak champhaphâk nin chu Herodi nainu khah mipuihei makungah a lâm a, Heroda khah ân lôm tak tak a; 7Herodi nainu ziangah ṭong ân kung a, “Îkhom ni ne ini kah chu nang ipeh rangin ṭong ker khâm,” a ti a.
8Khanchu, ani khan, a nu he be lam angkan, “Hi munah hin atûn khêngin Baptistu Johana lu ne peh roh,” a ti a.
9Rêng khah â lung dûk a tong tak tak a; nikhomseh, a khualmihei makungah ṭong a lei inkung tâk sikin a zong lam angkana tho rangin thu a pêk tâk a. 10Khanchu, mi a tir a, tâng ina om Johana lu khah ân tan tâk a. 11A lu khah khêngin an hong chôi a, nungâktenu ziangah an pêk a, ani khan a nu ziangah a chôi tâk a. 12Khante, Johana kôilômhei kha an hong a, a ruak khah an chôi a, an phûm a; khanchu, an fe a, Jisua khom an isîr pêk tâk a.
Jisuan mi sângringakah a vâi thu
(Mk.6:30-44; Lk.9:10-17; Joh.6:1-14)
13Khante, Jisuan Johana thurchi khah a lei riatin chu khataka rithokin a suak a, rikuangin a khât bangin mun infiarah a fe tâk a. Mipuihein an riatin chu an khuahei iman imuang tianga fen an zui a. 14Jisua rikuang ata a suak a, mipuihei khah a mun chu iṭha takkan lung ân kham a, dam inohei khah ân dam a.
15Kha nî kholoiah khan a kôilômhei an hong a, a ziangah, “Inî lak a zuang ikâi veng tâk a, hi mun lak hih mun infiar kêng a nit a, mipuihei hih infe tan la, khosungheiah fe sela, an fâk rang ngaitua riseh,” an ti a.
16Jisuan an ziangah, “An fe rang nang mak e, nangmani ngêiin ifah rang peh rei,” a ti a.
17Anni khan a ziangah, “Hin takah hin ibai ringakah neh inga inikah banah chu îte dang nei mang ung e,” itin an sâm a.
18Jisuan, “Hin ki ziangah hong chôi rei,” a ti a. 19Mipuihei khah loisûl chunga ṭhung rangin thu a pêk a; khanchu, ibai ringakah neh inga inikah khah a lâk a, rivân tiang ienin Pathian ziangah lômthu â sîr a. Ibai khah a khoi a, kôilômhei ziangah a pêk a, kôilômhei khan mipuihei ziangah an sêm pêk tâk a.#Mk.14:22; Lk.24:30. 20Mi tinin an fâk a, an khop seng tâk a. An sem bân khah an bûm a, khamlu sômleiinikah a lai sip a nit. 21A fahtuhei khah nupang neh naipang tep loiin mi sângringakah vêl an nit.
Jisua tui chungah a lôn
(Mk.6:45-52; Joh.6:15-21)
22Khante, Jisuan mipuihei khah â ṭhîn lâiah khan dîl râl tianga lei ife rangin a kôilômhei khah rikuangah ân chuang a. 23Mipuihei â ṭhîn zoiin chu a khâtin itlângah iṭongṭai rangin a fe a. Kholoi a hong zîng tenan khom amakhan Jisua chu a khât bangin a om a.
24Kha zoroah khan rikuang khah dîlah, vakôla rithoka ilah takah a om tâk a, ithlîn a no tiang a sêm sikin tuirisokin kiangtiang kiangtiang â sok a. 25Khanchu, zîng kôlrisam rang to vêlin chu Jisua kha tui chunga lônin, a kôilômhei tiang a hong a. 26Kôilômhein tuia a hong lôn an mun chu an ṭi a, “Ithirthla kêng ai nit soh,” an ti a, rithlavâiin an ikhêk rak rak a.
27Jisuan a hei isôn zel a, “Lungringam takkan om rei. Keimah kêng kî nit, ṭi no rei,” a ti a.
28Khanungchu, Petera khan, “Pumapa, nangmah ni nit titakin chu tui chunga ni zianga hong rangin thu ne peh roh,” a ti a.
29Jisuan, “Hong roh,” itin a sâm a. Khanchu, Petera khah rikuang ata a suak a, Jisua tiang ipanin tui chungah a lôn tâk a. 30Khannisela, ithli rât khah a mun chu a ṭi a, tuiah rinîk rangin a om tâk a, “Pumapa nen zôk roh,” itin â khêk a. 31Jisuan a hei iban a, â tûk zel a, a ziangah, “Ni iamna a roi vang na! Ithôm nî ringla?” a ti pêk a. 32An ruaikan rikuang sungah an lût a, ithli khom a dâidup zel tâk a. 33Khanchu, rikuanga kôilôm iomhei khan Jisua chubai an ûn a, “Pathian Naipa ni nit titak hih,” an ti a.
Jisuan Genesaret rama damino ân dam
(Mk.6:53-56)
34Dîl râl an kâiin chu Genesaret ram an hong tlung tâk a. 35Kha muna mihei khan Jisua kha an lei riat zel a. Khasikin, an kôlvêl ram murdiah khan mi an tir a, dam inohei murdi khah Jisua ziangah an hong ṭhui a. 36Dam inohei khan a puan môr ilua intôn rangin an ngên a; â tôn murdi chu an dam tâk a.#Rit.15:38; Mk.3:10; Mat.9:20.
Currently Selected:
MATHAIA 14: BIATBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More
