MATHAIA 12
12
Sabat chungchânga ṭongridon
(Mk.2:23-28; Lk.6:1-5)
1Khante, sûn itôiteka nungah chu sabatnin Jisua khah bu bilheiah a thleng a. A kôilômhei kha an von a ṭâm a, bu vuihei khah an chun a, an fâk a.#Fes.20:10; Dn nik.5:14; 23:25.
2Farisaihein an mun chu, Jisua ziangah, “En ta, ni kôilômhein sabatnîa itho ranga Dânin ai khap khah an itho a nit hi,” an ti a.
3Jisuan an ziangah, “Davida neh a mihein an vonṭâm lâia an itho khah nin lai tep tlak ngai ino mani?#1 Sam.21:1-6; Lev.24:9. 4Davida khah Pathian inah a lût a, amah neh a mihein Pathian zianga ilan tâk ibai, thiampuhei bangin an fâk ranga rithiang khah an ifâk a nit kha. 5Khabanah, sabatnî tin Tempila thiampu omhei khan Sabatnî Dân an ichâi ngai a, khan khoma thiamno chang ngai mak iti Mosia Dân lekhabuah nin itep ngai ino mani?#Rit.28:9,10. 6Nangni ke ril, Tempil nêka roinpui ual hin ai om a nit.#Mat.12:41,42; Lk.11:31,32. 7Pathian Thubûn, ‘Ribôlna nêkan lungkhamna ki nuam,’ ai ti hih a omzia nin iriatinfel ni sela chu mi ṭhahei khah thiamno inchang no tin u.#Hos.6:6; Mat.9:13. 8Miriam Naipa hih sabatnî Puma kêng ai nit,” a ti a.
Jisuan kut izeng ân dam
(Mk.3:1-6; Lk.6:6-11)
9Jisuan kha mun khah iman inkhôm inah a lût a, 10amakhan mi khatkah kut izeng a lei om a. Jisuan a thonsual itia an nô theina ranga lei ridîp ṭian mi ṭhenkahei khom an lei om sa a, anni khan Jisua ziangah, “Sabatnî-a mi indam hih ei Dânin ai khap mani?” itin an ridon a.
11Jisuan an ziangah, “Nin lâia tukhôk manin bera khatkah nei sela, sabatnin khur inthûkah ṭul ta sela, tûm â kêlisua no rang chei u? #Lk.14:5. 12Bera nêkan miriam chu ai lut ual ok a nit. Khasikin, sabatnî-a mi ṭangpui hih ei Dânin a ne iphal a nit,” itin a sâm a.#Mat.10:31. 13Khanchu, kut izeng ziangah khan, “Ni kut phar roh,” a ti a. A hang phar a, a kut kiangtianga angkah takin a dam vang tâk a. 14Khanungchu, Farisaihei khah an rot a, Jisua an that rang tlia an phan tâk a.#Mk.14:1; Joh.7:30; 8:59; 11:53.
Pathian isom rithlang
15An that rang tlia an phan iti Jisuan a riatin chu kha mun ata a rot a; lômpuihein amah an zui a, dam inohei murdi ân dam a. 16Anni kha a thurchi tute ziangah isîr loi rangin thu a pêk a. 17Pathianin Zânthla Isaia bâia a îsîr khah a hong tlung theina rangin amakhah ai tho a nit:
18“Amah hih ke som, ki irthlang,
Lung kî thlung, a chunga kî lôm tak takah chu a nit.
A chungah ker Thla siang ki ta,
Khanchu, nam tin ziangah ki roirêlna inpuang a ti. #Isa.42:1-4.
19Sêl no nia, ikhêk ual no nia;
Lamilianheiah khom rihu lum tho no nih.
20Dikna khah nêna a pêk mâkah chu
Lâiluang ikûm#12:20 ‘Lâiluang ikûm neh meiser ide rian rian’ iti hih ‘Rât ino neh rizal’ tina nîng a ti. Khahei chungah khan lungkhamna a înlang rang a nit. khah ikhiak no nia,
Meiser ide rian rian khom that no nih.
21Mi tinin a chungah an tûngna ringat an ti,” iti hih.
Jisua neh Belzebula
(Mk.3:20-30; Lk.11:14-23)
22Khante, kha lâiah khan ramrili iman mitdel ṭongtheiino khatkah a ziangah an hong ṭhui a. Jisuan kha mi khah a lei indam a; khanchu, a hong ṭong thei a, a hong mu thei tâk a.#Mat.9:32,33. 23Jisua sintho khah lômpuihei murdi khan arkhêl an ti tak tak a, “Hi mi hih Davida Naipa kha ni mak im a?” an ti a.
24Farisaihei khan chu amakhah an riatin, “Hi mi hin ramrilihei a ûmisua theina chu an rêngpa Belzebulan ritha a pêk sika a nit,” an ti a.#Mat.9:34; 10:25.
25Jisuan an ingaituahei khah a riat a, an ziangah, “Tak ram khom lôm risiamin an ridoi risakin chu iding sôt ngai mak e. Tak khua khom, insungkua khom lôm risiamin an ridoi risakin chu an îlîr rang a nit. 26Khasikin, Soitana khom Soitana ngir a ûmisuan chu amah neh amah ridoi nîng a ta, a ram khah a îlîr ngêt rang a nit. 27Belzebulan ritha a ne pêk sika ramrilihei kî ûmisua theiin nin ne ibe a nit a; khateh, nangni zuihei #12:27 Nin mihei, nin naihei iti thei a nit a; ‘ramrili ûmisua thiamhei’ tina a nit. khan tu sikin im ramrili an lei iûmisua ngai ai nit? Nangni zuihei lei itho ngai khan kêng nin idiknozia a înlang a nit. 28Belzebula ni mak a, Pathian Rithla kêng ramrili ûmisua theina ritha ne pe; hi sikah hin Pathian Ram chu nin ziangah a zuang tlung tâk iti a înlang a nit.
29“Tutên mi rât khah a khuap bak non chu a inah khan ilûtin a neinunhei lah pêk thei no nih. Kha mi rât khah a khuap bak bangin kêng a in khah a îrok thei rang a nit.
30“Tutu, ki tianga ṭang ino kah chu ne doi a nit a; tutu ne bûmpui ino kan chu a îthek indar a nit.#Mk.9:40; Lk.11:23. 31Khasikah khan nangni ke ril, mi an insualna murdi neh Pathian an isîrinsiatna tinrênghei chu izâ nîng a ta; khanniseh, Rithla Rithiang sîrinsia chu izâ ni no nih. #Mk.3:28-30; Lk.12:10. 32Tutu, Miriam Naipa sêl chu izâ nîng an ta; khanniseh, Rithla Rithiang sîrinsia chu atûn neh kumkhuan izâ ni no nih.
Thingkung neh â râ
(Lk.6:43-45)
33“Thingkung iṭha chu â râ khom ṭhâng a ta; thingkung ṭhano chu â râ khom ṭhano nih. Thingkung chu â râah ireh thei a nit.#Mat.7:20; Lk.6:44. 34Irûl richihei o, nangmani isual ṭiankan ingkan im thu ṭha nin isîr thei rang? Lungrila sip ilêt kha kêng bâiin a îsua ngai.#Mat.3:7; 15:8; 23:33; Lk.3:7; 6:45; Jak.3:11,12. 35Mi ṭha khan archon kok ata thil iṭhahei a sapsua ngai a; mi ṭhano khan chu archon kok ata thil isiahei ai sapsua ngai a nit.
36“Nangni ke ril, Roirêl Nikhuan chu ṭong chanlamboi an itho ngai murdi khah la sîr riai an ti. 37Ni ṭong khan thiam nang inchang a ta, ni ṭong ngir khan thiamno nang inchang a ti,” a ti a.
Risinsiana an zong thu
(Mk.8:11-12; Lk.11:29-32)
38Khanungchu, Dân inriseituhei neh Farisaihei lâia mi ṭhenkahein a ziangah, “Minriseitu, ni zianga rithokin risinsiana thil rikhêl imu kin nuam,” an ti a.#Mat.16:1; Mk.8:1; Lk.11:16.
39Jisuan an ziangah, “Atûn lâia thoithar, isual tak neh inrê ngaihei hin, risinsiana thil rikhêl nin izong na! Zânthla Jona risinsiana banah chu risinsiana thil rikhêl dang nin ziangah ipe ni no nih.#Mat.16:4; Mk.8:12. 40Khaangkan Jona khah sûn thumkah neh zân thumkah ngapui sungah ai om angkan Miriam Naipa khom hi sûn thumkah neh zân thumkah rinêng rilah ai om rang a nit.#Jon.1:17. 41Roirêl Nikhuan chu Ninevi khuaa mihei kha atûnlâi mihei rualin iding an ta, thiamno nangni inchang an ti; anni chu Jona thu sîr an riat sikin an sualhei ata kha an irlet a nit; nangni ke ril, Jona nêka roinpui ual hin ai om a nit. 42Roirêl Nikhuan chu Seba rêngnu kha atûnlâi mihei rualin iding a ta, thiamno nangni inchang a ti; ani chu rêng Solomona inriseina vâr ringai rang ilua khomin a ram ata ilah takah a hong înzin a nit; nangni ke ril, Solomona nêka roinpui ual hin ai om a nit.#2 Pet.2:20.
Ramrili hong kîr nôk thu
(Lk.11:24-26)
43“Ramrili khah miriam sung ata a suakin chu ngammun izongin tui boina ramah a chaidiai a. A mu no tenan chu, 44‘Ki in, kî mâk tâkah khan kîr nôk tâng ki ti,’ a ti a. Khanchu, a kîr nôk a, a va tlungin chu irong vangka, phît infâi a, rêl infel diamkan a va mu a. 45Khanchu, a fe a, ramrili dang sarikah ama nêka seh ual a hong ṭhui a; amakhan an lût a, an om tâk a. Khanungchu, kha miriam dingmun khah matona nêkan a siat ual ok tâk a. Khangkah khan atûnlâia thoithar isual takhei chungah hin la tlung a ti,” a ti a.
Jisua nu neh a unaipahei
(Mk.3:31-35; Lk.8:19-21)
46Mipuihei ziangah Jisuan thu â sîr mai lâiah khan Jisua nu neh a unaipahei kha an hong tlung a. Amah isôn inuamin putiang an iding a. 47Khanchu, mi khatkan a ziangah, “En ta, ni nu neh ni unaipahein nang isôn inuamin putiang nang an ngâk mai,” a ti pêk a.
48Jisuan a ziangah, “Tûm ki nu chu? Tûm ki unaipahei chu?” a ti a. 49Khanchu, a kôilômhei tiang a kut a phar a, “En rei, hihei hih ki nu neh ki unaipahei chu an nit. 50Tutu, ki Pa rivâna mi lungdo sinhei hih ki unaipa hei, ki farnu hei, ki nu hei chu an nit,” a ti a.
Currently Selected:
MATHAIA 12: BIATBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More
