MATI 17
17
Ballupname:
(Mk 9:2-13; Lk 9:28-36)
1Longké méélampe Jisu, Pitor, Jems delokke Jemske bíro Joan bulum lekope dííte teyolo saabo sukai. 2Delo buluke keralo bí ballupto. Bíkke mingmode doonyi kísa angune ikai. 3Dekepe idodelo Mosilang Elijah bínyi, Jisume luposuto. 4Pitor bí delo Jisume emto, “Ruutume, ngolu so duubosunam si duuji namko. Nokke míísang emílo, ngo delo duupekuem ibiyé nok kepe ako, Mosi kepe ako delokke Elijah kepe ako.”
5Bí depe pongo pakduem, doomug muklune bulum yéllum bomkai, delokke doomug aradelok agomko poto, “Si ngokke Ue, bím ngo ayadung; bím ngo mííyum sudung. Bím tatlangka!”
6Luyilsuna kídíde dem tatyédelo, bulu pesuem amolo mingmue igeto. 7Idakkom Jisu bí aala bulum ukkíto. “Dareplangka, pesomapeka” emto. 8Bulu kanggo sukuname séko meteng kaamang, Jisu petomme kaato.
9Bulu dííte delokke oidakkuem Jisu bí bulum sikepe poyilto, “Tanike Uem sikolokke kiirep kumang tetengem nolu ingkuem kaatodí dem séko meteng pomapeka.”
10Bíkkelo luyilsuna kídíe aala bím íngkíto, “Demílo kapeila ukil kídíe Elijah bí kerape aayérungku emkane?”
11Jisu bí poyansuto, “Berokrupe pomílo, Elijah bí aala takam atíem mosingyéku. 12Idakkom ngo nolum podung, Elijah bí angka kubong idola bulu bím kénmape igeyéla, bulu kusiipe bím ito. Deke kísape Tanike Uemkom buluke alaglo iréé sinyola iyé.” 13Delo luyilsuna kídíe bí Baptist Joanke legangem podung emla tatkénto.
Simatna Koo Konem Jisuke Ipíkuname
(Mk 9:14-29; Lk 9:37-43a)
14Bulu ami baane delo aado kudem, amiko Jisukíng aanínla delokke bíkke keralo polenkai. 15Bí “Ruutume ngokke oo teyolo yaasam toyika” emla roguto. Bí pokai, “bí simatla botterupe kidung. Leko leko bí emelo demangkom asilo olíkdung. 16Ngo nokkelo luyilsuna kídílo bomatuai, idakkom bulu bím ipílatomang.”
17“E, arope míímana delokke bulna siiruma” emla Jisu bí pokai, “Edítpe nolukelo ngo yébo supene? Edítpe ngo nolum duubo supene? Koodem ngokkíng so bomatola.” 18Jisu bí uyuem luto, delo uyude koo delokke lentoku, delokke ila koode ekerkaku.
19Delokrongem luyilsuna kídíe Jisukíng rongngampe aala tatkíto, “Ngolu kapeilai dem monlang kumatone?”
20Bí pokai, “Kapeila noluke míngkenge anyodung. Ngo nolum aruem podung, nolu ansoona tulang amí kísanako míngkeng kamílo nolu sim dííte simkom ‘Sokke elo ngétgé langka’ emmílo de arope ngétgéyé. Ingkuete nolu kepe ilamanam kamayé. 21Sikena atíem dobom suyimape kumnamlok pakdung.”
Jisubí Lekoda Agí Sipenamem Pobisukuname
(Mk 9:30-32; Lk 9:43b-45)
22Bulu Galillo gídum sudodem, bí bulum pokai, “Tanike Uem miru kídí alaglo yadlík yébong. 23Bulu bím petyé, delokrongem, ibum roolo bím turdokupe kiirepyéku.” Delo luyilsuna kídíde buulínge ito.
Kumkeng Ekumlo Kajanang Biname
24Jisulang delokke bíkkelo luyilsuna kídíde Kapernaumlo pííduem, kumkeng ekum lokke kajanang ulna kídíe Pitorkíng aala íngkíto, “Noluke babue kumkeng ekum kajanangem bidunía?”
25Bí “E, bidung” embito.
Edílo Pitor bí ekumdelo aatodí delo Jisu bí kerayalumpe pogekai, “Simon, no ingkoko míídun” emla íngkíto. “Ingkolok tani amosokke roja kídíe kajanang uldune buluke agí ookídí logía ma, abíd ami logía?” emla íngkíto.
26Pitor bí “Abíd amilok” embito. “Demílo ookídíem mesam bidung” emla Jisu bí bím poto. 27“Nolu bulu míínying madope sine paatalo gíla gakar píkto langka. Nokke kerang yalumpe píknam engodem laala nappangem kiiyatoka delo nolu abalko paayé. Dem laala bulum ngokke pelang noluke kajanape bitolangka.”
Currently Selected:
MATI 17: adiBSI
Highlight
Share
Compare
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
