MATI 18
18
Teyong Amolo Botteyalumne
(Mk 9:33-37; Lk 9:46-48)
1Depe irongem luyilsuna kídíe Jisukíng aala íngkíto, “Sékoi teyong amolo botteyalumne?”
2Bí koo aménako tomaala buluke keralo dakmoto. 3Delo bí poto, ngo nolum aruem pobidung, nolu angurupe koo aména sok kísape ikumamílo nolu edílokom teyong amolo aala mayé. 4Delok legape, séko sok koo ansoona sok kísape agíe amépe míísududí bímin teyong amolokke botte yalumne. 5Delokke séko sok kísana koo améngonem ngokke amínlok torík sududí bí ngom torík sudung.
Paab Imemname
(Mk 9:42-48; Lk 17:1-2)
6“Idakkom séko ngom arope míína koo kídí akonem paab imodudí, bíkkepe bottena anyat lííbyangko agí alíílo paklík supala siyéng asi arabelo giilum sunamde aiyado. 7Si tani amongke gérmang pekue, kapeila tani amoso taniem paab imona atíeke kadung! Sikena atíe kaperung aiyé, idakkom ingko amie depe imodudí pesorunam gérmade bíkkelo duuyé! 8Nokke alage demangkom nokke ale nom paab imodumílo, dem teepak sutola. No alag annyiko demangkom ale annyiko gedola mityimana emelo yoplík kosu pemílo, letu lakbyala turkolo aanamde nokkepe aiyado. 9Delokke nokke amige nom paab imodumílo, roolensula dem elpaktola. No amig annyiko gedola doorum líísam emelo yoplík kosu pemílo, turkolo mikkéla aanamde nokkepe aiyado.
Mér sobén Nyoknalo Luyiisuname
(Lk 15:3-7)
10“Nolu sim koo aména sokke akonemkom míílomapeka dem kénsu langka. Kapeila ngo nolum podung teyong telo duuna buluke teyong kotoki kídíe agínpe ngokke teyong Yayike mingmuem kaasudung. 11Kapeila Tanike Ue nyokna amiem mosingkupe emlamin aatone.”
12“Nolu ingkoko míídun? Ami akone mér sobén língkoko bommílo, delokke delok akone nyok mílo, bí íying konang demlang konang dem dííte teyolo megeyéla, gínyok nadem mata pongku mape iyélanga? 13Delo bí dem pangkumílo, ngo nolum aruem podung, bí duusuna íying konang demlang konang dempemílo, gínyokna ateldem ashéng yabomdung. 14Deke kísa pakpe noluke teyong Abue sok aména koo kídísok akone nyoknam demteng aipe míímang.
Paab Ina Bírue
15“Nokke bírue nokke kangkinam ko idumílo”#18:15: Ayokon agome kangkinamko imamílo. nonyike arasulo gíla delokke bím bíkke imemem lukan bitoka. Bí nokke agomem tatyémílo, no nokke bíruem paatoku. 16Idakkom bí tatma yémílo, no midum akon mangke annyiko tomla gíbo sutoka, delomin legang takamem hakii annyi angum agomlok tatyéne#Pobeng 19:15 17Bí delote buluke agomem tatmang teteyémílo, mondolilo lukan langka; mondoli agom emte tatmayémílo, bím mipak amipe demangkom kajanang ulna amipe imolangka.
Luyanamelang Tolíkname
18“Ngo nolum aruem podung, nolu ingkuem tani amoso luyayédi, depe teyong amolokom iyé, delokke ingkuem nolu tani amoso tolíkyédí teyong amolokom tolíkyé.
19“Lekoda ngo nolum podung, nolu midum annyiko noluke aralok kumbom penam atíem lekobosula komílo, dem ngokke Teyong Yayi bí nolukepe ipííbiyé. 20Kapeila ingkolo midum annyi mangke angumko ngokke amínlok duudum sududí, delo ngokom bulukíng duumíndung.”
Maab Bimana Béérangkolo Luyiisuname
21Delo Pitor bí Jisukíng aala ingkíto, “Ruutume, ngokke bírue ngokke kangkinamko imílo edítko ngo bím maab bipe aidon? Lemkínít lopía?”
22Jisu bí poto, “Ngo nom podung, lemkínít petommang, idakla lemying kínít kolang lemkínítko.#18:22: Demangkom lemying kínít lokke lemkínítko. 23Delok legape, teyong amode roja lokke agí béérang kídíke ajéngem isap iyin bosupe emla inam kísadung. 24Bí isabem ilenbosupe iyédem, bíkkelok jarying lííying ajéng gena amiko bíkkíng aabodo. 25De amide abalem bilang tokumang iname, bílang bíkke méng ome-oo kídíem delokke bíkke bomnam sérang takamem kosula bilat dokupe ruutumde hukum bito. 26Béérade bíkke keralo lebíng koníla pelaato. Bí rogudola poto, ‘Ngom donggap bipong langka, delokke ngo takamem doryéku.’ 27Béérang delokke ruutumde bím ayange emla mííla, bíkke ajéngem mesam bito delokke bím gímotoku.
28“Idakkom edílo de béérade gílen tokudí, delo bíkkelok adoli língko ajéng gena, bíkke béérang angongko paato. Delo bí akondem gakla nyumsulpe emla ibomkai. Bí ‘Ngokke ajéngem dortolangku!’ emto. 29Bíkke béérang angode lebíng koníla bím rogudola poto, ‘Ngom donggap bipotoyika, ngo nom doryérungku.’ 30Idakkom bí tatbimang. Dem megeyéla, bí gíla amidem bíkke ajéngem dorkuma tetengem duuyépe emla bím pateklo líkto. 31Delo abíd béérang kídíe kape itodí dem kaayédem, bulu airupe duuge ito delo gíla buluke ruutumdem legang takamdem pobitoku, 32Delo ruutumde bééradem tomaato. Bí luto, ‘No mirul no, nokke ngom rogukolok ngo nokke dorkupenam ajéng emte mesam bito. 33Ngokke nom inam kísape no nokke béérang ajonem yaasam lamanía?’ 34Bíkke ruutumde marla bím bíkke ajéng takamem dorkuma tetengem duuyépe emla bím pateklo meto.
35“Noluke bíruem noluke aapí ainalok maab bimamílo ngokke teyong Yayikom nolum mipilem dekepe iyé,” emla Jisu bí poto.
Currently Selected:
MATI 18: adiBSI
Highlight
Share
Compare
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
