Tshwmsim 8

Lub Homthawj Thib Xya

1Thaum tus Menyuam Yaj muab lub homthawj thib xya tev, uaciav saum ntuj ceebtsheej txawm ntsiagto kwvlam li pebcaug feeb. 2Ces kuv txawm pom xya tus timtswv uas sawv ntawm Vajtswv xubntiag, lawv tau txais xya lub rajxyu.

3Muaj dua ib tug timtswv ceebtsheej uas nqa ib lub tais kub rau hmoov tshuaj tswqab txawm los sawv ntawm lub thaj uas muab khoom fij rau Vajtswv. Nws tau txais ib co hmoov tshuaj tswqab ntau kawg coj los ntxiv rau tagnrho Vajtswv cov neeg tej lus thov, thiab nqa mus fij rau saum lub thaj kub uas nyob ntawm lub zwmtxwv hauvntej. #Amaus 9:1; Exek 30:1, 3 4Cov pa uas hlawv cov tshuaj tswqab, nrog rau tagnrho Vajtswv cov neeg tej lus thov ntawd txawm ncho lug ntawm tus timtswv txhais tes mus rau Vajtswv. 5Ces tus timtswv txawm muab lub tais uas rau cov hmoov tshuaj tswqab ntawd mus ntim cov hluavtaws uas nyob saum lub thaj kom puvnkaus rau; ces nws txawm muab lub tais hluavtaws ntawd pov rau hauv ntiajteb. Ces xob txawm nroo thiab xob laim liab pes vog, muaj suab nrov qeeg nkaws thiab muaj av qeeg. #Levi 16:12; Exek 10:2; Khiav 19:16; Tshwm 11:19; 16:18

Cov Rajxyu

6Tomqab ntawd xya tus timtswv ceebtsheej uas nqa xya lub rajxyu txawm npaj yuav tshuab lawv cov xyu.

7Thawjtug timtswv tshuab nws lub rajxyu, ces txawm muaj lawg thiab hluavtaws xyaw ntshav poob los rau hauv ntiajteb. Lub ntiajteb kubhnyiab tag ib feem peb, tej ntoo kubhnyiab tag ib feem peb, thiab tej nrojtsuag kubhnyiab tag huv tibsi. #Khiav 9:23-25; Exek 38:22

8Thaum tus timtswv thib ob tshuab nws lub rajxyu, txawm muaj ib yam zooli ib lub roob loj-loj uas tabtom kubhnyiab ciali raug muab pov rau hauv hiavtxwv. Dej hiavtxwv txawm ciali hloov mus ua ntshav tag ib feem peb, 9tej tsiaj uas nyob hauv hiavtxwv tuag tag ib feem peb, thiab tej nkoj uas nyob hauv hiavtxwv puastsuaj tag ib feem peb.

10Thaum tus timtswv thib peb tshuab nws lub rajxyu, muaj ib lub hnubqub loj-loj, cig lamlug ib yam li tes tsau, poob saum ntuj los rau ib feem peb hauv tej dej loj thiab txhua lub qhovdej txhawv. #Yaxaya 14:12 11(Lub hnubqub ntawd hu ua “Iab.”) Ib feem peb ntawm tej dej ciali iab tag huv tibsi, muaj neeg tuag coob heev vim lawv haus cov dej iab ntawd. #Yelemi 9:15

12Thaum tus timtswv thib plaub tshuab nws lub rajxyu, lub hnub txawm raug tsoo puastsuaj tag ib feem peb, lub hli thiab cov hnubqub los puavleej puastsuaj tag ib feem peb, ua rau qhov pomkev tsaus lawm ib feem peb; nruabhnub los yeej tsaus lawm ib feem peb thiab hmontuj los tsis muaj qhov ci pomkev txog ib feem peb lawm. #Yaxaya 13:10; Exek 32:7; Yau 2:10, 31; 3:15

13Thaum ntawd kuv saib thiab hnov ib tug dav ya saum nruabntug quaj nrov-nrov hais tias, “Kev puastsuaj! Kev puastsuaj! Kev puastsuaj yuav los raug rau txhua tus neeg uas nyob hauv ntiajteb no lau, rauqhov tseem tshuav cov suab rajxyu ntawm peb tug timtswv uas tseem tabtom yuav tshuab!”

Currently Selected:

Tshwmsim 8: MWW2022

Highlight

Copy

Compare