MATHAIA 13
13
Fachi rithetu thu
(Mk.4:1-9; Lk.8:4-8)
1Kha nî sûn ngirah khan Jisua khah in ata a suak a, dîl rikamah a fe a, amakhan â ṭhung a, ân risei a.
2A zianga mipui hong ribûm khah an tam tak tak a; khanchu, rikuangah â ṭhung a, lômpuihei kha chu ṭiaiphoiah an iding a.#Lk.5:1-3.
3Khanchu, ṭongrikhekin thurchi itam takkah â sîr a: “Ringai ta u, voikata chu mi khatkan bu rît rangin a fe a. 4Fa chi arthe a, ṭhenkah lampuiah a tlâk a, ivahein an fâk riai tâk a. 5Ṭhenkah lungpharpha rinêng riphânaah a tlâk a, rinêng â sâ no sikin a hong ṭoi zel a. 6Khannisela, inî a hong risâng ianin chu a em rizual a, rizung a tlâk inthûk no sikin a ram nôk rip tâk a. 7Ṭhenkah chu riling kârah a tlâk a, riling khah a hong thuar a, a dîp inrimang tâk a. 8Nikhomsela, ṭhenkah chu rinêng iṭhaah a tlâk a, a ṭhen a bâk rizakan, a ṭhen a bâk sômirukkan, a ṭhen a bâk sômithumkan a hong irâ tâk a,” a ti a. 9Khante, Jisuan a ṭong ikhârnan an ziangah, “Ikuar inei kan chu iṭha takkan ringai riseh,” a ti a.
Ṭongrikhek thiltum
(Mk.4:10-12; Lk.8:9-10)
10Khante, kôilômhei khah Jisua ziangah an hong a, “Ithôm lômpuihei ziangah ṭongrikhekin thu ni îsîr ngai?” an ti a.
11Jisuan an ziangah, “Rivân Ram thu rithup riattheina nin ziangah ipe a nit a, mi danghei ziangah chu ipe ni mak e. 12Tukhom â nei kah chu ipeh sa nîng a ta, nei intam ual a ti; tukhom â nei ino kah chu ai nei viatte khom lah pêk rip an ti.#Mat.25:29; Mk.4:25; Lk.8:18; 19:26. 13An ziangah ṭongrikheka thu ke sîrna bi chu an en ṭiana an mu thei nona rang neh an ringai ṭiana an riat thei nona rangin a nit. 14Khasikin, Zânthla Isaia rillôkna thu khah an chungah a zuang itlung a nit:
“‘Hi mihei hin ringai ṭian an ta chu reh thei no nih;
En ṭian an ta chu mu thei no nih.#Isa.6:9,10; Mk.8:18; Joh.12:39-41; TS.28:26,27.
15Hi mihei lungril hih a lei rimul tâk a,
An ikuarhei a lei sêt tâk a,
An mit khom a lei izîng tâk a nit.
Khangkan, ni no sela chu an mitin mûng an ta,
An ikuarin riang an ta,
An lungrilin reh thei an ta,
Ki tiang hong ngat nôk an ta,
Ki lei îndam rang a nit,
Pathianin a ti,’ ai ti kha.
16“Nangni chu nin vân a ṭhat vang na! Nin mitin a mu a, nin ikuarin ai riat a nit.#Lk.10:23,24; Heb.11:13; 1 Pet.1:10-12. 17Nangni ke ril, zânthlahei neh Pathian mi itam takkah khomin nin thil muhei hih â mu an nuam tak tak a; nikhomseh, mu thei mak a; nin thil riathei khom hih â ria an nuam tak tak a; nikhomseh, reh thei mak e.
Jisuan fachi rithetu ṭongrikhek a rilfiana
(Mk.4:13-20; Lk.8:11-15)
18“Khasikin, ringai unla, fachi rithetu ṭongrikhek omzia hih risei rei. 19Tutu, Pathian ram thurchi ikuara ria a; khanniseh, rethiam ino chu fachi lampui kôla thla angkah an nit. Mi Sualah khah a hong a, an lungrila rithea om khah a lâk pêk riai ngai. 20Khante, fachi lungpharpha rinêng riphânna thla chu thu an riat kaneh ilôm takka ham zelhei hi an nit. 21Nikhomseh, rizung inthûk an tlâk no sikin om sôt ngai mak e. Thu sika intakna manih, nuamlona manih a hong om kaneh chu an ilîr nôk zel ngai. 22Fachi riling kâra thla chu thu khah an riat a; nikhomseh, hi ringnun lungkângna neh richong hoisakfamna khan thu khah a dîp a, irâ nei loiin ai om ngai a nit. 23Khante, fachi rinêng iṭhaa thla chu thu khah an riat a, riatthiamna khom ineihei hi an nit. Khahei kha chu an irâ a, a ṭhen rizakan, a ṭhen sômirukkan, a ṭhen sômithumkan a hong pung ngai,” a ti a.
Bu lem ṭongrikhek
24Jisuan ṭongrikhek dang an ziangah â sîr nôk a; “Rivân Ram chu mi khatkah a loia fachi ṭha rithetu neh khan inrikhek a nit.#Mk.4:26-29. 25Zânkah mi an in riai nungin, irâl a hong a, bu lâiah khan bu lem arthe a, a rot nôk tâk a. 26Khante, bu khah a hong ṭoi a, a hong vuiin chu bu lem khom a hong ilang sa tâk a. 27Loi ineitu somhei khah an hong a, a ziangah, ‘Epu, ni loiah fachi ṭha ni irthe ni mak im a? Bu lem soh taka rithoka hong iom im ai nit?’ an ti a. 28Ani khan an ziangah, ‘Amakhah chu irâlhei lei irthe a nit,’ a ti a. Isomhei khan a ziangah, ‘Khateh, bu lemhei khah va ṭuan unlang ni nuam im?’ itin an ridon a. 29Ani khan an ziangah, ‘Nuam mang e, bu lem nin ṭuan malamin bu tak khom khah nin ṭuan sa duai lôiin. 30Bu ât zoro a tlung mâkah chu bu tak neh bu lem khah munkan thuar riseh. Khanchu, bu ât tikin bu âttuhei ziangah, bu lem khah iphâi masa a, itêl a, ihâl baka kha rizoia bu tak khah iât a, ki fasiara thun rangin he la be ta rong,’ a ti,” a ti a.
Anṭam chi ṭongrikhek
(Mk.4:30-32; Lk.13:18-19)
31Jisuan ṭongrikhek dang â sîr nôk a: “Rivân Ram chu min anṭam chi a chôi a, a loia a irthe angka hi a nit. #Mat.17:20. 32Amakhah chimu murdi lâia â chîntak a nit a; nikhomseh, a hong thuar tikin chu chimu danghei nêka â lian tak a nit ngai a. Thingkung a hong chang a; khanchu, chungavuang ivahei an hong a, â ṭangheiah ribu an siam ngai,” a ti a.
Chol ṭongrikhek
(Lk.13:20-21)
33Jisuan ṭongrikhek dang â sîr nôk a: “Rivân Ram chu nupang khatkan chol a lâka, baidi her sômilikah neh a thoi riai mâka khamlua înripol angkah a nit,” a ti a.
Jisuan ṭongrikhek a mangna bi
(Mk.4:33-34)
34Khahei murdi khah Jisuan lômpuihei ziangah ṭongrikhekin â sîr a, ṭongrikhek ninon chu an ziangah thu îte isîr mak a. 35Kha a thona bi chu zânthla manga thu a lei îsîr:
“An ziangah thu ke sîrin ṭongrikhek mang ki ta,
Khuansiang ata thil rithup chu isîr pêk ki ti,”
iti khah a hong tlung theina ranga a nit.#Lap.78:2.
Jisuan bu lem ṭongrikhek thu a rilfiana
36Jisuan lômpuihei khah iman, insungah a lût a, a kôilômhei an hong a, a ziangah, “Loia bu lem ṭongrikhek khah im a omzia ne ril ta,” an ti a.
37Jisuan a sâm a, “Fachi ṭha rithetu khah Miriam Naipa hi a nit a, loi kha rammual hi a nit. 38Chi ṭha khah Ram naihei an nit a, bu lem kha chu mi Suala naihei an nit; irâl, bu lem rithetu chu Diabola a nit. 39Bu ât zoro chu rammual mong rang zoro a nit a, bu âttuhei khah vântirtônhei an nit. 40Bu lemhei khah an ritik a, meia an ihâl angkan rammual mong tikah khan chu la om a ti. 41Miriam Naipa hin a vântirtônhei khah tir suak a ta, a Ram ata mihei suala inbâtuhei neh sual isintuhei murdi khah bûm an ta,#Mat.24:31. 42mei thi ngai inoah khan pai an ta, amakhan ṭap an ta, an rikam inritông an ti.#Mat.13:50; 22:13; 25:30. 43Khanungchu, Pathian mihei chu an Pa Ramah inî angkan vâr tâng an ti. Ringaina ranga ikuar inei kan chu iṭha takkan ringai riseh.
Richon rithup ṭongrikhek
44“Rivân Ram chu mi khatkan loi lâia richon phûm inrûk a mu suak a, a phûm nôk a, râiifân takkan a fe a, ai nei murdi a zuar a, kha loi khah a irchôk tâk angkah hi a nit.
Lungilu ṭongrikhek
45“Rivân Ram chu mi khatkah lungilu ṭha tak izongtu angkah hi a nit nôk a; 46ani khan lungilu ṭha tak khatkah a mu a; khanchu, a fe a, ai nei murdi a va zuar a, kha lungilu khah archôk tâk a.
Lên ṭongrikhek
47“Rivân Ram chu inga mantuhein an lênkhang dîlah an zar a, inga chi tinrêng an iman angkah hi a nit nôk a. 48Lên khah a sip tenan chu dîl rikamah an kâi isua a, amakhan an iṭhung a; â ṭha murdi chempâiah an thun a, â sia kah chu an pai a. 49Rammual mong tikin chu khangkah khan la om a ti: vântirtônhei zuang suak an ta, mi ṭhahei lâia rithokin mi sualhei kha bûm an ta, 50mei thi ngai inoah khan pai an ta, amakhan ṭap an ta, an rikam inritông an ti,” a ti a.
Thil ilui neh thil ithar
51Jisuan an ziangah, “Kha thilhei murdi khah nin riat thei im?” itin ardon a.
Anni khan, “O, kin riat thei,” an ti a.
52Ani khan an ziangah, “Kha omzia chu Dan inriseituhei murdi Rivân Ram kôilôm ichang kah chu, in ineitu, archon kok ata thil ilui neh thil ithar hong isapsuatu angkah hi a nit,” a ti a.
Nazaretah Jisua inelin a om
(Mk.6:1-6; Lk.4:16-30)
53Jisuan kha ṭongrikhekhei khah â sîr zoiin chu kha mun khah a mâk a, 54a omna ngai khua tiang a kîr nôk tâk a. Inkhôm inah khan anmani ân risei a; a thu sîr iria kan an ringai arkhêl tak tak a, “Hi mi hin hi vârna neh hi sinrikhêl sin theina hih taka rithoka ai mu mani? 55Hi mi hih thingisin ngaitu naipa khah ni mak im a? A nu khom Mari khah ni mak im a? A urênghei khom Jakoba, Josefa, Simona neh Juda hei ni mak im a? 56A farhei khom hintaka om ni mak im a? Hihei murdi hih taka rithoka ai mu mani?” an ti a. 57Khanchu, ani khah an nel tâk a, Jisuan an ziangah, “Zânthla chu ama khua neh a insungmihei lâi ti no-ah chu mun tinah imaritin a om ngai,” a ti pêk a. #Joh.4:44. 58Khante, an iam no sikin kha khuaah khan chu sinrikhêl sin intam mak a.
Currently Selected:
MATHAIA 13: BIATBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More
