MATI 16
16
Irísinyo Iyod Mataname
(Mk 8:11-13; Lk 12:54-56)
1Pharisi kídíelang Sadduki kídíe Jisukíng aala bím aang ikaape emla taleng telok iyodko ibidope pokíto. 2Bí sikepe poyansuto, “Yume ito, nolu emdo, ‘Talenge dooreyéku, kapeila taleng si líídung’; 3delokke rue ito, ‘Silo gumyé, kapeila taleng si líídung delokke kaamue idung.’ Talengem kaala kape iyédí dem pogangem nolu kéndung, dekom iyod moodíem nolu pobikénmang. 4Mirulna delokke abír ina siirume irisinyo iyodem matadung, idakkom séko mekom Jonahme iyod binam kékondelo iyod bimayé.” Jisu bí delo bulum megeyéla gítoku.
Pharisi Kídí Elang Sadduki Kídílokke Siiyé
(Mk 8:14-21)
5Sine paatang dem bulu koodo delo luyilsuna kídíe ettíngem mesuto. 6“Ansulangka” emla Jisu bí bulum potosubito, “agíem Pharisi kídí kelang Sadduki kídíke siiyé lokke ansulangka.”
7Buluke aralo agí agísue dem legadem pobosudola pokai, “Ngolu ettíngem bomang malamino.”
8Buluke lupo sunamdem Jisu bí talla luto, “Nolu míngkeng pííramna kídía kapeila noluke aralo ettíng kamang emla potí bosukane? 9Nolu supakpete kénmanía? Lub roti pilngo lok éjar pilngo ami legape edít aapé bíínako nolu paatone dem míípang sukumanía? 10Delokke lub roti kínítlok éjar appi ami legape edít aapé bíínako nolu paatone? 11Kapeila nolu tatkén mane, depe emnamde ngo ettíng legangem pomapía? Pharisi kídí delokke Sadduki kídíke siiyélokke nolu agíem ansulangka,” emlamin podune. 12Delomin ettínglo siiyé líknam legangem bí pomangai idola Pharisi kídí kelang Sadduki kídíke luyil agom legang emmin podune emnamdem bulu kénsu kakune.
Pitorke Jisume Agíkepe Posuname
(Mk 8:27-30; Lk 9:18-21)
13Méélamdem Jisu bí Kaisaria lokke Philippi amolo pííduem, bí bíkkelo luyilsuna kídíem íngkíto, “Tanike Uem amie séko emdun?”
14Bulu poyansukai, “Ayokone Baptist Joan bí, ayokone Elijah, delokke attungkone Jeremiah, demangkom kaaluna mirikonko,” emkai.
15Bí íngkíto, “Nolu kape emdune? Ngom nolu kape emdune?”
16Simon Pitor bí polenkai, “No Kristomin,#16:16: Demangkom Messiah. Turna Shédíke Ue.”
17Jisu bí pokai, “Joanke oo Simon, no gérne, kapeila dem tanilok nom berok bimang, idakla teyong telo duuna ngokke Yayimin berok bitune. 18Delokke ngo nom podung, Pitor, no línggenko, delokke so lííduso ngokke mondoliem ngo molíkyé, delokke sinam eteng dem ikum lamayé. 19Ngo nom teyong amolokke sabiem bilíkyé, ingkuem no tani amongso luyadudí teyong amolokom luyayé delokke no tani amoso ingkuem tolík dudí dem teyong amolokom tolíkyé.” 20Delokrongem bíkkelo luyilsuna kídíem Kristo emnam agomdem sékomete pobimapeka emla bí pogapsuto.
Jisume Irééla Delokke Mokapenamem Potosubiname
(Mk 8:31; 9:1; Lk 9:22-27)
21Delokke ilangala Jisu bí bíkkíng luyilsuna kídíem bíkke Jirusalemlo gíla mirokídí, rínekídí delokke ukilkídí alaglo bím iréé sinyola, bím mokala, delokke bíkke ibum roolo gerep kupenamem polen subito.
22Delo Pitor bí gípek bosudola bím luto, “Depe imayé, Ruutume! Nome edílokom depe imayé.”
23Jisu bí ngéngkut sulangkula Pitorme luto, “No soitanno ngokke keralo duumapeka! No ngokke tupsu pekue; no Shédíke arang aapíem gemang, idakla tani aapí emmin gedune.”
24Delokrongem Jisu bí bíkkíng luyilsuna kídíem pokai, “Séko ngokkíng aape míídudí, bí agí aapíem mepaksula agíe kross em bomsula ngokke méélamlo gímín gepe aido. 25Kapeila séko agí turnamem#16:25: Grik agomlo turnam demangkom aid. mesiisupe míídudí bí dem menyoksuyé, idakkom séko ngokke legape turnamen menyok sududí demoko dem paayéne. 26Tanie tani among tabung sim paalateng agí aidem nyokmo dumílo bíkke ingkoko laabe kadun? Demangkom bíkke aid ayanem tanie ingkoko biyan suladun? 27Legade Tanike Ue bíkke teyong kotoki kídíem yébosula bíkke Abuke angun ralnamlo aadak kubong delokke delomin mipilem mipil ikorlok amanem biyékune, 28Ngo nolum aropakpe podung, so dakna ayokone Tanike Ue bíkke amolo aadokupe kaasuma tetengem simape duune kayé.”
Currently Selected:
MATI 16: adiBSI
Highlight
Share
Compare
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
